ກ່ອນໜ້ານັ້ນມີຫລາຍທ່ານຕັ້ງຄໍາຖາມວ່າໂຄງການກໍ່ສ້າງເສັ້ນທາງລົດໄຟລາວ-ຈີນຄືວ່າມິດງຽບແທ້ ແລະ ບໍ່ຮູ້ວ່າຈະເກີດແທ້ ຫລື ບໍ່?
ຫລ້າສຸດແຫລ່ງຂ່າວວິທະຍຸສາກົນແຫ່ງປະເທດຈີນ( CRI) ໄດ້ເປີດເຜີຍວ່າໂຄງການກໍ່ສ້າງເສັ້ນທາງລົດໄຟລາວ-ຈີນເລີ່ມກໍ່ສ້າງອຸມົງມິດຕະພາບທາງລົດໄຟລະຫວ່າງຈຸດຕອນຢີ້ຊີ-ບໍ່ເຕັນ ເປັນສ່ວນປະກອບສຳຄັນຂອງທາງລົດໄຟສາກົນຈີນ-ລາວ ທີ່ເລີ່ມກໍ່ສ້າງໃນວັນທີ 22 ມິຖຸນານີ້ ເປັນຂີດໝາຍສະແດງໃຫ້ເຫັນວ່າການກໍ່ສ້າງທາງລົດໄຟສາກົນຈີນ-ລາວ ເຊິ່ງເປັນທາງລົດໄຟທົ່ວອາຊີເສັ້ນກາງໄດ້ເລີ່ມເຂົ້າສູ່ໄລຍະການປະຕິບັດຕົວຈິງ.
ອຸມົງມິດຕະພາບເປັນອຸມົງຂ້າມຊາຍແດນຈີນ-ລາວ, ມີລວງຍາວ 9,68 ກິໂລແມັດ ໃນນີ້ໄລຍະຢູ່ແດນຈີນຍາວ 7,17 ກິໂລແມັດ ແລະຢູ່ລາວຍາວ 2,51 ກິໂລແມັດ ໂດຍຈະໃຊ້ເວລາກໍ່ສ້າງ 56 ເດືອນ ແລະການຕັ້ງຊື່ວ່າ “ອຸມົງມິດຕະພາບ” ກໍເພື່ອສ່ອງແສງໃຫ້ເຫັນເຖິງມິດຕະພາບທີ່ເລິກເຊິ່ງລະຫວ່າງປະຊາຊົນສອງຊາດຈີນ-ລາວ.
ທາງລົດໄຟສາກົນຈີນ-ລາວປະກອບດ້ວຍຫຼາຍໄລຍະ ຄື ໄລຍະເມືອງຄຸນມິງຫາເມືອງຢີ້ຊີ, ເມືອງຢີ້ຊີຫາບໍ່ຫານ ແລະ ໄລຍະຢູ່ແດນລາວ ຄື ແຕ່ບໍ່ເຕັນຫານະຄອນຫຼວງວຽງຈັນ. ພ້ອມນີ້ກໍຈະເລີ່ມຍົກລະດັບທາງລົດໄຟດັ່ງກ່າວໄລຍະເມືອງຄຸນມິງຫາເມືອງຢີ້ຊີໃນປີນີ້ ແລະ ແຕ່ເມືອງຢີ້ຊີຫາບໍ່ຫານກໍພວມເລັ່ງກໍ່ສ້າງ; ສ່ວນໄລຍະຢູ່ແດນລາວທີ່ມີລວງຍາວ 418 ກິໂລແມັດ ກໍໄດ້ຈັດພິທີວາງສີລາລືກຢູ່ນະຄອນຫຼວງວຽງຈັນແລ້ວໃນເດືອນທັນວາປີ 2015 ຜ່ານມາ.
ຂ່າວຈາກ: ສຳນັກຂ່າວສານປະເທດລາວ