ເວລາປະມານ 18:13 ໂມງຂອງວັນທີ 8 ມິຖຸນາ 2016 ໄດ້ເກີດເຫດຄາຕະກຳປຸ້ນຊັບຄົນຈີນທີ່ຮ້ານຂາຍລົດຈັກຢູ່ບ້ານສີວິໄລ ເມືອງປາກຊັນ ແຂວງບໍລິຄຳໄຊ ໂດຍຄົນຮ້າຍໄດ້ໃຊ້ມີດຄັດເຕີ້ ປາດຄໍເຈົ້າຂອງຮ້ານຈົນເສຍຊີວິດ.
ພາຍຫຼັງໄດ້ຮັບແຈ້ງຄວາມເຈົ້າໜ້າທີ່ ປກສ ເມືອງປາກຊັນ ໄດ້ສົມທົບກັບ ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງບໍລິຄຳໄຊ ລົງກວດກາສັນນະສູດສະຖານທີ່ເກີດເຫດເກັບກຳຂໍ້ມູນຫຼັກຖານ, ສອບຖາມຜູ້ເຫັນເຫດການ ແລະ ກວດກາພາບຈາກກ້ອງວົງຈອນປິດທີ່ຕິດ ຕັ້ງຢູ່ສີ່ແຍກໄຟອຳນາດຈຶ່ງຮູ້ວ່າຄົນຮ້າຍພວມຂັບຂີ່ລົກຈັກສະແມັດໝາຍເລກທະບຽນ ຈຂ 8869 ທີ່ປຸ້ນໄດ້ຈາກຮ້ານຂອງ ຜູ້ຕາຍພວມເອົາຕົວຫຼົບໜີໄປທາງເມືອງບໍລິຄັນ, ຈາກນັ້ນຈຶ່ງໄດ້ປະສານສົມທົບໄປຍັງເຈົ້າໜ້າທີ່ ປກສ ເມືອງບໍລິຄັນ ເພື່ອສະກັດຈັບຄົນຮ້າຍ, ເມື່ອເຈົ້າໜ້າທີ່ຕິດຕາມໄປຮອດເຂດບ້ານພຽງດີເສັ້ນ ທາງໄປ ເມືອງບໍລິຄັນ ກໍ່ພົບເຫັນມີດຄັດ ເຕີ້ທີ່ໃຊ້ກໍ່ເຫດຖີ້ມປະໄວ້ພ້ອມກັບປ້າຍລົດຈັກໝາຍເລກທະບຽນ ຈຂ 8869 ບໍລິຄຳໄຊ ທີ່ຄົນຮ້າຍຂັບຂີ່ເພື່ອຫຼົບໜີ, ຜ່ານການເກັບກຳຂໍ້ມູນ ຈິ່ງຮູ້ອີກວ່າຄົນຮ້າຍພວມຫຼົບໜີໄປທາງເມືອງປາກກະດິງ ຈິ່ງໄດ້ນຳກຳລັງຕິດຕາມຢ່າງບໍ່ລົດ ລະພໍໄປຮອດເຂດຂົວຫ້ວຍປຶງລະຫວ່າງ ບ້ານສີສະອາດ ຫາ ບ້ານໂພນສະອາດ ເມືອງປາກຊັນ ກໍ່ພົບເຫັນລົດຈັກສະແມັດ ທີ່ຄົນຮ້າຍຂັບຂີ່ຖີ້ມປະໄວ້, ດ້ວຍຄວາມເອົາໃຈໃສ່ຕໍ່ໜ້າທີ່ວິຊາສະເພາະຂອງເຈົ້າໜ້າທີ່ບໍ່ຍອມໃຫ້ຄົນຮ້າຍລອຍນວນໜີໄປໄດ້, ພໍຕົກມາຮອດເວລາ 00: 38 ໂມງ ຂອງວັນທີ 9 ມິຖຸນາ 2016 ກໍ່ສາມາດຈັບຕົວຄົນຮ້າຍໄດ້ທີ່ປ້ອມຕຳຫຼວດຈະລາຈອນເມືອງປາກກະດິງ ແຂວງບໍລິຄຳໄຊ.
