ໃນຕອນທີ່ໂທລະສັບມືຖືຍັງບໍ່ມີຄວາມສາມາດຫຼາກຫຼາຍແບບໃນຍຸກປັດຈຸບັນ ຫຼືທີ່ເຮົາເອີ້ນວ່າ “ສະມາດໂຟນ”. ເຊິ່ງຕອນນັ້ນເປັນຊ່ວງທີ່ເຄື່ອງເກມຄອນໂຊນຂາຍດີ ແລະເປັນທີ່ນິຍົມກັນແພ່ຫຼາຍ ເພາະດ້ວຍກຣາບຟິກຂອງເກມໃນຍຸກນັ້ນ ບວກກັບ ການພົກພາທີ່ສະດວກສະບາຍຂອງໂຕເຄື່ອງເອງ, ໂດຍເຄື່ອງເກມທີ່ກ່າວມານີ້ກໍຄົງໜີບໍ່ພົ້ນ Game Boy ຢ່າງແນ່ນອນ. ເມື່ອຍ້ອນກັບໄປເມື່ອປີ 2015 ຈະມີຂ່າວກ່ຽວກັບເຄື່ອງເກມບອຍທີ່ໃຊ້ສຳລັບຫຼິ້ນເທິງໂທລະສັບອອກມາ ແຕ່ພັດອອກມາໃນຊ່ວງວັນ April Fools Day ຫຼືວັນຂີ້ຕົວະ ຈຶ່ງເຮັດໃຫ້ຄົນເຊື່ອວ່າເປັນພຽງຂ່າວທີ່ສ້າງຂຶ້ນມາເທົ່ານັ້ນ.

ແຕ່ໃນມື້ນີ້ມັນເປັນຄວາມຈິງແລ້ວ!! ໂດຍຫຼ້າສຸດນີ້ທາງບໍລິສັດ Hyperkin ກໍໄດ້ເປີດໂຕເຄື່ອງ Smart Boy ໃນງານ E3, ເຊິ່ງເປັນເຄດທີ່ຈະປ່ຽນໃຫ້ໂທລະສັບມືຖືຂອງເຮົາເປັນເຄື່ອງຫຼິ້ນເກມບອຍສະເໝືອນຈິງຂຶ້ນມາເລີຍ, ເຊິ່ງຈະຕ່າງຈາກທີ່ເຮົານຳໃຊ້ Emu ໃນການຫຼິ້ນເພາະປຸ່ມກົດແມ່ນຈະຢູ່ເທິງຈໍມືຖືເຮົາ, ແຕ່ສຳລັບເຄດ Smart Boy ແລ້ວ ແມ່ນເປັນຮາດແວຣ໌ທີ່ມີປຸ່ມກົດແທ້, ມີບ່ອນໃສ່ກະແຊັດເກມ ຫຼືເວົ້າງ່າຍວ່າເປັນເຄື່ອງເກມບອຍທີ່ໃຊ້ຈໍໂທລະສັບເປັນຈໍສະແດງຜົນແທນນັ້ນເອງ.

ພາຍໃນງານ E3 ເຄື່ອງທີ່ນຳມາໃຊ້ທົດສອບກັບເຄດ Hyperkin Smart Boy ແມ່ນເປັນເຄື່ອງລະບົບ Android, ແຕ່ທາງບໍລິສັດບອກວ່າລະບົບ iOS ກໍຮອງຮັບເຄດໂຕນີ້ເຊັ່ນດຽວກັນ ແລະໃຜທີ່ສົນໃຈກໍຄົງຕ້ອງອົດໃຈຖ້າເຖິງ ເດືອນທັນວ່າ ໃນທ້າຍປີນີ້ເດີ້.

ທີ່ມາ: gizmodo