ໄລຍະຫຼາຍປີທີີ່ຜ່ານມາຈົນຮອດປັດຈຸບັນ ເປັນໄລຍະທີ່ປະເທດຊາດ ກໍຄືເສດຖະກິດ-ສັງຄົມຂອງລາວ ເຕີບໃຫຍ່ຂະຫຍາຍຕົວກວ່າເວລາໃດໆ ໝົດ ຖື້ນຖານໂຄງລ່າງຂອງປະເທດຂະຫຍາຍຕົວພໍສົມຄວນ ປະຊາຊົນມີຊີວິດການເປັນຢູ່ທີ່ດີ ສະແດງອອກບ່ອນວ່າ ມີຖະໜົນຫົນທາງ, ໂຮງໝໍ, ໂຮງຮຽນ, ໄຟຟ້າ, ນ້ຳປະປາ, ໂທລະຄົມ… ພາຫະນະຕາມທ້ອງຖະໜົນຫຼວງຢ່າງຫຼວງຫຼາຍ ແລະເມື່ອມີທາງ-ມີລົດສິ່ງທີ່ຕາມມານັ້ນກໍຄື ອຸບັດເຫດ ຕາມທ້ອງຖະໜົນໄດ້ເກີດຂຶ້ນຢ່າງຕໍ່ເນື່ອງ ແລະມີຫຼາຍຂຶ້ນເລື້ອຍໆ.
ບັນຫາໜຶ່ງທີ່ພົ້ນເດັ່ນທີ່ສຸດໃນເວລານີ້ກໍຄື ການຕຳແລ້ວໜີ ເອົາໂຕລອດໂດຍບໍ່ຮັບຜິດຊອບຕໍ່ເຫດທີ່ເກີດຂຶ້ນ ຂາດຄຸນນະທຳທາງດ້ານຈິດໃຈ ຂາດຄວາມເກັງກົວກົດໝາຍ ເກີດເຫດຕຳແລ້ວໜີແລ້ວ ຍາກທີ່ຈະນຳໂຕຄູ່ກໍລະນີດັ່ງກ່າວມາຮັບຜິດຊອບໄດ້ ອັນນີ້ມັນເປັນຍ້ອນຫຍັງ?
ມື້ວານນີ້, ວັນທີ 19 ມິຖຸນາ 2016 ເວລາປະມານ 17:25 ນາທີ ຢູ່ນະຄອນຫຼວງວຽງຈັນ ໄດ້ມີເຫດການລົດຕຳແມ່ມານ ແລ້ວໜີ ເຊິ່ງໄດ້ຮັບການຊ່ວຍເຫຼືອຈາກ ມູນນິທິ ກູ້ໄພ ນາຄາ. ເຫດການດັ່ງກ່າວ ສະທ້ອນໃຫ້ເຫັນຈິດໃຈຂອງຜູ້ຂັບຂີ່ຈຳນວນໜຶ່ງ ທີ່ຂາດຄຸນນະທຳ ແລະບໍ່ຢ້ານກົວຕໍ່ກົດໝາຍ.
ຜູ້ຂຽນຮູ້ວ່າ ທາງພາກສ່ວນລັດທີ່ກ່ຽວຂ້ອງ ໂດຍສະເພາະແມ່ນໜ່ວຍງານປ້ອງກັນຄວາມສະຫງົບ ແລະສະເພາະລົງໄປອີກແມ່ນ ພາກສ່ວນຕຳຫຼວດຈະລາຈອນ ພວມຂຸ້ນຂ້ຽວຄົ້ນຄວ້າເພື່ອຈະແກ້ໄຂບັນຫາດັ່ງກ່າວຢູ່ ແຕ່ກໍເຫັນວ່າຍັງບໍ່ສາມາດແກ້ໄຂປາກົດການດັ່ງກ່າວໄດ້ພໍທໍ່ໃດ ຜົນງານການຈັບໂຕຜູ້ຕຳແລ້ວໜີບໍ່ຄ່ອຍໂດດເດັ່ນ.
