ອີງຕາມການເຊື້ອເຊີນຂອງການນຳແຂວງຢຸນນານ ກໍ່ຄືຄະນະກຳມະການຈັດງານວາງສະແດງສິນຄ້າ ຈີນ-ອາຊີໃຕ້ ຄັ້ງທີ 4 ແລະ ງານຕະຫຼາດນັດຄຸນໝິງ ຄັ້ງທີ 24. ດັ່ງນັ້ນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະຜູ້ແທນຂັ້ນສູງຂອງລາວ ໄດ້ເດີນທາງໄປຮ່ວມງານດັ່ງກ່າວ ໃນລະຫວ່າງວັນທີ 11-17 ມິຖຸນາ 2016 ທີ່ນະຄອນຄຸນໝິງ ແຂວງຢຸນນານ ສປ ຈີນ.
ເຊິ່ງງານດ່ັງກ່າວໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 12 ມິຖຸນານີ້ ທີ່ສູນກາງວາງສະແດງສາກົນໜອງແຊ່ ນະຄອນຄຸນໝິງ ມີ ທ່ານ ວາງຢາງ ຮອງນາຍົກລັດຖະມົນຕີ ແຫ່ງ ສປ ຈີນ ແລະ ບັນດາຄະນະຜູ້ແທນຈາກປະເທດຕ່າງໆເຂົ້າຮ່ວມ.
ຢ່າງຫລວງຫລາຍ ເພື່ອ ເປັນເວທີສຳຄັນ ໃນການເສີມຂະຫຍາຍການຮ່ວມມືທາງດ້ານການຕ່າງປະເທດ, ເສດຖະກິດ-ການຄ້າ ແລະ ການແລກປ່ຽນວັດທະນະທຳ ແລະ ການພັດທະນາ ລະຫວ່າງ ຈີນ ກັບບັນດາປະເທດອາຊີໃຕ້, ອາຊີຕາເວັນອອກສ່ຽງໃຕ້ ແລະ ບັນດາປະເທດໃນພາກພື້ນຕ່າງໆຂອງ ເຊິ່ງໃນປີນີ້, ສູນກາງວາງສະແດງສິນຄ້າດ່ັງກ່າວ ສາມາດຮອງຮັບ 89 ປະເທດເຂົ້າຮ່ວມວາງສະແດງ ລວມມີ 5 ພັນກວ່າວິສາຫະກິດ. ສຳລັບ ສປປ ລາວ 43 ບໍລິສັດ ເຂົ້າຮ່ວມລວມເປັນ 102 ຫ້ອງວາງສະແດງມີມູນຄ່າເກືອບ 1 ລ້ານໂດລາສະຫະລັດ ທຽບໃສ່ປີຜ່ານມາ ເພີ່ມຂຶ້ນກວ່າ 2 ເທົ່າ ເຊິ່ງລວມມີ ຜະລິດຕະພັນສິນຄ້າທີ່ເປັນເອກະລັກຂອງລາວຫຼາຍຊະນິດ ທີ່ຄາດວ່າຈະເປັນທີ່ຍອມຮັບ ແລະ ແທດເໝາະກັບຄວາມຕ້ອງການຂອງຜູ້ຊົມໃຊ້ຊາວຈີນ.
ໂອກາດນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ມີຄຳເຫັນວ່າ: ປີນີ້ ເປັນປີຄົບຮອບ 55 ປີການສ້າງຕັ້ງສາຍພົວພັນການທູດ ລາວ-ຈີນ ແລະ ເປັນປີທີ່ ສປປ ລາວ ໄດ້ຮັບກຽດເປັນປະທານອາຊຽນ. ບົນຈິດໃຈດັ່ງກ່າວ, ສປປ ລາວ ຈະໃຊ້ທຸກຄວາມພະຍາຍາມຂອງຕົນ ເພື່ອປະກອບສ່ວນເຂົ້າໃນການດແໜ້ນ ແລະ ເສີມຂະຫຍາຍການພົວພັນຮ່ວມມືທີ່ດີ ລະຫວ່າງ ສປປ ລາວ ກັບ ສປ ຈີນ ກໍ່ຄືອາຊຽນ ກັບ ສປ ຈີນ ໃຫ້ນັບມື້ນັບແຕກດອກອອກຜົນຍິ່ງຂຶ້ນກວ່າເກົ່າ. ແລະ ກໍ່ເຫັນວ່າ ໃນຊຸມປີຜ່ານມາ ການພົວພັນຮ່ວມມືລະຫວ່າງ ລາວ ກັບແຂວງຢຸນນານ ມີຄວາມຄືບໜ້າຢ່າງເພິ່ງພໍໃຈ ໂດຍສະເພາະ ໃນປີ 2015 ການຄ້າ-ການລົງທຶນສອງຝ່າຍ ບັນລຸໄດ້ກວ່າ 880 ລ້ານໂດລາສະຫະລັດ, ມາຮອດຕົ້ນປີ 2016 ນີ້ ກໍ່ມີວິສາຫະກິດຂອງແຂວງຢຸນນານເທົ່ານັ້ນ ໄປລົງທຶນຢູ່ລາວ 200 ກວ່າບໍລິສັດ ຄິດເປັນມູນຄ່າກວ່າ 4 ຕື້ໂດລາສະຫະລັດ ແລະ ຈັດຕັ້ງປະຕິບັດໄປແລ້ວເກືອບ 2 ຕື້ໂດລາສະຫະລັດ ຊຶ່ງເຮັດໃຫ້ລາວ ກາຍເປັນຕະຫຼາດເປົ້າໝາຍການລົງທຶນຕ່າງປະເທດອັນດັບໜຶ່ງ ຂອງແຂວງຢຸນນານ. ປັດຈຸບັນ, ສປປ ລາວ ພວມດຳເນີນການກໍ່ສ້າງເສັ້ນທາງລົດໄຟເຊື່ອມຈອດ ລາວ-ຈີນ ເພື່ອຜັນຂະຫຍາຍນະໂຍບາຍຂອງລາວ ທີ່ວ່າ “ການຫັນຈາກປະເທດທີ່ບໍ່ມີຊາຍແດນຕິດຈອດກັບທະເລ ມາເປັນປະເທດເຊື່ອມໂຍງກັບພາກພື້ນ” ແລະ ຍຸດທະສາດ “ໜຶ່ງແລວທາງ ໜຶ່ງເສັ້ນທາງ” ຂອງ ສປ ຈີນ ໃຫ້ເປັນຮູບປະທຳເທື່ອລະກ້າວ ອັນຈະເປັນຜົນດີ ໃຫ້ແກ່ການເຊື່ອມຈອດໃນພາກພື້ນ, ການເພີ່ມທະວີທາງດ້ານການຄ້າ-ການຮ່ວມມື ລະຫວ່າງ ລາວກັບຈີນ ກໍ່ຄືບັນດາປະເທດອື່ນໆໃນພາກພື້ນ. ດ້ວຍທ່າແຮງຫຼາຍດ້ານຂອງ ສປປ ລາວ ທີ່ມີທີ່ຕັ້ງຢູ່ຈຸດໃຈກາງຂອງ 5 ປະເທດ, ດ້ານການເມືອງ ກໍ່ມີສະຖຽນລະພາບອັນໜັກແໜ້ນ, ມີນະໂຍບາຍເປີດກວ້າງການລົງທຶນຂອງຕ່າງປະເທດ, ມີຊັບພະຍາກອນທຳມະຊາດ ທີ່ອຸດົມສົມບູນ ແລະ ແຫຼ່ງທ່ອງທ່ຽວທຳມະຊາດ ທີ່ສວຍສົດງົດງາມ ທ່ານຮອງນາຍົກລັດຖະມົນຕີ ສອນໄຊ ສີພັນດອນ ກໍ່ໄດ້ເຊີນຊວນບັນດາເພື່ອນມິດ ຈາກ ສປ ຈີນ ແລະ ປະເທດຕ່າງໆ ໄປຢ້ຽມຢາມ ແລະ ສຶກສາຄົ້ນຄວ້າກາລະໂອກາດ ໃນການລົງທຶນຢູ່ປະເທດລາວ.
ການເດີນທາງມາຮ່ວມມງານຂອງຄະນະຜູ້ແທນລາວ ໃນຄັ້ງນີ້, ກໍ່ໄດ້ຮັບການຕ້ອນຮັບຢ່າງອົບອຸ່ນຂອງ ທ່ານ ເສິນຮາວ ເຈົ້າແຂວງໆຢຸນນານ ແລະ ຄະນະພັກ-ຄະນະນຳຂອງແຂວງ ເຊິ່ງຕ່າງຝ່າຍ ຕ່າງກໍ່ໄດ້ຕີລາຄາສູງ ຕໍ່ສາຍພົວພັນການເປັນຄູ່ຮ່ວມມືຍຸດທະສາດລະຫວ່າງ ລາວ-ຈີນ ກໍ່ຄື ສປປ ລາວ ກັບແຂວງຢຸນນານ ທີ່ນັບມື້ນັບຂະຫຍາຍຕົວຂຶ້ນ ແລະ ຕ່າງກໍ່ມີບົດບາດຫຼາຍຂຶ້ນ ໃນພາກພື້ນ ແລະ ເວທີສາກົນ. ພ້ອມກັນນີ້, ກໍ່ໄດ້ໃຫ້ການຮ່ວມມືຊ່ວຍເຫຼືອ ແກ່ ສປປ ລາວ ໂດຍສະເພາະ ບັນດາແຂວງພາກເໜືອຂອງລາວ ຕະຫຼອດຫຼາຍປີທີ່ຜ່ານມາ; ດ້ານການລົງທຶນຂອງວິສາຫະກິດຈີນຢູ່ລາວ ກໍ່ຖືໄດ້ວ່າເປັນອັນດັບໜຶ່ງຂອງການລົງທຶນຕ່າງປະເທດ. ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຫວັງວ່າ ແຂວງຢຸນນານ ຈະສືບຕໍ່ສະໜັບສະໜູນຊ່ວຍເຫຼືອ ສປປ ລາວ ກໍ່ຄືບັນດາແຂວງພາກເໜືອຂອງລາວ ທັງດ້ານການຮ່ວມມືການລົງທຶນ ແລະ ພັດທະນາພື້ນຖານໂຄງລ່າງ, ການຮ່ວມມືສົ່ງເສີມດ້ານການຜະລິດກະສິກຳ, ການສ້າງເງື່ອນໄຂສະດວກ ໃຫ້ແກ່ການສົ່ງອອກສິນຄ້າກະສິກຳຂອງລາວໄປຈີນ ແລະ ການປັບປຸງລະບົບພື້ນຖານການຂົນສົ່ງບໍລິເວນຊາຍແດນສາມປະເທດຕິດດຈອດ ຈີນ, ລາວ ແລະ ໄທ. ໃນນຕອນທ້າຍ, ທ່ານ ສອນໄຊ ສີພັນດອນ ຍັງໄດ້ເຊື້ອເຊີນ ທ່ານ ເສິນຮາວ ແລະ ຄະນະນຳແຂວງຢຸນນານ ໄປຢ້ຽມຢາມ ສປປ ລາວ ເພື່ອເຫັນໄດ້ໝາກຜົນຂອງການຮ່ວມມື ແລະ ການລົງທຶນຢູ່ລາວ ລວມເຖິງ ການສຶກສາກາລະໂອກາດ ແລະ ທ່າແຮງຂອງລາວ ເພື່ອດຶງດູດການລົງທຶນຂອງວິສາຫະກິດຈີນ.
ນອກຈາກນີ້, ທ່ານ ສອນໄຊ ສີພັນດອນ ແລະ ຄະນະ ຍັງໄດ້ໄປຢ້ຽມຢາມສະຖານກົງສຸນໃຫຍ່ຂອງລາວ ປະຈຳນະຄອນຄຸນໝິງ ເຊິ່ງມີ ທ່ານ ບຸນລຽບ ຮຸ່ງວົງສອນ ກົງສຸນໃຫຍ່ ແລະ ພະນັກງານ ໃຫ້ການຕ້ອນຮັບ ພ້ອມນີ້,ກໍ່ໄດ້ລາຍງານໃຫ້ຊາບເຖິງສະພາບການຈັດຕັ້ງປະຕິບັດວຽກງານຂອງກົງສຸນແຫ່ງນີ້ ໃນໄລຍະຊຸມປີທີ່ຜ່ານມາ. ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາໝາກຜົນ ແລະ ຜົນງານ ທີ່ບັນດາພະນັກງານຂອງກົງສຸນແຫ່ງນີ້ ຍາດມາໄດ້ໃນໄລຍະຜ່ານມາ ບໍ່ວ່າຈະເປັນການປະກອບສ່ວນຢ່າງຕັ້ງໜ້າ ຕໍ່ການເສີມຂະຫຍາຍສະພົວພັນ ແລະ ການຮ່ວມມືຂອງສອງປະເທດ ລາວ-ຈີນ ກໍ່ຄື ສປປ ລາວ ກັບແຂວງຢຸນນານ ທີ່ນັບມື້ນັບແຕກດອກອອກຜົນ, ການຄຸ້ມຄອງນັກສຶກສາ ແລະ ຄົນລາວ ທີ່ດຳລົງຊີວິດຢູ່ແຂວງຢຸນນານ. ນອກນີ້, ທ່ານຮອງນາຍົກລັດຖະມົນຕີ ຍັງໄດ້ຍົກບາງສະພາບການທີ່ພົ້ນເດັ່ນ ທີ່ເກີດຂຶ້ນໃນ ສປປ ລາວ ແລະ ບາງບັນຫາ ທີ່ສອງຝ່າຍ ລາວ ແລະ ແຂວງຢຸນນານ ຕ້ອງໄດ້ພ້ອມກັນສືບຕໍ່ຮ່ວມມືກັນຢ່າງແໜ້ນແຟ້ນ ແລະ ຫວັງຢ່າງຍິ່ງວ່າ ທ່ານກົງສຸນໃຫຍ່ ແລະ ພະນັກງານທຸກຄົນພາຍໃນກົງສຸນ ຈະພ້ອມພຽງກັນ ເຮັດສຳເລັດໜ້າທີ່ ທີ່ພັກ-ລັດ ມອບໝາຍໃຫ້.
ທີ່ມາ: ລາວພັດທະນາ