ກ່ອນຈະເວົ້າເຖິງແບຣນ imoo ເຮົາມາເວົ້າເຖິງບໍລິສັດ BBK Electronics ກັນກ່ອນ. ສຳລັບໃຜທີ່ຍັງບໍ່ຮູ້ ບໍລິສັດ BBK ນີ້ແຕ່ກ່ອນແມ່ນເຄີຍຮັບຈ້າງຜະລິດເກມບອຍໃຫ້ກັບບໍລິສັດ Nintendo ມາກ່ອນ ແລະກໍເຄີຍຜະລິດເຄື່ອງຫຼິ້ນວີຊີດີ-ດີວີດີຊື່ດັງໃນປະເທດຈີນອີກນຳ, ເຊິ່ງຕອນນີ້ແມ່ນມີບົດບາດສຳຄັນຫຼາຍໃນຕະຫຼາດສະມາດໂຟນໃນປັດຈຸບັນເພາະ BBK ເປັນບໍລິສັດແມ່ ທີ່ມີແບຣນລູກເປັນແບຣນຊື່ດັງທີ່ເຮົາຮູ້ຈັກກັນດີບໍ່ວ່າຈະເປັນ Vivo, Oppo, OnePlus ແລະອື່ນໆ.
ໂດຍຫຼ້າສຸດນີ້ເອງກໍໄດ້ເປີດໂຕແບຣນ “imoo” ທີ່ມຸ້ງເນັ້ນໄປທີ່ສະມາດໂຟນເພື່ອການສຶກສາເປັນຫຼັກ, ແຕ່ນີ້ກໍບໍ່ໄດ້ໝາຍເຖິງຈະເປັນຕະຫຼາດໃໝ່ຂອງທາງບໍລິສັດ ເພາະບໍລິສັດກໍເຄີຍເຮັດຂອງຫຼິ້ນເພື່ອການສຶກສາສຳລັບເດັກນ້ອຍມາກ່ອນແລ້ວ ແລະຈຸດນີ້ເອງຈຶ່ງໝັ້ນໃຈໄດ້ວ່າບໍລິສັດຈະນຳເອົາປະສົບການທາງດ້ານການສຶກສາ ແລະສະມາດໂຟນມາລວມເຂົ້າກັນເປັນ “ສະມາດໂຟນເພື່ອການສຶກສາ” ພາຍໃຕ້ແບຣນ imoo ໄດ້ດີຢ່າງແນ່ນອນ.
ທາງດ້ານແບຣນນ້ອງໃໝ່ imoo ກໍໄດ້ປ່ອຍຮູບຕົວຢ່າງໂທລະສັບລຸ້ນທຳອິດຂອງແບຣນອອກມາ, ແຕ່ກໍບໍ່ມີລາຍລະອຽດບອກກ່ຽວກັບໂທລະສັບເລີຍ. ແຕ່ເຮົາກໍສາມາດຮູ້ໄດ້ຈາກຮູບຄື ໂຕເຄື່ອງແມ່ນມີຮູບຮ່າງທີ່ບາງ, ຂອບເປັນໂລຫະ ແລະໂຕເຄື່ອງສີທອງ. ສ່ວນໂທລະສັບລຸ້ນດັ່ງກ່າວນີ້ແມ່ນຈະປະກາດເປີດໂຕຢ່າງເປັນທາງການໃນວັນທີ 24 ມິຖຸນາທີ່ຈະຮອດນີ້.
ທີ່ມາ:gizmochina,ເດັກລາວ