ຜູ້ຂຽນຢາກຮຽກຮ້ອງໃຫ້ລັດເອົາໃຈໃສ່ເພື່ອແກ້ໄຂບັນຫານີ້ຢ່າງຈິງຈັງດ່ວນ ໂດຍເອົາໃຈໃສ່ບາງບັນຫາດັ່ງນີ້:
1. ເອົາໃຈໃສ່ຟື້ນຟູຄຸນນະທຳປະຈຳໃຈໃຫ້ແກ່ຄົນລາວຫຼາຍຂຶ້ນກວ່າທີ່ເປັນຢູ່ ເພາະສັງເກດເຫດວ່າເລື່ອງນີ້ຄົນລາວເລິ່ມຫ່າງເຫີນຂຶ້ນເລື້ອຍໆ ແຕ່ຈະຫັນໄປເນັ້ນວິທີຫາເງິນຫຼາຍຂຶ້ນ, ບັນດາງານສຳມະນາຄວນຈະເອົາເລື່ອງຄຸນນະທຳເຂົ້າໄປເປັນສ່ວນປະກອບໃຫ້ຫຼາຍຂຶ້ນ. ໃນຂະນະດຽວກັນ ຕ້ອງອອກລະບຽບການໃຫ້ ໂຮງຮຽນສອນຂັບລົດຕ້ອງມີພາກທິດສະດີກ່ຽວກັບຄຸນນະທຳ ໂດຍໃຫ້ກະຊວງສຶກສາເປັນຜູ້ຄົ້ນຄວ້າປຶ້ມແບບຮຽນນີ້ ພ້ອມທັງເຜີຍແພ່ກົດໝາຍໄປພ້ອມໆ ກັນ.
2. (ຖ້າມີງົບປະມານ) ລັດຖະບານອາດຈະຕິດກ້ອງວົງຈອນປິດໃສ່ຕາມເສັ້ນທາງຕ່າງໆ ເມື່ອເກີດເຫດຂຶ້ນມາຈະໄດ້ນຳຈັບໂຕຄູ່ກໍລະນີໄດ້ງ່າຍຂຶ້ນ.
3. ເພິ່ມດອກໄຟໃຫ້ຄວາມສະຫວ່າງໃນເຂດຊຸມຊົນໃຫ້ພຽງພໍ.
4. ອອກມາຕະການພິເສດລົງໂທດຕໍ່ຜູ້ຕຳແລ້ວໜີໃຫ້ໜັກຂຶ້ນຕື່ມ ພ້ອມທັງໂຄສະນາມາຕະການນັ້ນໃຫ້ທົ່ວເຖິງສັງຄົມຢ່າງຕໍ່ເນື່ອງ. ພ້ອມກັນນັ້ນກໍຄວນມີງົບປະມານລາງວັນນຳຈັບຜູ້ກໍ່ເຫດ ເພື່ອເປັນແຮງຈຸງໃຈໃຫ້ຜູ້ແຈ້ງເບາະແສ ແລະເຈົ້າໜ້າທີ່ຜູ້ປະຕິບັດງານ.
5. ສ້າງໂອກາດໃຫ້ພາກສ່ວນທີ່ກ່ຽວຂ້ອງ ໄດ້ໄປຖອດຖອນບົດຮຽນການປະຕິບັດງານກັບປະເທດເພື່ອນບ້ານ ໃນການຕິດຕາມນຳຈັບຄົນຮ້າຍ.
ທັງໝົດນັ້ນ, ເປັນຄວາມຫ່ວງໃຍ ທີ່ຢາກຝາກຝັງແກ່ພາກສ່ວນລັດທີ່ກ່ຽວຂ້ອງ ໃນນາມສື່ມວນຊົນຜູ້ໜຶ່ງ.