ກອງປະຊຸມຊີແອວເອັມທີ 2016 ປະກອບມີ ກໍາປູເຈຍ, ລາວ, ມຽນມາ, ຫວຽດນາມ ແລະ ໄທ (CLMVT Forum 2016) ໄດ້ຮ່ວມກັນປຶກສາຫາລືດ້ານການຄ້າ, ການລົງທຶນ ແລະ ການທ່ອງທ່ຽວເພື່ອສ້າງຄວາມເຂັ້ມແຂງທາງເສດຖະກິດ ແລະ ການພັດທະນາໃນພູມີພາກອາຊຽນໃຫ້ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ ເຊິ່ງກອງປະຊຸມດັ່ງກ່າວນີ້ໄດ້ຈັດຂຶ້ນໃນລະຫວ່າງວັນທີ 16-17 ມິຖຸນາຜ່ານມາ ທີ່ໂຮງແຮມດູສິດທານີ ນະຄອນຫລວງ ບາງກອກ ລາຊະອານາຈັກໄທ.
ກອງປະຊຸມດັ່ງກ່າວມີຄະນະຜູ້ແທນ, ບັນດາລັດຖະມົນ ແລະ ຮອງລັດຖະມົນຕີ ຈາກ 5 ປະເທດ ແລະ ຕົວແທນພາກລັດ ແລະ ພາກທຸລະກິດໃນຂະແໜງການຕ່າງໆ ພ້ອມເຈົ້າໜ້າທີ່ກ່ຽວຂ້ອງເຂົ້າຮ່ວມປະມານ 1 ພັນຄົນເຂົ້າຮ່ວມ, ນອກຈາກນີ້ຍັງມີພາກທຸລະກິດທີ່ເຂົ້າຮ່ວມສັງເກດການປະກອບມີ: ຍີ່ປຸ່ນ, ສປ ຈີນ, ສະຫະພາບເອີຣົບ, ສະຫະລັດອາເມລິກາ ແລະ ອື່ນໆ, ເຊິ່ງຜົນຂອງການປະຊຸມໄດ້ເຫັນດີເປັນເອກະພາບພິຈາລະນາ ແລະ ຮັບຮອບບັນຫາສໍາຄັນດັ່ງນີ້: ສົ່ງເສີມການຈັດຕັ້ງສະພາບທຸລະກິດ 5 ປະເທດ (CLMVT Business Council) ເປັນໜ່ວຍງານສະເພາະກິດ ຫລື (ad hoc) ເພື່ອແກ້ໄຂບັນຫາທາງດ້ານການຄ້າໂດຍໃຫ້ພາກເອກະຊົນມີສ່ວນຮ່ວມໃນການຈັດຕັ້ງປະຕິບັດ ໂດຍສະເພາະປະເທດຕ່າງໆທີ່ມີຊາຍແດນຕິດຈອດດ້ານການຄ້າຊາຍແດນລະຫວ່າງປະເທດ; ພັດທະນາແຫລ່ງຄວາມຮູ້ “Knowledge Tank” ເປັນຖານຂໍ້ມູນເສດຖະກິດການຄ້າຮອບດ້ານທີ່ເປັນ one-stop data platform ທີ່ຜູ້ໃຊ້ບໍລິການສາມາດເຂົ້າເຖິງໄດ້ງ່າຍ; ລິເລີ່ມໂຄງການພັດທະນາຊັບພະຍາກອນມະນຸດພາຍໃຕ້ການຮ່ວມມືກັບປະເທດທີ່ພັດທະນາແລ້ວ; ເລີ່ມຕົ້ນໂຄງການເພື່ອສົ່ງເສີມການຮ່ວມມືໃນການພັດທະນາ ແລະ ເພີ່ມມູນຄ່າສິນຄ້າກະສິກຳ ແລະ ຫັດຖະກຳຮ່ວມກັນ ໂດຍໄທກໍຄືບັນດາປະເທດເຫັນດີໃຫ້ການຮ່ວມມືຊ່ວຍເຫລືອເຊິ່ງກັນ ແລະ ກັນເປັນຢ່າງດີ; ສົ່ງເສີມການຈັດຕັ້ງເວທີ “CLMVT Startups Forum” ເພື່ອສ້າງບັນຍາກາດການລົງທຶນລະຫວ່າງ Startups ກັບນັກລົງທຶນພາກເອກະຊົນຂອງບັນດາປະເທດຕ່າງໆ; ລິເລີ່ມໂຄງການແລກປ່ຽນຂໍ້ມູນການທ່ອງທ່ຽວ “Tourism Data Exchange” ເພື່ອແລກປ່ຽນຂໍ້ມູນຂ່າວສານດ້ານການທ່ອງທ່ຽວລະຫວ່າງ 5 ປະເທດ ເຊັ່ນ: ຈຳນວນນັກທ່ອງທ່ຽວ, ການສ້າງລາຍໄດ້ຈາກຂະແໜງການບໍລິການຕ່າງໆ ໂດຍຕໍ່ຍອດຈາກ “Thailand Tourism Gateway” ເພື່ອໃຫ້ພາກເອກະຊົນ 5 ປະເທດ ສາມາດນໍາໃຊ້ສະຖິຕິນຳໄປເປັນຜົນປະໂຫຍດໄດ້; ລິເລີ່ມໂຄງການ “Thailand Tourism Gateway” ເພື່ອໃຫ້ສາມາດບໍລິຫານຈັດການໃຫ້ແກ່ນັກທ່ອງທ່ຽວທີ່ເດີນທາງໄປທ່ຽວໃນປະເທດນັ້ນໆ ໂດຍເນັ້ນໃຫ້ມີການດຶງດູດລູກຄ້າຈາກພູມີພາກອາຊຽນ; 8. ການລິເລີ່ມໂຄງການ “CLMVT Local Trail” ເພື່ອເປີດບໍລິການຕົວເມືອງທ່ອງທ່ຽວໃໝ່ໃນການຮອງຮັບນັກທ່ອງທ່ຽວທີ່ກຳລັງ ເພີ່ມຂຶ້ນໃນປັດຈຸບັນ ແລະ ເຮັດໃຫ້ປະຊາຊົນໄດ້ຮັບຜົນປະໂຫຍດຈາກການທ່ອງທ່ຽວ ແລະ ຈຸດເລີ່ມຕົ້ນໃນການສ້າງການຮ່ວມມືຂອງ 5 ປະເທດ ຫລື “CLMVT Forum 2016: Towards a Shared Prosperity” ໂດຍທຸກຝ່າຍຈະຊ່ວຍກັນຊຸກຍູ້ໃຫ້ເກີດເວທີສົນທະນາ, ການສ້າງເຄືອຂ່າຍ ແລະ ນຳເອົາທິດທາງຈາກການປະຊຸມຄັ້ງນີ້ນຳໄປຫາລືກັນອີກໃນປີໜ້າທີ່ປະເທດກຳປູເຈຍ.
ສໍາລັບປີ 2017, ປະເທດກຳປູເຈຍຈະໄດ້ຮັບກຽດເປັນເຈົ້າພາບຈັດກອງປະຊຸມດັ່ງກ່າວ, ສ່ວນ ສປປ ລາວ ຈະໄດ້ເປັນເຈົ້າພາບພາຍໃນປີ 2018.
ທີ່ມາ: ສຳນັກຂ່າສານປະເທດລາວ