ພິທີຖະແຫຼງຂ່າວການກະກຽມຈັດກິດຈະກຳຍ່າງແລ່ນ ເພື່ອສຸຂະພາບ 3 ຊາດ ລາວ ໄທ ແລະ ສສ ຫວຽດນາມ ໄດ້ມີຂຶ້ນວັນທີ 15 ມິຖຸນາ 2016 ທີ່ ຄະນະກຳມະການໂອແລມປິກແຫ່ງຊາດລາວ (ຄອລ) ໂດຍມີທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກີລາ ທັງເປັນຮອງປະທານ ແລະ ເລຂາທິການຄະນະກຳມະການໂອແລມປິກແຫ່ງຊາດລາວ ມີທ່ານ ຈັນທອນ ວົງແພງຄຳ ຫົວໜ້າຫ້ອງການປະສາງານ ຄອລ ພ້ອມດ້ວຍບັນດາຫົວໜ້າກົມທີ່ກ່ຽວຂ້ອງ ແລະ ຄະນະບໍລິຫານງານ ຄອລ ຜູ້ຕາງໜ້າບໍລິສັດ ເບຍລາວ ຈຳກັດ ແລະ ຜະລິດຕະພັນເຄື່ອງກີລາຍີ່ຫໍ້ ເອັຟບີທີ ຈາກປະເທດໄທ ຕະຫຼອດຮອດພະນັກງານວິຊາການ ແລະ ສື່ມວນຊົນທຸກຂະແໜງເຂົ້າຮ່ວມ.
ທ່ານ ສົມພູ ພົງສາ ກໍ່ໄດ້ຍົກໃຫ້ເຫັນມູນເຊື້ອປະຫວັດຄວາມເປັນມາ ຂອງການສ້າງຕັ້ງວັນໂອແລມປິກສາກົນ ກໍ່ຄື ໃນສັດຕະວັດທີ 19 ແຕ່ປີ 1892 ທ່ານ ປິແອ ເດີກູແບກແຕ໋ງ ນັກສຶກສາສາດ ຊາວຝຣັ່ງ ໄດ້ຄົ້ນຄວ້າປະຫວັດການເປັນມາ ແລະ ຄວາມສຳຄັນຂອງກີລາໂອແລມປິກບູຮານ ເຫັນວ່າກີລາໂອແລມປິກ ມີປັດຊະຍາຂອງຊີວິດເພາະມັນ ໄດ້ຍົກສູງຄຸນນະພາບທາງດ້ານຮ່າງກາຍ ແລະ ຈິດໃຈ ເປັນການປະກອບສ່ວນສ້າງສັນຕິພາບ ແລະ ຄວາມສະຫງົບສຸກໃນສັງຄົມ ມີຄວາມເປັນເອກະພາບ ສະເໝີພາບ ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ມີຄວາມເປັນເອກະລາດ ມີຄວາມເປັນທຳ ແລະ ບໍ່ມີການຈຳແນກເຊື້ອຊາດ ກໍ່ຄື ສາສະໜາ ການເມືອງ ແລະ ອື່ນໆ ດັ່ງນັ້ນ ໃນປີ 1894 ໄດ້ມີການຟື້ນຟູກີລາໂອແລມປິກໃໝ່ ໂດຍການປັບປຸງນິຕິກຳເກົ່າຂອງນັກກີລາໂອແລມປິກ ແລະ ສ້າງຕັ້ງໂຄງຮ່າງການຈັດຕັ້ງ ແລະ ກົງຈັກການຄຸ້ມຄອງນັກກີລາໂອແລມປິກຂຶ້ນ ໃນວັນທີ 23 ມິຖຸນາ 1986 ເປັນຕົ້ນມາ ແລະ ໄດ້ສືບຕໍ່ມາຈົນເຖິງປັດຈຸບັນເຊິ່ງທຸກໆ 4 ປີ ຈະມີການແຂ່ງຂັນຕະຫຼອດ.
ເພື່ອເປັນການລະນຶກເຖິງວັນກຳເນີດວັນສຳຄັນດັ່ງກ່າວ ຄະນະກຳມະການໂອແລມປິກ 206 ປະເທດ ທີ່ເປັນສະມາຊິກ ໄດ້ພ້ອມກັນຈັດກິດຈະກຳ ໂດຍກຳນົດເອົາວັນທີ 23 ມິຖຸນາ ເປັນວັນສຳຄັນ ແລະ ປີນີ້ ສປປ ລາວ ໄດ້ຮ່ວມກັບໄທ ແລະ ສສ ຫວຽດນາມ ຈັດຍ່າງ-ແລ່ນເພື່ອສຸຂະພາບ ເປັນຄັ້ງທີ 4 ແລ້ວ ເຊິ່ງຄັ້ງທີ 1 ຈັດໃນປີ 2001 ທີ່ຂົວມິດຕະພາບ ລາວ-ໄທ 1 ນະຄອນຫຼວງວຽງຈັນ ຄັ້ງທີ 2 ຈັດຢູ່ຂົວມິດຕະພາບ ລາວ-ໄທ 2 ທີ່ສະຫວັນນະເຂດ ເມື່ອປີ 2007 ຄັ້ງທີ 3 ຈັດຢູ່ຂົວມິດຕະພາບ ລາວ-ໄທ 3 ແຂວງຄຳມ່ວນ ປີ 2012 ແລະ ຄັ້ງທີ 4 ປີນີ້ ກໍ່ຈະຈັດຢູ່ຂົວມິດຕະພາບ ລາວ-ໄທ 4 ທີ່ແຂວງບໍ່ແກ້ວ.
ໃນພິທີ ທ່ານ ຈັນສະໝອນ ຜ່ອງຈັນທາ ຫົວໜ້າຝ່າຍການຕະຫຼາດບໍລິສັດ ເບຍລາວ ຈຳກັດ ກໍ່ໄດ້ມອບເງິນຈຳນວນ 70 ລ້ານກີບ ແລະ ຜະລິດຕະພັນເຄື່ອງກີລາ ເອັຟບີທີ ມອບເສື້ອ ຈຳນວນ 500 ຜືນໃຫ້ ຄອລ ເພື່ອນຳໄປຈັດການແຂ່ງຂັນໃນງານມື້ນັ້ນ ສຳລັບກິດຈະກຳຍ່າງ-ແລ່ນເພື່ອສຸຂະພາບຄັ້ງນີ້ ສປປ ລາວ ເຮົາໄດ້ສົ່ງນັກກີລາເຂົ້າຮ່ວມທັງໝົດ 1.200 ຄົນ ໄທ 7.000 ຄົນ ແລະ ສສ ຫວຽດນາມ 100 ຄົນ ສ່ວນໄລຍະທາງໃນການຍ່າງ-ແລ່ນ ແມ່ນຈະໃຊ້ເສັ້ນທາງລະຫວ່າງຝັງ ລາວ-ໄທ ກໍ່ຄື ເມືອງຫ້ວຍຊາຍ ແຂວງບໍ່ແກ້ວ ສປປ ລາວ ແລະ ແຂວງຊຽງຮາຍ ຣາຊະອານາຈັກໄທ ດ້ວຍໄລຍະທາງ 10 ກິໂລແມັດ.
ທີ່ມາ: http://www.vientianemai.net/khao/16047.html