ຜ່ານການສືບສວນຂອງເຈົ້າໜ້າທີ່ ໃນເບື້ອງຕົ້ນໃຫ້ຮູ້ວ່າຄົນຮ້າຍທີ່ລົງມກໍ່ເຫດໃນຄັ້ງນີ້ຊື່ທ້າວຈາວເຈຍວີ່ ອາຍຸ 27 ປີ ສັນຊາດຈີນ ພັກເຊົາຢູ່ບ້ານອີໄລ ເມືອງນາຊາຍທອງ ນະຄອນຫຼວງວຽງຈັນ ໄດ້ຂີ່ລົດເກັງກັບໝູ່ຄົນໜຶ່ງທີ່ເປັນຄົນລາວເພື່ອລົງມາຫຼິ້ນຢູ່ປາກຊັນພໍມາຮອດປາກຊັນ ຈິ່ງໃຫ້ໄປສົ່ງຢູ່ບ້ານພັກແຫ່ງໜຶ່ງຈາກນັ້ນຜູ້ກ່ຽວມີແນວຄິດຢາກໄດ້ ເງິນເພື່ອຈະກັບເມືອປະເທດຈີນ ຈຶ່ງອອກ ຈາກບ້ານພັກແລ້ວຍ່າງເລາະຂໍເງິນຄ່າ ລົດເມກັບເມືອວຽງຈັນພໍດີມີຄົນລາວຜູ້ໜຶ່ງໃຈບຸນໄດ້ເອົາເງິນໃຫ້ຜູ້ກ່ຽວຈຳນວນ 50.000 ກີບ ຈາກນັ້ນກໍ່ເອົາໄປຊື້ມີດຄັດ ເຕີ້1 ດວງແລ້ວກັບເຂົ້າບ້ານພັກ ໂດຍໃຊ້ມີດທີ່ຊື້ມາປາດແຂນຕົນເອງແລ້ວແລ່ນ ອອກມາວ່າຖືກຄົນທຳຮ້າຍຮ່າງກາຍ, ຈາກນັ້ນຄົນທີ່ພົບເຫັນ ຈິ່ງໄດ້ໃຊ້ຜ້າພັນບາດໃຫ້ຜູ້ກ່ຽວ.
ຕໍ່ມາຜູ້ກ່ຽວ ຈິ່ງໄດ້ຍ່າງເລາະມາເຫັນ ຮ້ານຂາຍລົດຈັກຂອງທ້າວ ອາເວີຍ ອາ ຍຸ 27 ປີ ສັນຊາດຈີນທີ່ມາເຊົ່າຮ້ານຢູ່ ບ້ານສີວິໄລ ເມືອງປາກຊັນ ແຂວງບໍລິ ຄຳໄຊ ຊຶ່ງໃນຂະນະນັ້ນຜູ້ຖືກເຄາະຮ້າຍ ພວມນັ່ງແຕ່ງກິນຢູ່, ຜູ້ກ່ຽວຈຶ່ງຍ່າງເຂົ້າ ໄປຂໍເງິນນຳແຕ່ຜູ້ເຄາະຮ້າຍບໍ່ໃຫ້ຈຶ່ງໃຊ້ມີດທີ່ກຽມມາປາດທ້າວ ອາເວີຍ 1 ບາດ, ຈາກນັ້ນຜູ້ເຄາະຮ້າຍຈິ່ງແລ່ນອອກມາ ຮ້ອງໃຫ້ຄົນມາຊ່ວຍແຕ່ຜູ້ກ່ຽວໄດ້ໃຊ້ຕີນຢຽບຕົວຜູ້ເຄາະຮ້າຍລົງກັບພື້ນເຮືອນ ແລ້ວໃຊ້ມີດດັ່ງກ່າວແທງເຂົ້າລຳຕົວຂອງຜູ້ຕາຍຫຼາຍບາດຈົນມີດຫັກຄາຕໍ່ມາຜູ້ເຄາະຮ້າຍກໍ່ເສຍຊີວິດຄາທີ່ແລ້ວຜູ້ກ່ຽວ ຈິ່ງໄດ້ຂັບຂີ່ລົດຈັກຂອງຜູ້ຕາຍເພື່ອຫຼົບໜີ.
ຕໍ່ກັບຄະດີດັ່ງກ່າວທາງເຈົ້າໜ້າທີ່ ປກສ ເມືອງປາກຊັນ ພວມດຳເນີນການສືບສວນ-ສອບສວນຂະຫຍາຍຜົນຫາຂໍ້ ເທັດຈິງເພື່ອດຳເນີນຄະດີຕໍ່ຜູ້ກ່ຽວໃຫ້ຖືກຕ້ອງຕາມລະບຽບກົດໝາຍ.
ທີ່ມາ: 