ໃນວັນທີ22ມິຖຸນາ 2016 ທີ່ສຳນັກງານນາຍົກລັດຖະມົນຕີ, ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບ ຂອງອາສາສະໝັກຈາກປະເທດຍີ່ປຸ່ນ ທີ່ມາປະຕິບັດໜ້າທີ່ ຢູ່ ສປປ ລາວ ເຊິ່ງນຳພາເຂົ້າຢ້ຽມຂໍ່ານັບໂດຍແມ່ນ ທ່ານ ທາເກຊິ ຮິກິຮະລະ ເອກອັກຄະລັດຖະທູດຍີ່ປຸ່ນ ປະຈໍາລາວ, ທ່ານ ຢູຊູເກະ ມູລະກະມິ ຫົວໜ້າອົງການຮ່ວມມືສາກົນຍີ່ປຸ່ນ(ໄຈກາ) ປະຈໍາລາວ, ພ້ອມດ້ວຍ ອາສາສະໝັກ ຍີ່ປຸ່ນ ຫຼາຍກວ່າ 40 ທ່ານ.

ໃນໂອກາດດຽວກັນນີ້, ທ່ານນາຍົກລັດຖະມົນຕີໄດ້ສະແດງຄວາມຊົມເຊີຍ, ກ່າວຂອບຂອບໃຈ ແລະຕີລາຄາສູງຕໍ່ອາສາສະໝັກທີ່ມາຊ່ວຍເຫຼືອ ແລະ ເຮັດວຽກ ຢູ່ສປປ ລາວ ໃນຂະແໜງການ ແລະ ທ້ອງຖິ່ນຕ່າງໆ ຊຶ່ງການຊ່ວຍເຫຼືອດັ່ງກ່າວ ຖືວ່າເປັນການຊ່ວຍເຫຼືອທີ່ສຳຄັນ ທາງດ້ານວິຊາການ ໂດຍໄດ້ເນັ້ນໜັກຖ່າຍທອດຄວາມຮູ້ຄວາມສາມາດ ແລະ ເຕັກໂນໂລຊີທາງກົງ ໃຫ້ແກ່ຂະແໜງການ ແລະ ທ້ອງຖິ່ນ ອັນເປັນການປະກອບສ່ວນ ໃນການພັດທະນາເສດຖະກິດ-ສັງຄົມ ຂອງສປປ ລາວມີການເຕີບໂຕຢ່າງຕໍ່ເນື່ອງ, ປະເທດໄດ້ຮັບການພັດທະນາເປັນກ້າວໆ.ພ້ອມທັງສະແດງຄວາມເຊື່ອໝັ້ນວ່າອາສາສະໝັກທັງໝົດທີ່ມາປະຕິບັດວຽກງານຢູ່ໃນສປປລາວຈະສາມາດຜ່ານຜ່າຂໍ້ຫຍຸ້ງຍາກຕ່າງໆແລະເຮັດສຳເລັດໜ້າທີ່ຕາມຄວາມຮັບຜິດຊອບຂອງຕົນເປັນຢ່າງດີ.