ທີ່ດິນປຸກສ້າງເພື່ອສາທາລະນະປະໂຫຍດແມ່ນທີ່ດິນເພື່ອຮັບໃຊ້ຜົນປະໂຫຍດສ່ວນລວມ:ສວນາທາລະນະ,ໂຮງຮຽນ, ໂຮງໝໍ,ຕະຫຼາດ,ສະໜາມເດັກຫຼິ້ນ,ສະໜາມກິລາແລະອື່ນໆທີ່ຮັບໃຊ້ສາທາລະນະປະໂຫຍດ.ທີ່ດິນປຸກສ້າງທີ່ຢູ່ອາໄສແມ່ນທີ່ດິນທີ່ນຳໃຊ້ເຂົ້າໃນການປຸກສ້າງທີ່ພັກພາອາໄສຂອງບຸກຄົນແລະຄອບຄົວ.ທີ່ດິນປຸກສ້າງໂຮງຈັກໂຮງງານແມ່ນທີ່ດິນນຳໃຊ້ເພື່ອດຳເນີນການຜະລິດແລະການປຸງແຕ່ງອຸດສາຫະກຳ.ທີ່ດິນປຸກສ້າງສຳນັກງານ,ອົງການແມ່ນທີ່ດິນເພື່ອຮັບໃຊ້ການປຸກສ້າງສຳນັກງານ,ອົງການຂອງລັດ,ຂອງວິສາຫະກິດ,ສະຖານທູດຫຼືອົງການຈັດຕັ້ງສາກົນ. ການຈັດສັນທີ່ດິນປຸກສ້າງຕ້ອງປະຕິບັດຕາມຜັງເມືອງແລະຕາມອັດຕາສ່ວນຂອງທີ່ດິນປຸກສ້າງແຕ່ລະປະເພດທີ່ໄດ້ກຳນົດໄວ້.

ລັດສະຫງວນທີ່ດິນປຸກສ້າງສຳລັບສາທາລະນະປະໂຫຍດໄວ້ເພື່ອຮັບໃຊ້ຜົນປະໂຫຍດສ່ວນລວມ.ຖ້າຫາກມີການປ່ຽນເປົ້າໝາຍການໃຊ້ທີ່ດິນດັ່ງກ່າວກໍຕ້ອງໃຫ້ຮັບໃຊ້ຜົນປະໂຫຍດສ່ວນລວມເຊັ່ນດຽວກັນແລະຕ້ອງໄດ້ຮັບການເຫັນດີຈາກຂະແໜງການທີ່ກ່ຽວຂ້ອງເສັຍກ່ອນ.ການນຳໃຊ້ທີ່ດິນປຸກສ້າງແມ່ນບໍ່ໃຫ້ແຕະຕ້ອງເຖິງສິດຜົນປະໂຫຍດຂອງຜູ້ອື່ນທັງຮັບປະກັນສະພາວະຄວາມເປັນຈິງຕ້ອງຍອມຮັບ.ການປຸກສ້າງຕ່າງໆຕ້ອງໄດ້ຮັບອະນຸຍາດຈາກອົງການຜັງເມືອງ,ຕ້ອງປະຕິບັດຕາມລະບຽບຜັງເມືອງຢ່າງເຂັ້ມງວດແລະຕ້ອງໄດ້ຮັບອະນຸຍາດຈາກອົງການທີ່ມີສິດແລະໜ້າທີ່ກ່ຽວຂ້ອງ,ຮັບປະກັນມາດຕະຖານເຕັກນິກຢ່າງຄົບຖ້ວນພ້ອມທັງຮັບປະກັນການປົກປັກຮັກສາສິ່ງແວດລ້ອມ.ລັດອະນຸຍາດໃຫ້ບຸກຄົນແລະຄອບຄົວນຳໃຊ້ທີ່ດິນປຸກສ້າງຢ່າງຖືກຕ້ອງຕາມເປົ້າໝາຍ,ມີປະສິດທິຜົນ,ມີຄວາມສະຫງົບແລະຍາວນານໃນເນື້ອທີ່ບໍ່ເກີນແປດຮ້ອຍຕາແມັດຕໍ່ຄົນໃນຄອບຄົວ.ສຳລັບການອະນຸມັດເນື້ອທີ່ດິນປຸກສ້າງໃຫ້ການຈັດຕັ້ງນຳໃຊ້ແມ່ນອີງຕາມຄວາມສາມາດຕົວຈິງໃນການນຳໃຊ້.ອົງການຄຸ້ມຄອງທີ່ດິນຢູ່ສປປລາວປະກອບດ້ວຍ : ກະຊວງຊັບພະຍາກອນ ແລະ ສິ່ງແວດລ້ອມ;ພະແນກຊັບພະຍາກອນ ແລະ ສິ່ງແວດລ້ອມປະຈຳແຂວງ, ນະຄອນ; ຫ້ອງຊັບພະຍາກອນ ແລະ ສິ່ງແວດລ້ອມເມືອງ, ເທດສະບານ;ໜ່ວຍງານທີ່ດິນປະຈຳບ້ານ.

