ຕອນແລງວັນທີ 23 ມິຖຸນາ 2016 ຜ່ານມານີ້ທີ່ພະແນກໂຍທາທິການ ແລະ ຂົນສົ່ງແຂວງຫຼວງນ້ຳທາໄດ້ຈັດພິທີມອບ-ຮັບເສັ້ນທາງ 4 ເລນ ເຂົ້າຮ່ວມຂອງທ່ານ ເພັງພະວັນ ດາວພອນຈະເລີນ ຮອງເຈົ້າແຂວງໆຫຼວງນ້ຳທາ, ທ່ານ ສຸວັນ ເພັງວົງໄຊ ຫົວໜ້າພະແນກໂຍທາທິການ ແລະຂົນສົ່ງແຂວງ, ຮອງເລຂາພັກເມືອງ ຫຼວງນ້ຳທາ, ຫົວໜ້າຫ້ອງການ-ຮອງຫົວໜ້າຫ້ອງການ, ທ່ານ ຄຳຜາຍ ໄຊພະຈັນ ອຳນວຍການບໍລິສັດໄຊພະຈັກກໍ່ສ້າງ ຈຳກັດ ມີພະນັກງານ ວິຊາການພາຍໃນພະແນກໂຍທາ ແລະວິຊາການຂອງ ບໍລິສັດເຂົ້າຮ່ວມ.
ທ່ານ ຄຳຜາຍ ໄຊພະຈັນ ກ່າວວ່າ: ເພື່ອພັດທະນາເທສະບານແຂວງ- ເທສະບານເມືອງຫຼວງນ້ຳທາໃຫ້ມີຄວາມເປັນລະບຽບ ແລະຈົບງາມ ອຳນາດການປົກຄອງເຂດດັ່ງກ່າວຈິ່ງໄດ້ອອກແຜນການປັບປຸງ, ຂະຫຍາຍ ແລະຍົກລະດັບພື້ນຖານໂຄງລ່າງໂດຍສະເພາະແມ່ນການກໍ່ສ້າງເສັ້ນທາງພາຍໃນເທສະບານແຂວງ, ເທສະບານເມືອງໃຫ້ກວ້າງຂວາງ, ໄດ້ມາດຖານ ເຕັກນິກ, ການສັນຈອນໄປມາມີຄວາມສະດວກປອດໄພທັງເປັນການແກ້ໄຂ ຄວາມແອອັດໃນຕົວເມືອງຫຼວງນ້ຳທາ.
ໂຄງການດັ່ງກ່າວເປັນໂຄງການກໍ່ ສ້າງເສັ້ນທາງ 4 ເລນ ແຕ່ 4 ແຍກສະໝາມບິນ ຫາ 3 ແຍກບ້ານໂພນໄຊສະຫວ່າງ, ຕາມເສັ້ນທາງ 3A ຊຶ່ງໄດ້ເລີ່ມລົງມືກໍ່ສ້າງມາແຕ່ວັນທີ 28 ມີນາ 2013 ແລະມາຮອດວັນທີ 8 ກັນຍາ 2015 ໄດ້ສຳເລັດ 100%, ໂຄງການ ດັ່ງກ່າວແມ່ນການຂະຫຍາຍໜ້າທາງອອກຈາກທາງເກົ່າເບື້ອງລະ 3,5 ແມັດ, ປະຈຸບັນໜ້າທາງກວ້າງ 14 ແມັດ, ຍາວ 2,8 ກິໂລແມັດ,ມູນຄ່າການກໍ່ສ້າງ ທັງໝົດ 30,8 ຕື້ກີບ, ໂດຍແມ່ນທຶນຂອງລັດ 100%, ໜ້າວຽກຍົກລະດັບໜ້າທາງ 50 ຊັງຕີແມັດ, ຊັ້ນຮ່ອງພື້ນທາງໜາ 20 ຊັງຕີແມັດ , ຊັ້ນພື້ນທາງ 20 ຊັງຕີແມັດ ແລະວຽກຂະຫຍາຍຂົວນ້ຳຮອຍ, ຕໍ່ທໍ່ ລອດທາງ, ຮ່ອງລະບາຍນ້ຳຂ້າງທາງ, ກໍ່ກັນເຈື່ອນ, ຕິດຕັ້ງໄຟຟ້າເຍື່ອງທາງ, ຂີດເສັ້ນຈາລະຈອນ, ຕິດຕັ້ງປ້າຍຈາລະຈອນ ແລະຫຼັກກິໂລແມັດ.
ຕາງໜ້າໂດຍການມອບ-ຮັບໂຄງການດັ່ງກ່າວລະຫວ່າງ ທ່ານ ຄຳຜາຍ ໄຊພະຈັນ ອຳນວຍການບໍລິສັດໄຊພະຈັກກໍ່ສ້າງຈຳກັດ ກັບທ່ານ ສຸວັນເພັງ ວົງໄຊ ຫົວໜ້າພະແນກໂຍທາທິການ ແລະຂົນສົ່ງແຂວງຫຼວງນ້ຳທາ.
ທີ່ມາ: 