ຈາກກະແສຫາງສຽງຄ່າໄຟແພງ ໃນຜ່ານມາໄດ້ເຮັດໃຫ້ບາງຫົວໜ່ວຍທຸລະກິດເກີດມີຄວາມສົນໃຈຫັນມານຳໃຊ້ລະບົບເຊື່ອມຕໍ່ລະບົບໄຟຟ້າແສງຕາເວັນຫຼາຍຂຶ້ນ ໜຶ່ງໃນນັ້ນແມ່ນທະນາຄານເອເອັນແຊັດ ທີ່ໄດ້ເປີດນຳໃຊ້ຢ່າງເປັນທາງການແລ້ວເມື່ອວັນທີ 14 ມີຖຸນາຜ່ານມາ
ທັງນີ້ກໍເພື່ອເປັນທາງເລືອກໜຶ່ງທີ່ຈະຊ່ວຍຫຼຸດຜ່ອນຄ່າກະແສໄຟຟ້າ ທັງເປັນການສົ່ງເສີມນຳໃຊ້ພະລັງງານສະອາດ ແລະ ເປັນມິດກັບສິ່ງແວດລ້ອມນຳອີກ.
ການເປີດນຳໃຊ້ລະບົບເຊື່ອມຕໍ່ໃໝ່ນີ້ ໄດ້ຈັດຂຶ້ນທີ່ອາຄານທະນາຄານເອເອັນແຊັດ (ANZ) ນະຄອນຫຼວງວຽງຈັນ ຊຶ່ງເຂົ້າຮ່ວມມີທ່ານ ນາງ ແອນນາ ກຣີນຜູ້ບໍລິຫານທະນາຄານ ANZ, ພ້ອມນີ້ກໍມີຜູ້ຕາງໜ້າຈາກພາກລັດ ແລະອົງການຈັດຕັ້ງສາກົນກ່ຽວຂ້ອງຕະຫຼອດຮອດ ພະນັກງານ ແລະວິຊາການເຂົ້າຮ່ວມ.
ລະບົບໄຟດັ່ງກ່າວແມ່ນບໍລິສັດຊັນລະບົບພະລັງງານທົດແທນ ຈຳກັດ ເປັນຜູ້ດຳເນີນການຕິດຕັ້ງໃສ່ຫຼັງຄາແລ້ວ ເຊື່ອມຕໍ່ໃສ່ລະບົບຕາຂ່າຍໄຟຟ້າຂອງອາຄານ ANZ ສຳເລັດໃນທ້າຍເດືອນພຶດສະພາ 2016 ຊຶ່ງມີກຳລັງການຜະລິດ 90 ກີໂລວັດ ແລະນີ້ແມ່ນໂຄງການທຳອິດທີ່ເຊື່ອມຕໍ່ລະບົບໄຟຟ້າແສງຕາເວັນໃສ່ກັບລະບົບຕາຂ່າຍໄຟຟ້າໃນແບບການຄ້າຢູ່ ສປປ ລາວ.
ຂະນະທີ່ບໍລິສັດຊັນລະບົບຍັງໄດ້ຕິດຕັ້ງລະບົບເຊື່ອມລະບົບແບບດຽວກັນນີ້ທີ່ສຳນັກງານໂຄງການພັດທະນາແຫ່ງສະຫະປະຊາຊາດ ນະຄອນຫຼວງວຽງຈັນໃນປາຍປີ 2015 ແລະຕິດຕັ້ງຢູ່ສຳນັກງານໃຫຍ່ຫ້ອງການທະນາຄານໂລກ (ຫຼັງໃໝ່) ທີ່ນະຄອນຫຼວງວຽງຈັນ ໃນຕົ້ນປີ 2016.
ທ່ານ Craig Paice ຫົວໜ້າຝ່າຍ ດຳເນີນງານຂອງ ANZ ກ່າວວ່າ: ການຕິດຕັ້ງລະບົບໄຟຟ້າແສງຕະເວັນແມ່ນສອດຄ່ອງກັບວັດຖຸປະສົງ ແລະແນວທາງຂອງທະນາຄານໃນການດຳເນີນທຸລະກິດ ແລະ ຄວາມມຸ່ງຫວັງທີ່ຈະຫຼຸດຜ່ອນຄ່າໃຊ້ຈ່າຍກ່ຽວກັບກະແສໄຟຟ້າ ແລະຫຼຸດຜ່ອນຜົນກະທົບຕໍ່ສິ່ງແວດລ້ອມ.
ແຕ່ທັງນີ້ຄາດວ່າລະບົບໃໝ່ຈະຊ່ວຍຫຼຸດຄ່າໃຊ້ຈ່າຍກ່ຽວກັບໄຟຟ້າໄດ້ຫຼາຍກວ່າ 20 ພັນໂດລາ ຫຼື ປະມານ 160 ລ້ານກີບຕໍ່ປີ ໂດຍລະບົບໄຟຟ້າແສງຕາເວັນທີ່ຕິດຕັ້ງເຊື່ອມຕໍ່ເຂົ້າລະບົບຕາຂ່າຍໄຟຟ້າແມ່ນຈະມີອາຍຸການໃຊ້ງານໄດ້ຍາວນານຢ່າງໜ້ອຍ 25 ປີ ຫຼື ຫຼາຍກວ່ານັ້ນ.
ທີ່ມາ: 