ລະຫວ່າງວັນທີ 23 -25 ມິຖຸນາ 2016 ຜ່ານມານີ້, ຄະນະຜູ້ແທນລາວນຳໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ໃນນາມປະທານຄະນະກຳມະການບ້ານເດັກ SOS ລາວໄດ້ເຂົ້າຮ່ວມກອງປະຊຸມສະມັດຊາໃຫຍ່ສະໄໝສາມັນຄັ້ງທີ 20 ຂອງບ້ານເດັກ SOS ສາກົນທີ່ໄດ້ຈັດຂຶ້ນທີ່ອິນສະບຣຸກປະເທດ ໂອຕຣິດ.
ກອງປະຊຸມດັ່ງກ່າວ ບັນດາຜູ້ແທນຍັງໄດ້ຮັບຟັງບົດລາຍງານການເຄື່ອນໄຫວຂອງສະຫະພັນ, ສານຈາກຜູ້ຕາງໜ້າພິເສດຂອງເລຂາທິການໃຫຍ່ ສປຊ ກ່ຽວກັບຊາວໜຸ່ມ, ຄວາມເປັນພາຄີທີ່ສຸມ ໃສ່ການຈ້າງງານໄວໜຸ່ມ, ຄຳຮຽກຮ້ອງ ຂອງໂລກຕໍ່ການສ້າງຄວາມເຂັ້ມແຂງ ການມີສ່ວນຮ່ວມຂອງໄວໜຸ່ມ, ໃນກອງ ປະຊຸມຄະນະຜູ້ແທນແຕ່ລະປະເທດຍັງ ໄດ້ລາຍງານການເຄື່ອນໄຫວ ແລະປະ ກອບຄຳເຫັນຕໍ່ບົດລາຍງານ, ພ້ອມທັງ ພິຈາລະນາຮັບຮອງເອກະສານສຳຄັນ ຫຼາຍສະບັບເປັນຕົ້ນກົດລະບຽບສະບັບ ປັບປຸງໃໝ່, ແຜນຍຸດທະສາດ ປີ 2030 ກ່ຽວກັບວຽກງານຂອງບ້ານເດັກ SOS ສາກົນ, ເພື່ອເປັນບ່ອນອີງໃນການຈັດຕັ້ງ ປະຕິບັດວຽກງານດັ່ງກ່າວ, ພ້ອມດຽວກັນນີ້ກອງປະຊຸມກໍໄດ້ລົງຄະແນນສຽງເລືອກຕັ້ງເອົາທ່ານປະທານ, ຮອງປະທານ ແລະສະມາຊິກຊີເນັດອົງການ SOS ສາກົນຜູ້ໃໝ່ເພື່ອສືບຕໍ່ຊີ້ນຳວຽກງານອົງການ SOS ສາກົນ.
ສປປ ລາວ ໃນນາມເປັນສະມາຊິກຂອງອົງການດັ່ງກ່າວເວລາໃດກໍໄດ້ເອົາໃຈໃສ່ຢ່າງຕັ້ງໜ້າຕໍ່ການປະຕິບັດພັນທະໜ້າທີ່ຂອງຕົນ ແລະໄດ້ຢຶດໝັ້ນໃນຫຼັກການຟື້ນຖານຂອງອົງການ SOS ສາກົນກ່ຽວກັບການດູແລເບິ່ງແຍງລ້ຽງດູເດັກກຳພ້າ-ກຳພອຍທີ່ດ້ອຍໂອກາດ ຊຶ່ງນັບແຕ່ໃດມາແລ້ວ, ທີ່ພັກ ແລະລັດຖະບານໄດ້ເອົາໃຈໃສ່ ແລະໄດ້ໃຫ້ຄວາມສຳ ຄັນໃນການປົກປ້ອງສິດ ແລະຜົນປະ ໂຫຍດຂອງແມ່ຍິງ ແລະເດັກ, ຮັບປະກັນສິດພື້ນຖານຂອງເດັກ ດ້ວຍການສ້າງທຸກເງື່ອນໄຂໃຫ້ແມ່ຍິງ ແລະເດັກໄດ້ຮັບການພັດທະນາຢ່າງຮອບດ້ານ, ທັງມີບົດບາດໃນຄອບຄົວ, ສັງຄົມ, ເສດຖະກິດແລະ ການເມືອງ ເພື່ອເປັນກຳລັງແຮງສັງລວມໃນການປົກປັກຮັກສາ ແລະສ້າງສາພັດທະນາປະເທດຊາດ.
ພ້ອມນັ້ນ ກໍໃຫ້ຄວາມສຳຄັນຢ່າງບໍ່ລົດລະຕໍ່ບົດບາດແມ່ຍິງ ແລະເດັກ, ດ້ວຍການປົກປ້ອງສິດ ແລະຜົນປະໂຫຍດອັນ ຊອບທຳຂອງແມ່ຍິງ ແລະເດັກຕົ້ນຕໍແມ່ນສິດໃນການດຳລົງຊີວິດ, ມີກຽດສັກສີໃນ ສັງຄົມປາສະຈາກຄວາມຮຸນແຮງ ແລະ ການຂູດຮີດ, ຍົກສູງສິດທິພື້ນຖານຂອງ ເດັກ ເພື່ອຮັບປະກັນຄວາມຢູ່ລອດ, ການ ປົກປ້ອງ, ການມີສ່ວນຮ່ວມ ແລະການພັດທະນາຂອງເດັກທີ່ເປັນລູກຫຼານຂອງພວກເຮົາໃນມື້ນີ້ໃຫ້ມີໄວເດັກທີ່ເຕັມໄປດ້ວຍຄວາມສຸກ, ຄວາມອົບອຸ່ນຈາກພໍ່-ແມ່, ການຈັດຕັ້ງ ແລະສັງຄົມແນໃສ່ໃຫ້ ກາຍເປັນຜູ້ໃຫຍ່ໃນມື້ໜ້າທີ່ມີສຸຂະພາບແຂງແຮງ, ມີຄວາມຮັບຜິດຊອບສູງ, ມີ ຄວາມຮູ້ຄວາມສາມາດຢ່າງເຕັມສ່ວນ ເພື່ອເຮັດໜ້າທີ່ເປັນຜູ້ສືບທອດພາລະກິດປົກປັກຮັກສາ ແລະສ້າງສາພັດທະນາ ປະເທດຊາດໃຫ້ກ້າວໄປສູ່ເສັ້ນທາງຫັນ ເປັນອຸດສາຫະກຳ ແລະທັນສະໄໝ.
ທີ່ມາ: 