ເຈົ້າໜ້າທີ່ອີຣານຖະແຫຼງວານນີ້ວ່າ ອີຣານ ແລະ ບໍລິສັດໂບອ໊ງ ຜູ້ຜະລິດເຮືອບິນລາຍໃຫຍ່ທີ່ມີສຳນັກງານໃນສະຫະລັດ ໄດ້ບັນລຸຂໍ້ຕົກລົງຊື້ເຮືອບິນ 100 ລຳ ເພື່ອປັບປຸງຝູງບິນການຄ້າຂອງອີຣານທີ່ມີອາຍຸການນຳໃຊ້ມາດົນ.

ອາລີ ອາເບດຊາເດ ຜູ້ອຳນວຍການສຳນັກງານການບິນພົນລະເຮືອນແຫ່ງອີຣານ ໃຫ້ສຳພາດໜັງສືພິມອີຣານວ່າ ອີຣານມີເຮືອບິນ 250 ລຳ ຊຶ່ງຈຳເປັນຕ້ອງທົດແທນໃໝ່ 230 ລຳ ແຕ່ຂໍ້ຕົກລົງສະບັບນີ້ຍັງຕ້ອງລໍຖ້າການອະນຸມັດຈາກລັດຖະບານສະຫະລັດ ແລະ ບໍ່ໄດ້ກຳນົດຂອບເວລາ ກ່ອນໜ້ານີ້ບໍລິສັດໂບອິ້ງຖະແຫຼງຢືນຢັນວ່າ ບໍລິສັດໄດ້ເຈລະຈາກັບສາຍການບິນອີຣານທີ່ສົນໃຈຈັດຊື້ເຮືອບິນໂດຍສານຈາກໂບອິ້ງ ເມື່ອເດືອນກຸມພາບໍລິສັດສະຫະລັດໄດ້ຮັບອະນຸຍາດຈາກລັດຖະບານສະຫະລັດໃຫ້ຮື້ຟື້ນການຄ້າກັບອີຣານໄດ້ ພາຍຫຼັງຈາກສະຫະລັດຍົກເລີກມາດຕະການຄໍ້າບາດບາງສ່ວນກັບອີຣານໄປເມື່ອເດືອນມັງກອນ.