ອົງການຄຸ້ມຄອງທີ່ດິນມີສິດແລະໜ້າທີ່ລວມຄື; ຄົ້ນຄວ້າຮ່າງນະໂຍບາຍ,ກົດໝາຍ,ລັດຖະບັນຍັດ,ດຳລັດ,ຂໍ້ກຳນົດແລະລະບຽບຫຼັກການກ່ຽວກັບການຄຸ້ມຄອງທີ່ດິນ;ສຳຫຼວດວັດແທກ,ຈັດສັນແລະສ້າງແຜນທີ່ນຳໃຊ້ທີ່ດິນລະດັບທ້ອງຖິ່ນ,ເຂດແຄວ້ນແລະແຫ່ງຊາດ;ປະສານສົມທົບກັບຂະແໜງການທີ່ກ່ຽວຂ້ອງແລະອົງການປົກຄອງທ້ອງຖິ່ນເພື່ອວາງແຜນນຳໃຊ້,ປົກປັກຮັກສາ,ພັດທະນາທີ່ດິນ,ຈັດປະເພດທີ່ດິນ,ປະເມີນຄຸນນະພາບທີ່ດິນ,ກຳນົດເຂດທີ່ດິນແລະກວດກາການນຳໃຊ້ທີ່ດິນ;ມອບສິດນຳໃຊ້ທີ່ດິນ,ໃຫ້ເຊົ່າ,ໃຫ້ສຳປະທານແລະຖອນສິດນຳໃຊ້ທີ່ດິນ;ສ້າງສຳມະໂນທີ່ດິນ,ປະເມີນມູນຄ່າທີ່ດິນ,ຂຶ້ນແລະຈົດທະບຽນທີ່ດິນ,ອອກໃບຕາດິນແລະເກັບກຳສະຖິຕິທີ່ດິນ;ເກັບຄ່າທຳນຽມທີ່ດິນ;ແກ້ໄຂຂໍ້ຂັດແຍ່ງກ່ຽວກັບທີ່ດິນ;ຄຸ້ມຄອງທີ່ດິນຂອງລັດແລະປົກປັກຮັກສາສິ່ງແວດລ້ອມ;ວາງນະໂຍບາຍເພື່ອຄຸ້ມຄອງການຈັດຕັ້ງແລະການເຄື່ອນໄຫວຊື້ຂາຍສິດນຳໃຊ້ທີ່ດິນ;ສ້າງລະບົບຂໍ້ມູນຂ່າວສານກ່ຽວກັບທີ່ດິນ;ວາງນະໂຍບາຍແລະລະບຽບຫຼັກການເພື່ອຄຸ້ມຄອງຜູ້ປະກອບອາຊີບທີ່ພົວພັນກັບທີ່ດິນເຊັ່ນ:ນັກສຳຫຼວດວັດແທກ,ນັກປະເມີນລາຄາ,ນາຍໜ້າຫຼືຕົວແທນຜູ້ຊື້ຂາຍສິດນຳໃຊ້ທີ່ດິນ.

ທ່ານຜູ່ອ່ານ ໂດຍອີງໃສ່ເນື້ອໃນ ຈິດໃຈ ມາດຕາທີ 17 ຂອງ ລັດຖະທຳມະນູນ ແຫ່ງ ສປປ ລາວ ມອບໃຫ້ລັດປົກປ້ອງສິດກ່ຽວກັບກຳມະສິດ(ສິດຄອບຄອງ,ສິດນຳໃຊ້,ສິດໄດ້ຮັບໝາກຜົນ,ສິດຊີ້ຂາດ) ແລະສິດສືບທອດຂອງບຸກຄົນ, ນິຕິບຸກຄົນແລະການຈັດຕັ້ງຕາມກົດໝາຍ, ທີ່ດິນເປັນກຳມະສິດຂອງວົງຄະນະຍາດແຫ່ງຊາດຊຶ່ງລັດເປັນຕົວແທນແລະຄຸ້ມຄອງຢ່າງລວມສູນເປັນເອກະພາບໃນຂອບເຂດທົ່ວປະເທດຕາມກົດໝ¾¨.ໂດຍແມ່ນກະຊວງຊັບພະຍາກອນ ແລະ ສິ່ງແວດລ້ອມເປັນຜູ້ຄຸ້ມຄອງທີ່ດິນປຸກສ້າງ,ຄົ້ນຄວ້າວາງລະບຽບການກ່ຽວກັບການຄຸ້ມຄອງ,ການປົກປັກຮັກສາ,ການພັດທະນາແລະການນຳໃຊ້ທີ່ດິນແລ້ວນຳສະເໜີຕໍ່ລັດຖະບານ. ຊຶ່ງບຸກຄົນ ແລະ ນິຕິບຸກຄົນ ມີສິດນຳໃຊ້ທີ່ດິນດັ່ງນີ້: ສິດປົກປັກຮັກສາທີ່ດິນ; ສິດໃຊ້ທີ່ດິນ;ສິດໄດ້ຮັບໝາກຜົນຈາກທີ່ດິນ;ສິດໂອນສິດນຳໃຊ້ທີ່ດິນ;ສິດສືບທອດສິດນຳໃຊ້ທີ່ດິນ.

ໂດຍ: ເພັງພາວັນ ອິນທະວົງ

ທີ່ມາ: ສຳນັກຂ່າວສານປະເທດລາວ