ວັນທີ 10 ມິຖຸນາ 2016 ທີ່ຫ້ອງປະຊຸມພະແນກອຸດສາຫະກຳ ແລະການຄ້າ ແຂວງສະຫວັນະເຂດ ໄດ້ຈັດກອງປະຊຸມວິຊາການເພື່ອສ້າງຄວາມເຂັ້ມແຂງໃຫ້ແກ່ວຽກງານການຄ້າພ້ອມທັງເຜີຍແຜ່ເອກະສານ ເລກທີ 15/ນຍ ໂດຍການເປັນປະທານຂອງທ່ານ ສີທົນ ນັນ ທະລາດ ຫົວໜ້າພະແນກອຸດສາຫະກຳ ແລະການຄ້າແຂວງ ພ້ອມຄະນະນຳ ແລະພະນັກງານວິຊາການຂອງພະແນກການດັ່ງກ່າວພ້ອມດ້ວຍຫ້ອງການອຸດສາຫະກຳ ແລະການຄ້າທັງ 15 ຕົວເມືອງເຂົ້າຮ່ວມ.
ກອງປະຊຸມດັ່ງກ່າວໄດ້ຮັບຟັງການ ເຜີຍແຜ່ເຊື່ອມຊຶມເອກະສານເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະທຸລະກິດໄມ້ ທັງນີ້ກໍເພື່ອເປັນການເພີ່ມທະວີໃນການຈັດຕັ້ງປະຕິບັດວຽກງານຄຸ້ມຄອງປ່າໄມ້, ທຸລະກິດໄມ້, ການຂຸດຄົ້ນໄມ້, ປຸ່ງແຕ່ງໄມ້ ແລະຊື້-ຂາຍໄມ້ໃຫ້ມີຄວາມເຂັ້ມງວດຕາມກົດໝາຍ ແລະລະບຽບການ ຕ່າງໆທີ່ລັດຖະບານໄດ້ວາງອອກໃຫ້ມີ ຄວາມສັກສິດ ທັງເປັນການສະກັດກັ້ນ, ຕ້ານ ແລະແກ້ໄຂປາກົດການຫຍໍ້ທໍ້ດ້ານ ຕ່າງໆໃນຂົງເຂດວຽກງານປ່າໄມ້ໃຫ້ຫຼຸດລົງ ແລະໝົດໄປເທື່ອລະກ້າວ.
ຊຶ່ງເນື້ອໃນຂອງຄຳສັ່ງບາງຂໍ້ລະບຸວ່າ: ໃຫ້ບັນດາກະຊວງ, ຂະແໜງການທີ່ກ່ຽວຂ້ອງ ແລະອຳນາດການປົກຄອງທ້ອງຖິ່ນທຸກຂັ້ນເພີ່ມທະວີຄວາມເອົາໃຈໃສ່ ແລະ ຄວາມຮັບຜິດຊອບໃນການປະຕິບັດໜ້າທີ່, ຂອບເຂດສິດ ແລະຄວາມຮັບຜິດຊອບໃຫ້ຖືກຕ້ອງຕາມກົດໝາຍ ແລະລະບຽບການຕ່າງໆທີ່ໄດ້ກຳນົດອອກ ໂດຍສະເພາະແມ່ນກົດໝາຍ ແລະລະບຽບການຕ່າງໆທີ່ກ່ຽວຂ້ອງກັບການ ຄຸ້ມຄອງໄມ້, ການຂຸດຄົ້ນໄມ້, ການເຄື່ອນຍ້າຍໄມ້ ແລະທຸລະກິດໄມ້, ໃຫ້ຢຸດຕິການສົ່ງອອກໄມ້ທ່ອນ, ໄມ້ຕີຕັບ, ໄມ້ແປຮູບ, ໄມ້ຊອຍ, ຮາກໄມ້ ຫຼື ເຫງົ້າໄມ້, ຕໍໄມ້, ປູດໄມ້, ງ່າໄມ້ ແລະໄມ້ຢືນຕົ້ນ ຫຼື ໄມ້ປະດັບທີ່ຂຸດຄົ້ນອອກຈາກປ່າທຳມະ ຊາດໄປຕ່າງປະເທດໃນທຸກກໍລະນີຢ່າງ ເດັດຂາດ ລວມທັງໄມ້ທີ່ລັດຖະບານໄດ້ອະນຸມັດຜ່ານມາ ແຕ່ຍັງບໍ່ທັນໄດ້ຈັດຕັ້ງປະຕິບັດ; ໃຫ້ປຸງແຕ່ງເປັນຜະລິດຕະພັນສຳເລັດຮູບຕາມມາດຕະຖານທີ່ກະຊວງອຸດສາຫະກຳ ແລະການຄ້າວາງອອກ, ຫ້າມນຳໄມ້ ແລະເຄື່ອງປ່າຂອງດົງທີ່ບໍ່ຖືກຕ້ອງຕາມກົດໝາຍ ແລະລະບຽບການຈາກຕ່າງປະເທດມາຜ່ານເພື່ອສົ່ງໄປປະເທດທີສາມ.
ທີ່ມາ: 