ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງສູນກາງແນວລາວສ້າງຊາດ(ສນຊ)ໄດ້ສຳເລັດລົງຢ່າງຈົບງາມ ເມື່ອວັນທີ 9 ມີຖຸນານີ້, ທີ່ຫໍປະຊຸມແຫ່ງຊາດ ໂດຍ ເປັນກຽດເຂົ້າຮ່ວມມີພະເຖລານຸເຖລະ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ມີບັນດາສະຫາຍກົມການ ເມືອງ, ກຳມະການສູນກາງພັກ, ຕາງໜ້າລັດຖະບານ, ສະພາ ແຫ່ງຊາດ, ບັນດາຜູ້ແທນ ແລະ ແຂກຖືກເຊີນເຂົ້າຮ່ວມທັງໝົດ 469 ສະຫາຍ.
ກອງປະຊຸມໄດ້ເຫັນດີຄັດເລືອກເອົາ ສະຫາຍ ໄຊສົມພອນ ພົມວິຫານ ເປັນປະທານ ແນວລາວສ້າງຊາດຊຸດທີ X. ພ້ອມເລືອກເອົາຮອງປະທານ 6 ສະຫາຍປະກອບມີ ສະຫາຍ ຄຳໃບ ດຳລັດ ກຳມະ ການສູນກາງພັກ, ສະຫາຍ ຄຳຫຼ້າ ລິ້ງນະຄອນ, ສະຫາຍ ນາງ ຄຳຈັນ ພົມແສງສະຫວັນ, ສະຫາຍ ຈັນທະວົງ ແສນອາມາດ ມົນຕີ, ສະຫາຍ ສົງອົກ ກິ່ງສະດາ ແລະ ສະຫາຍ ເຍ່ຍເກີຢ່າ ໜໍຈໍຈົງຕົວ.
ນອກນັ້ນຮັບຮອງເອົາ ການສະເໜີແຕ່ງຕັ້ງຄະນະກຳມະການສູນກາງແນວລາວສ້າງຊາດ ສະໄໝທີ X ຈຳນວນ 224 ສະຫາຍ.ໃນນີ້ ມີພຣະສົງ 14 ອົງ, ເພດຍິງ 47 ສະຫາຍ ເພື່ອເປັນຫຼັກແຫຼ່ງເຕົ້າໂຮມ ຄວາມສາມັກຄີບັນດາເຜົ່າ, ຊັ້ນຄົນ, ສາສະໜາ, ເພດ, ໄວ ແລະ ຄົນເຊື້ອສາຍລາວທີ່ດຳ ລົງຊີວິດຢູ່ຕ່າງປະເທດ.
ຂ່າວຈາກ: ເສດຖະກິດ-ການຄ້າ