ເຊກອງເປັນໜຶ່ງໃນບັນດາແຂວງພາກໃຕ້ຂອງລາວ ທີ່ມີເສັ້ນທາງຕິດຈອດກັບຫຼາຍແຂວງພາກໃຕ້ ແລະ ອີກຫຼາຍແຂວງຂອງປະເທດໃກ້ຄຽງ ຊຶ່ງກາຍເປັນທ່າແຮງໃນການດຶງດູດນັກລົງທຶນໂດຍໃນ 5 ປີຂ້າງໜ້າແຂວງ ມີຄວາມຕ້ອງການທຶນເຂົ້າໃນການພັດທະນາທັງໝົດ 5 ພັນຕື້ກວ່າກີບ.
ທ່ານ ທອງຄຳ ມະນີວົງ ຫົວໜ້າພະແນກແຜນການ ແລະ ການລົງທຶນແຂວງເຊກອງໃຫ້ ຮູ້ວ່າ: ຜ່ານການຈັດຕັ້ງປະຕິບັດແຜນການ 5 ປີຄັ້ງທີ VII (2011-2015) ເຫັນວ່າການພັດທະນາເສດຖະກິດມີຈັງຫວະຂະຫຍາຍຕົວຢ່າງຕໍ່ເນື່ອງ ໂດຍມາຮອດສົກ 2014-2015 ລວມຍອດຜະລິດຕະພັນພາຍໃນ GDP ບັນລຸ 1 ພັນຕື້ກວ່າກີບ, ອັດຕາສະເລ່ຍການຂະຫຍາຍຕົວທາງດ້ານເສດຖະກິດຢູ່ໃນລະດັບຫຼາຍກວ່າ 10% ໃນນັ້ນຂະແໜງກະສິກຳເພີ່ມຂຶ້ນ 9% ກວມເອົາ 37,3%, ອຸດສາຫະກຳເພີ່ມຂຶ້ນ 18,2% ກວມ ເອົາ 23% ແລະການບໍລິການເພີ່ມຂຶ້ນ 16,8% ກວມເອົາ 39,7% ຂອງ GDP.
ສຳລັບດ້ານການລົງທຶນຂອງລັດໃນໄລຍະ 5 ປີຜ່ານມາ ມີທັງໝົດ 324 ໂຄງການ ມູນຄ່າ 186,42 ຕື້ກີບ, ເທົ່າກັບ 78,33% ຂອງແຜນການ 5 ປີ ຊຶ່ງສ່ວນໃຫຍ່ແມ່ນສຸມໃສ່ຈັດຕັ້ງປະຕິບັດໂຄງການບຸລິມະສິດທີ່ນອນໃນແຜນ 5 ປີ ຂອງ ແຂວງເປັນຕົ້ນການປັບປຸງກໍ່ສ້າງເສັ້ນທາງຄົມມະນາຄົມ, ລະບົບຊົນລະປະທານ, ໂຮງຮຽນ, ສຸກສາລາ ແລະອື່ນໆ ເພື່ອສ້າງເງື່ອນໄຂສິ່ງອຳນວຍຄວາມ ສະດວກໃຫ້ແກ່ວຽກງານການພັດທະນາເສດຖະກິດ, ການຄ້າ, ການລົງທຶນ ແລະການລົງທ່ອງທ່ຽວພາຍໃນແຂວງຕາມທ່າແຮງທີ່ມີຢູ່.
ນອກນັ້ນ ຍັງມີທຶນການຊ່ວຍເຫຼືອ ເພື່ອການພັດທະນາ ODA ໃນ 5 ປີມີ ທັງໝົດ 82 ໂຄງການ ມູນຄ່າ 85,08 ຕື້ກີບ, ທຽບໃສ່ແຜນການ 5 ປີປະຕິບັດໄດ້ 51,56% ແລະທຶນສິນເຊື່ອຂອງທະນາຄານ 2 ພັນຕື້ກວ່າກີບ, ທຽບໃສ່ແຜນລື່ນແຜນ 5 ປີປະມານ 5 ເທົ່າຕົວ ໂດຍທຶນສິນເຊື່ອດັ່ງກ່າວແມ່ນປ່ອຍເຂົ້າໃນ4 ຂະແໜງການຄື: ຂະແໜງກະສິກຳ ແລະປ່າໄມ້; ຂະແໜງກໍ່ສ້າງພື້ນຖານໂຄງ ລ່າງ ແລະການພັດທະນາວິສາຫະກິດຂະ ໜາດກາງ ແລະ ຂະໜາດນ້ອຍ ເພື່ອປະ ກອບສ່ວນເຂົ້າໃນການແກ້ໄຂຄວາມທຸກຍາກຂອງປະຊາຊົນ ຕາມແນວທາງນະ ໂຍບາຍຂອງພັກເຮົາວາງອອກ.
ທ່ານ ທອງຄຳ ມະນີວົງ ໃຫ້ຮູ້ອີກວ່າ: ເພື່ອຮັບປະກັນໃຫ້ແກ່ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020) ດ້ວຍລະດັບອັດຕາ ການຂະຫຍາຍຕົວທາງດ້ານເສດຖະ ກິດສະເລ່ຍຫຼາຍກວ່າ 13% ຕໍ່ປີ ແລະ ຮອດປີ 2020 ມູນຄ່າ (GDP) ສະເລ່ຍຕໍ່ຫົວຄົນໃຫ້ບັນລຸໄດ້ 22,3 ລ້ານກີບຕໍ່ ຄົນຕໍ່ປີ ທັງນີ້ແຂວງເຊກອງຍັງມີຄວາມຕ້ອງການທຶນເຂົ້າໃນການພັດທະນາທັງໝົດ 5 ພັນຕື້ກວ່າກີບ ໃນນີ້ ການລົງທຶນຂອງລັດ 400 ຕື້ກີບ, ທຶນຊ່ວຍເຫຼືອລ້າກູ້ຢືມ 449 ຕື້ກີບ, ການລົງທຶນເອກະຊົນ ພາຍໃນ ແລະຕ່າງປະເທດ 2.528 ຕື້ກີບ ແລະສິນເຊື່ອທະນາຄານ 2.240 ຕື້ກີບ.
ທີ່ມາ: 