ມວນຊົນຈໍານວນ 1.000 ກວ່າຄົນເຂົ້າຮ່ວມບໍລິຈາກເລືອດຊ່ວຍເຫລືອສັງຄົມໃນໂອກາດສະເຫລີມສະຫລອງວັນຜູ້ບໍລິຈາກເລືອດໂລກໃນນະຄອນຫລວງວຽງຈັນ ຂະນະທີ່ ແຕ່ລະປີຈຳນວນຜູ້ບໍລິຈາກເລືອດແບບສະໝັກໃຈ ເພີ່ມຂຶ້ນຢ່າງຕໍ່ເນື່ອງກວມເອົາ 90% ຂອງຈຳນວນຜູ້ບໍລິຈາກເລືອດທັງໝົດ.
ງານບໍລິຈາກເລືອດດັ່ງກ່າວນີ້ໂດຍອົງການກາແດງລາວ ຈັດງານສະເຫລີມສະຫລອງວັນຜູ້ບໍລິຈາກເລືອດໂລກ (14/6/2004-14/6/2016 )ພາຍໃຕ້ຄຳຂວັນ”ເລືອດເຊື່ອມຕໍ່ເຮົາໝົດທຸກຄົນ Blood connects us all” ຂຶ້ນໃນວັນທີ 10 ມິຖຸນາ 2016 ທີ່ນະຄອນຫລວງວຽງຈັນ ເພື່ອສະແດງເຖິງຄວາມຮູ້ບຸນຄຸນຂອງຜູ້ປະກອບສ່ວນບໍລິ ຈາກເລືອດ ຢ່າງຕໍ່ເນື່ອງໃນໄລຍະຜ່ານມາ ໂດຍການເຂົ້າຮ່ວມຂອງທ່ານ ຄຳລາວັນ ຈັນທະລາວັນ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ທ່ານ ສິງ ເມໂນລາດ ຮອງປະທານ ອົງການກາແດງລາວ, ຮອງປະທານຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ ແລະ ກະຊວງ, ກົມກອງຕ່າງໆ ບໍລິສັດຫ່າງຮ້ານ ຕະຫລອດຮອດ ປະຊາຊົນເຂົ້າຮ່ວມ.
ປັດຈຸບັນ ສປປ ລາວ ມີສູນຮັບບໍລິຈາກເລືອດທັງໝົດ 17 ແຫ່ງ, ໜ່ວຍເກັບຮັກສາເລືອດ 17 ແຫ່ງ ແລະ ໂຮງໝໍກອງທັບມີ 6 ແຫ່ງ ເຊິ່ງກວມເອົາທຸກແຂວງໃນທົ່ວປະເທດ ແລະ ຍັງຈະສືບຕໍ່ຂະຫຍາຍຕື່ມອີກ.
ງານດັ່ງກ່າວ ແມ່ນໄດ້ເນັ້ນໃສ່ ເພື່ອໃຫ້ສັງຄົມ ແລະ ຜູ້ບໍລິຈາກເລືອດ ທັງຫລາຍເຫັນໄດ້ຄວາມສຳຄັນ ແລະ ຄວາມຈຳເປັນ ໃນການມີສ່ວນຮ່ວມໃນການບໍລິຈາກເລືອດ ເຊິ່ງຕ້ອງໄດ້ອາໄສຫລາຍໆພາກສ່ວນມີສ່ວນຮ່ວມຢ່າງກວ້າງຂວງ ແລະ ເອົາໃຈໃສ່ ປັດຈຸບັນຍັງມີຄົນເຈັບ ຜູ້ທີ່ຕ້ອງການເລືອດຢ່າງຫລວງຫລາຍ ໂດຍສະເພາະ ແມ່ນແມ່ ແລະ ເດັກນ້ອຍ ຍ້ອນວ່າຈໍານວນໜຶ່ງຍັງບໍ່ທັນເຂົ້າເຖິງການບໍລິການເລືອດພຽງພໍ ແລະ ທັນເວລາ ການບໍລິຈາກເລືອດ ແມ່ນໄດ້ຊ່ວຍຊີວິດຄົນຫລາຍໆລ້ານຄົນ ແລະ ສ້າງຮອຍຍິ້ມໃຫ້ກັບຜູ້ປ່ວຍ ການສົ່ງເລືອດໄດ້ຊ່ວຍໃຫ້ສຸຂະພາບຂອງຄົນເຈັບດີຂຶ້ນຫາຍຈາກຄວາມທໍລະມານ ເຮັດໃຫ້ເຂົ້າເຈົ້າມີຊີວິດຍືນຍາວ ແລະ ມີສຸຂະພາບທີ່ດີ.
ຂ່າວຈາກ: ສຳນັກຂ່າວສານປະເທດລາວ