ຄະນະຜູ້ບໍລິຫານລະດັບສູງສະຖາບັນຄຸ້ມຄອງເງິນຝາກແຫ່ງປະເທດ (DPA) ນຳໂດຍທ່ານ ສໍຣະສິດ ສູນທອນເກດ ຜູ້ອຳນວຍການ DPA ໄດ້ເດີນທາງເຄື່ອນໄຫວ ແລະເຮັດວຽກກັບກອງທຶນປົກປ້ອງຜູ້ຝາກເງິນ (DPF) ທະນາຄານແຫ່ງ ສປປ ລາວ ລະຫວ່າງວັນທີ 27-28 ມິຖຸນາ 2016 ຊຶ່ງໄດ້ມີການຕ້ອນຮັບຢ່າງອົບອຸ່ນຈາກ ທ່ານ ນາງ ແສງດາວວີ ວົງຄຳຊາວ ຜູ້ອຳນວຍການ DPF ພ້ອມຄະນະ ເຊີ່ງມີຈຸດປະສົງເຂົ້າຮ່ວມພິທີເຊັນຂໍ້ຕົກລົງວ່າດ້ວຍການປັບປຸງບົດບັນທຶກຄວາມເຂົ້າໃຈ (MOU) ແລະຈັດຕັ້ງການສຳມະນາ.
ສຳລັບໃນຕອນແລງ 27 ມິຖຸນາທີ່ໂຮງແຮມລາວພລາຊາ 2 ອົງກອນດັ່ງກ່າວ ໄດ້ຈັດພິທີເຊັນ MOU ຮ່ວມກັນ ຊຶ່ງຝ່າຍລາວໂດຍແມ່ນ ທ່ານ ນາງ ແສງ ດາວວີ ວົງຄຳຊາວ ຜູ້ອຳນວຍການ DPF ແລະຝ່າຍໄທ ນຳໂດຍທ່ານ ສໍຣະສິດ ສູນທອນເກດ ຜູ້ອຳນວຍການ DPA, ມາຮອດປະຈຸບັນເປັນເວລາເກືອບ 3 ປີແລ້ວທີ່ DPF ແລະ DPA ໄດ້ເຊັນ MOU ການຮ່ວມມືຊຶ່ງຕະຫຼອດ 3 ປີ ມານີ້ DPF ໄດ້ຮັບການຊ່ວຍເຫຼືອທາງດ້ານວິຊາການຈາກ DPA ໂດຍໄດ້ມີການແລກປ່ຽນຄວາມຮູ້ທາງດ້ານວິຊາການທີ່ຕິດພັນກັບວຽກງານປະກັນໄພເງິນຝາກ ພ້ອມທັງແລກປ່ຽນພະນັກງານຈຳນວນ 9 ຄັ້ງ, ສ່ວນໃຫຍ່ກໍເປັນການປຶກສາຫາລືແລກປ່ຽນບົດຮຽນ, ການໃຫ້ທຶນການສຶກສາໄລຍະສັ້ນ, ການຈັດສຳມະນາ ແລະການຝຶກອົບຮົມ.
ໃນໂຄງການດຳເນີນງານຂອງ DPF 2016-2020 ໄດ້ເນັ້ນໃສ່ການພັດທະນາບຸກຄະລາກອນໃນວຽກງານປະກັນໄພເງິນຝາກ, ພ້ອມນີ້ ຍັງສະເໜີ DPA ຊ່ວຍເຫຼືອດ້ານວິຊາການ ເພື່ອສ້າງຄວາມອາດສາມາດໃຫ້ແກ່ພະນັກງານ ໂດຍສະເພາະຊ່ວຍເຫຼືອການຈັດສຳມະນາຢູ່ ສປປ ລາວ ເພື່ອແລກປ່ຽນບົດຮຽນປະສົບການກ່ຽວກັບວຽກງານປະກັນໄພເງິນຝາກໃນຫົວຂໍ້ທີ່ສຳຄັນ ແລະຈຳເປັນຄື: ການຈ່າຍຄືນເງິນຝາກໃຫ້ຜູ້ຝາກເງິນໃນເວລາເກີດມີວິກິດການທະນາຄານລົ້ມລະລາຍລວມໄປເຖິງການແກ້ໄຂບັນຫາທະນາຄານ ແລະການຊຳລະສະສາງ, ການບໍລິຫານຈັດການພາຍໃນທີ່ເປັນລະບົບ ແລະທັນສະໄໝ ແລະການຖອດຖອນບົດຮຽນຈາກ DPA ໃນການຂຽນໂຄງການຫັນເປັນທັນສະໄໝ ແລະລະບຽບການອື່ນໆທີ່ກ່ຽວຂ້ອງ.
ຕໍ່ມາໄດ້ຈັດຕັ້ງການສຳມະນາພາຍໃຕ້ຫົວຂໍ້: ຂັ້ນຕອນການຈ່າຍຄືນເງິນຝາກ ແລະການພັດທະນາລະບົບການແກ້ໄຂບັນຫາສະຖາບັນການເງິນຊຶ່ງ 2 ຫົວຂໍ້ດັ່ງກ່າວ ໄດ້ມີຄວາມໝາຍສຳຄັນຍິ່ງຕໍ່ກັບການພັດທະນາວຽກງານປະກັນໄພ ເງິນຝາກຂອງ DPF ແລະຍັງເປັນການເປີດໂອກາດໃຫ້ແກ່ບັນດານັກສຳມະນາກອນໄດ້ຮຽນຮູ້ແລກປ່ຽນປະສົບການຕົວຈິງໃນວຽກງານປະກັນໄພເງິນຝາກຈາກນັກວິທະຍາກອນຜູ້ມີປະສົບການສູງຈາກ DPA, ເຖິງຢ່າງໃດກໍຕາມການຈັດສຳມະນາວຽກງານປະກັນໄພເງິນຝາກບໍ່ພຽງແຕ່ເປັນການແລກປ່ຽນບົດຮຽນທາງດ້ານວິຊາການເທົ່ານັ້ນແຕ່ຍັງເປັນການຈັດຕັ້ງປະຕິບັດວຽກງານປະກັນໄພເງິນຝາກໃຫ້ນັບມື້ນັບດີຂຶ້ນກວ່າເກົ່າ ແລະອີກດ້ານໜຶ່ງຍັງເປັນຂີດໝາຍແຫ່ງການຮັດແໜ້ນຄວາມສາມັກຄີຂອງອົງກອນອີກດ້ວຍ.
ທີ່ມາ: 