ກອງປະຊຸມສຳມະນາວ່າດ້ວຍບົດບາດແມ່ຍິງໃນຂະແໜງການທ່ອງທ່ຽວອາຊຽນໄດ້ຈັດຂຶ້ນໃນລະຫວ່າງວັນທີ 13-15 ມິຖຸນາ 2016 ທີ່ນະຄອນຫຼວງວຽງຈັນ, ເພື່ອປຶກສາຫາລືວິທີການດຳເນີນທຸລະກິດທ່ອງທ່ຽວ ແລະປຶກສາຫາລືກ່ຽວກັບມາດຕະການເພື່ອສ້າງຄວາມເຂັ້ມແຂງໃນຂະແໜງການຂອງຕົນ.
ໃນວັນທີ 13 ມິຖຸນາ 2016 ທີ່ລາວ ພລາຊາໄດ້ຈັດກອງປະຊຸມສຳມະນາວ່າດ້ວຍບົດບາດແມ່ຍິງໃນຂະແໜງການ ທ່ອງທ່ຽວອາຊຽນໂດຍການເປັນປະທານຂອງທ່ານ ສະຫວັນຄອນ ຣາຊ ມຸນຕີຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ທ່ານ ຈອນ ວິນລ່ຽມສ໌ ເອກອັກຄະລັດຖະທູດອົດສະຕຣາລີ ປະຈຳລາວ, ໂດຍມີຜູ້ແທນດ້ານການທ່ອງທ່ຽວອາຊຽນຫຼາຍກວ່າ 100 ທ່ານ, ມີບັນດາພະນັກງານວິຊາການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້ຍັງເປັນໂອກາດທີ່ດີໃຫ້ແກ່ຜູ້ປະກອບການໃນຂະແໜງການທ່ອງທ່ຽວແມ່ຍິງ ອາຊຽນ ປັບປຸງ, ເສີມສ້າງທັກສະ ແລະສ້າງເຄືອຂ່າຍ ແລະທັງເປັນການສ້າງຄວາມເຂັ້ມແຂງໃຫ້ແກ່ນັກທຸລະກິດຂອງຕົນ ໂດຍສະເພາະແມ່ນຜູ້ດຳເນີນທຸລະກິດຂະໜາດນ້ອຍ ແລະກາງໃນອຸດສາຫະກຳການທ່ອງທ່ຽວ, ສືບຕໍ່ມີບົດບາດສຳຄັນ ໃນການພັດທະນາຂະແໜງການທ່ອງທ່ຽວຢູ່ໃນ ລາວ ແລະໃນທົ່ວພາກພື້ນອາຊຽນຊຶ່່ງເປັນພາກພື້ນທີ່ມີແຮງງານຍິງກວມເອົາ 60 ຂອງແຮງງານທັງໝົດໃນຂະແໜງອຸດສາຫະກຳການທ່ອງທ່ຽວ.
ທັງນີ້ ຍັງໄດ້ຮັບຟັງການບັນຍາຍ ຈາກຜູ້ຊ່ຽວຊານຈາກພາກພື້ນ ແລະສາກົນ ໃນຫົວຂໍ້ຄວາມຄິດສ້າງສັນ ແລະ ເຕັກໂນໂລຊີ, ການຕະຫຼາດທ່ອງທ່ຽວ ແລະເຄື່ອງໝາຍສິນຄ້າ, ການເງິນ, ການ ພັດທະນາບຸກຄະລາກອນ, ພາວະຄວາມ ເປັນຜູ້ນຳ.
ກອງປະຊຸມໃນຄັ້ງນີ້, ແມ່ນໄດ້ຮັບການສະໜັບສະໜູນ ແລະຮ່ວມມືຈາກສະຖານທູດອົດສະຕຣາລີ, ສະພາການຄ້າ ອົດສະຕຣາລີ ປະຈຳລາວ ແລະກະຊວງຖະແຫຼ່ງຂ່າວ ວັດທະນະທຳ ແລະທ່ອງທ່ຽວ.
ທີ່ມາ: 