ກອງປະຊຸມໂຕະມົນປຶກສາຫາລືຂອງຄະນະລັດຖະມົນຕີທ່ອງທ່ຽວອາຊຽນ ໄດ້ຈັດຂື້ນໃນຕອນເຊົ້າຂອງວັນທີ 22 ມິຖຸນາ 2016 ທີ່ໂຮງ ແຮມຈຳປາສັກແກຣນ ເມືອງປາກເຊ ແຂວງຈຳປາສັກ ພາຍໃຕ້ການເປັນປະທານຂອງທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ໂດຍມີລັດຖະມົນຕີ, ຮອງລັດຖະມົນຕີຮອງເລຂາທິການໃຫຍ່ອາຊຽນ, ຫົວໜ້າສະຖາບັນການທ່ອງທ່ຽວອາຊຽນເຂົ້າຮ່ວມ.
ທ່ານ ສະຫວັນຄອນ ລາຊະມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ໄດ້ຖະແຫຼງການປາກເຊຕໍ່ສື່ມວນຊົນເຖິງຜົນສຳເລັດຂອງກອງປະຊຸມໂຕນະມົນລັດຖະມົນຕີວ່າ: ຜ່ານການປຶກສາຫາລືຮ່ວມກັນນັ້ນບັນດາລັດຖະມົນຕ ແລະຫົວໜ້າ ຄະນະຜູ້ແທນໄດ້ໃຫ້ຄຳໝັ້ນສັນຍາສະໜັບສະໜູນຊ່ວຍເຫຼືອກ່ຽວກັບວຽກງານການທ່ອງທ່ຽວ, ພາຍໃຕ້ການເປັນປະທານກອງປະຊຸມສຸດຍອດອາຊຽນຂອງ ສປປ ລາວ ໃນປີ 2016 ແລະຍິນດີໃຫ້ລາວເປັນເຈົ້າພາບຈັດກອງປະຊຸມອະນຸລັກອາຊຽນ, ຊຶ່ງຈະເປັນການສ້າງກາລະໂອກາດໃຫ້ແກ່ບັນດາຂະແໜງການຂອງລັດ ແລະພາກເອກກະຊົນໃນຊຸມຊົນທ່ອງທ່ຽວອາຊຽນກັບບັນດາເຄືອຂ່າຍຕ່າງໆ, ນອກຈາກນີ້ບັນດາລັດຖະມົນຕີ ແລະຫົວໜ້າຄະນະຜູ້ແທນ ທັງໄດ້ເນັ້ນໜັກເຖິງຄວາມສຳຄັນຂອງແຜນປະສານງານອາຊຽນ, ໃນການກຳນົດຍຸດທະສາດ, ວາງແຜນ ແລະພັດທະນາເຄືອຂ່າຍການເຊື່ອມໂຍງສາກົນຂອງແຫຼ່ງທ່ອງທ່ຽວແບບອະນຸລັກ, ໂດຍຕິດພັນກັບບັນດາທາງຜ່ານທີ່ເປັນທາງບົກ ແລະທາງນ້ຳ.
ພ້ອມດຽວກັນນີ້ບັນດາລັດຖະມົນຕີ ແລະຫົວໜ້າຄະນະຜູ້ແທນກໍ່ໄດ້ຮັບຮອງເອົາ“ ຖະແຫຼງການປາກເຊ ວ່າດ້ວຍແນວທາງຍຸດທະສາດທີ່ກ້າວໄປສູ່ການພັດທະນາວົງຈອນການທ່ອງທ່ຽວອະນຸຮັກ ແລະເຊື່ອມໂຍງເສັ້ນທາງການທ່ອງທ່ຽວ” ແລະຕົກລົງເຫັນດີທີ່ສົ່ງຖະແຫຼງການດັ່ງກ່າວ ໄປຍັງບັນດາຜູ້ນຳອາຊຽນຢູ່ກອງປະຊຸມສຸດຍອດອາຊຽນຄັ້ງທີ 28 ທີ່ນະຄອນຫຼວງວຽງຈັນ, ຊຶ່ງແມ່ນໃນບັນດາ“ ການສົ່ງມອບກຸນ ແຈຫຼັກ” ພາຍໃຕ້ການເປັນປະທານອາຊຽນຂອງ ສປປ ລາວ, ໃນເດືອນກັນຍາ 2016, ນອກຈາກນີ້ບັນດາລັດຖະມົນຕີ ແລະຫົວໜ້າຄະນະຜູ້ແທນໄດ້ຮຽກຮ້ອງໃຫ້ເຈົ້າໜ້າທີ່ອາວຸໂສທ່ອງທ່ຽວອາຊຽນສ້າງແຜນງານຮ່ວມກັນກັບຄູ່ຮ່ວມງານອາຊຽນລວມທັງອົງການຈັດຕັ້ງສາກົນ, ສູນອາຊຽນ-ຍີ່ປຸ່ນ ແລະອາຊຽນເກົາຫຼີ ແລະພາກເອກກະຊົນ.
ທີ່ມາ: 