ໂດຍຕອບສະໜອງຕາມຄຳເຊີນ ຂອງສົມເດັດອັກຄະມະຫາເສນາບໍດີ ເຕ ໂຈ ຮຸນແຊນ, ນາຍົກລັດຖະມົນຕີແຫ່ງຣາຊະອານາຈັກກຳປູເຈຍ, ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍພັນລະຍາ ແລະຄະນະ ໄດ້ເດີນທາງໄປຢ້ຽມຢາມ ຣາຊະອານາຈັກກຳປູເຈຍຢ່າງເປັນທາງການ, ແຕ່ວັນທີ 27-28 ມິຖຸນາ 2016, ເພື່ອຮັດແໜ້ນ ແລະເສີມຂະຫຍາຍສາຍພົວພັນມິດຕະພາບທີ່ມີມາແຕ່ດົນນານລະຫວ່າງສອງປະເທດ.
ໃນວັນທີ 27 ມິຖຸນາ 2016, ທີ່ຫໍ ສັນຕິພາບ, ທ່ານ ທອງລຸນ ສີສຸລິດ, ໄດ້ ຖືກຕ້ອນຮັບ ແລະພົບປະປຶກສາຫາລືຢ່າງເປັນທາງການກັບ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ, ໃນການພົບປະຄັ້ງນີ້, ສອງຝ່າຍຕີລາຄາສູງການພົວ ພັນ ແລະການຮ່ວມມືສອງຝ່າຍມີການ ຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ຊຶ່ງເຫັນໄດ້ຈາກການແລກປ່ຽນການຢ້ຽມຢາມເຊິ່ງກັນ ແລະກັນຂອງຄະນະຜູ້ແທນ ຂັ້ນປະມຸກລັດ, ຫົວໜ້າລັດຖະບານ ແລະ ຂະແໜງການຕ່າງໆຕະຫຼອດຮອດທ້ອງຖິ່ນຂອງສອງປະເທດ ແລະສອງຝ່າຍ ເຫັນດີຈະສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນຕ່າງໆຂອງສອງປະເທດຢ່າງເປັນປົກກະຕິ, ເພີ່ມທະວີການຮ່ວມມືການຈັດຕັ້ງປະຕິບັດບັນດາສັນຍາ ແລະຂໍ້ຕົກລົງຕ່າງໆທີ່ສອງຝ່າຍໄດ້ຕົກລົງນຳກັນໃຫ້ເກີດດອກອອກຜົນ ແລະເປັນຮູບປະທຳ.
ສືບຕໍ່ເພີ່ມທະວີການຮ່ວມມືກັນໃນການຮັກສາຄວາມສະຫງົບ, ສະກັດກັ້ນການເຄື່ອນໄຫວຂອງຄົນບໍ່ດີ, ການລັກ ລອບຂົນສົ່ງ-ຄ້າຂາຍຢາເສບຕິດ, ການຄ້າຂາຍໄມ້ເຖື່ອນ ແລະປາກົດການຫຍໍ້ ທໍ້ອື່ນໆ ເພື່ອຮັກສາສັນຕິພາບ, ສະຖຽນ ລະພາບລຽບຕາມເສັ້ນຊາຍແດນຂອງ ສອງປະເທດ, ດ້ານວຽກງານຊາຍແດນ ສອງຝ່າຍຈະສືບຕໍ່
ສຳຫຼວດ ແລະປັກຫຼັກໝາຍຊາຍແດນໃຫ້ ສຳເລັດໂດຍໄວ, ສອງຝ່າຍເຫັນດີສ້າງຕັ້ງສະຖານກົງສຸນໃຫຍ່ຂອງສອງປະເທດຢູ່ປະເທດຂອງກັນ ຊຶ່ງຝ່າຍລາວຕັ້ງ ຢູ່ແຂວງຊຽງແຕງ ຂອງກຳປູເຈຍ, ຊຶ່ງຈະມີພິທີເປີດຢ່າງເປັນທາງການໃນວັນທີ 30 ມິຖຸນາ 2016 ນີ້ ແລະຝ່າຍກຳປູເຈຍຕັ້ງຢູ່ແຂວງຈຳປາສັກຂອງລາວ, ຊຶ່ງຈະຈັດພິທີເປີດຢ່າງເປັນທາງການໃນວັນທີ 1 ກໍລະກົດ 2016 ນີ້, ສອງຝ່າຍ ຍັງເຫັນດີທີ່ຈະເປີດດ່ານສາກົນໜອງນົກຂຽນ-ຕຼາປຽງກຼຽນຢ່າງເປັນທາງການ ໃນທ້າຍປີນີ້, ຈະພະຍາຍາມສ້າງພື້ນຖານ ໂຄງລ່າງ ເພື່ອເຊື່ອມຈອດລະຫວ່າງສອງ ປະເທດເຊັ່ນ: ໂຄງການກໍ່ສ້າງເສັ້ນທາງ ແລະຂົວເຊລຳເພົາທີ່ມີຄວາມຍາວ 145 ແມັດ ແລະເສັ້ນທາງເຊື່ອມຈອດແຕ່ເມືອງ ມູນລະປະໂມກຫາຂົວເຊລຳເພົາຍາວ 78 ກິໂລແມັດ, ທັງສອງຝ່າຍຈະຊຸກຍູ້ໃຫ້ມີ ການລົງທຶນ, ການຄ້າຮ່ວມກັນຫຼາຍຂຶ້ນ ໂດຍສະເພາະໃຫ້ເຂົ້າໄປລົງທຶນຢູ່ໃນປະເທດຂອງກັນ ແລະກັນ, ການຄ້າລະ ຫວ່າງແຂວງທີ່ມີຊາຍແດນຕິດຈອດກັນ, ໃນປີ 2015 ການຄ້າສອງຝ່າຍສາມາດ ບັນລຸໄດ້ 24,5 ລ້ານໂດລາ ສ່ວນໃຫຍ່ ແມ່ນຂະແໜງອຸດສາຫະກຳບໍ່ແຮ່, ການຂາຍຍົກ-ຂາຍຍ່ອຍ, ການເຄື່ອນໄຫວ ດ້ານການເງິນ ແລະປະກັນໄພ, ແລະ ດ້ານການສຶກສາສອງຝ່າຍເຫັນດີເປັນ ເອກະພາບເພີ່ມທຶນແລກປ່ຽນການສຶກ ສາລະດັບປະລິນຍາຕີລະຫວ່າງສອງລັດຖະບານ ເປັນ 15 ທຶນຕໍ່ປີ ແລະຈະເພີ່ມ ເບ້ຍລ້ຽງໃຫ້ແກ່ນັກສຶກສາຂອງສອງປະເທດເພື່ອແທດເໝາະກັບຄ່າຄອງຊີບຂອງແຕ່ລະປະເທດ.
ນອກນັ້ນສອງຝ່າຍຍັງເຫັນດີໃຫ້ການຮ່ວມມືກັນຢ່າງໃກ້ຊິດ ແລະໃຫ້ການສະໜັບສະໜູນຊ່ວຍເຫຼືອເຊິ່ງກັນແລະ ກັນໃນເວທີພາກພື້ນ ແລະ ສາກົນ ເຊັ່ນ: CLV, CLMV, ACMEC, ASEAN, UN, GMS ແລະ ອື່ນໆ.
ໃນໂອກາດນີ້ກຳປູເຈຍຈະເປັນເຈົ້າ ພາບຈັດກອງປະຊຸມ CLV ໃນທ້າຍເດືອນພະຈິກ 2016 ນີ້, ນາຍົກລັດຖະມົນຕີ ສປປ ລາວ ຍິນດີເຂົ້າຮ່ວມເພື່ອປຶກ ສາຫາລືການພັດທະນາຮ່ວມກັນນອກນັ້ນ, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ເຊື້ອເຊີນ ທ່ານນາຍົກລັດຖະມົນຕີຮຸນແຊນ ຢ້ຽມຢາມ ສປປ ລາວ ໃນເວລາທີ່ສະດວກ ແລະເຂົ້າຮ່ວມກອງ ປະຊຸມສຸດຍອດອາຊຽນທີ່ ສປປ ລາວ ຈະເປັນເຈົ້າພາບໃນທ້າຍປີນີ້.
ໃນວັນດຽວກັນນາຍົກລັດຖະມົນຕີ ແຫ່ງ ສປປ ລາວ ກໍໄດ້ໄປວາງພວງມະ ລາທີ່ອານຸສາວະລີເອກະລາດ ແລະອະນຸສາວະລີ ເຈົ້ານໍໂຣດົມສີຫານຸ ແລະໄດ້ພົບປະກັບ ສົມເດັດ ເຮັງ ຊຳຣິນ, ປະທານສະພາແຫ່ງຊາດ ແລະສົມເດັດ ຊາຍຊຸມ, ປະທານສະພາສູງແຫ່ງ ຣາຊະອານາຈັກ ກຳປູເຈຍ ຫຼັງຈາກນັ້ນກໍໄດ້ເຂົ້າຮ່ວມ ງານລ້ຽງອາຫານຄ່ຳຈັດໂດຍສົມເດັດອັກຄະມະຫາເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີແຫ່ງ ຣາຊະອານາຈັກ ກຳປູເຈຍ ແລະໃນຕອນບ່າຍ, ທ່ານ ຮໍນຳຮົງ, ຮອງນາຍົກລັດຖະມົນຕີກຳປູເຈຍ ໄດ້ຈັດງານລ້ຽງອາຫານທ່ຽງ ໃຫ້ແກ່ທ່ານນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ.
ທີ່ມາ: 