ແຂວງຈຳປາສັກ ກໍຄືບໍລິສັດລັດວິສາຫະກິດນ້ຳປະປາ ແຂວງຍັງມີຄວາມຕ້ອງການນຳໃຊ້ທຶນຢ່າງໜ້ອຍ 75 ລ້ານ ໂດລາສະຫະລັດ ເພື່ອນຳໃຊ້ເຂົ້າໃນການ ພັດທະນາພື້ນຖານໂຄງລ່າງກໍ່ສ້າງໂຮງງານຜະລິດນ້ຳ ແລະການຂະຫຍາຍລະ ບົບທໍ່ນ້ຳໄປສູ່ບ້ານ ແລະເມືອງທີ່ຍັງບໍ່ທັນໄດ້ໃຊ້ ໂດຍຄາດວ່າຈະໃຊ້ເວລາປະມານ 5 ປີແຕ່ນີ້ຮອດ 2021 ຈະເຮັດໃຫ້ປະຊາຊົນພາຍໃນແຂວງໄດ້ຊົມໃຊ້ນ້ຳທີ່ສະອາດ.
ທ່ານ ໄກ່ຄຳ ສຸວັນນະເມທີ ຜູ້ອຳນວຍການບໍລິສັດລັດວິສາຫະກິດນ້ຳປະປາ ແຂວງຈຳປາສັກ ໄດ້ເປີດເຜີຍຕໍ່ນັກຂ່າວໜັງສືພິມ ເສດຖະກິດ-ສັງຄົມ ປະຈຳແຂວງຮູ້ເມື່ອບໍ່ດົນມານີ້ວ່າ: ຄວາມຕ້ອງການຊົມໃຊ້ນ້ຳປະປາທີ່ສະອາດພາຍໃນແຂວງຈຳປາສັກ ເຫັນວ່ານັບມື້ເພີ່ມຄວາມຕ້ອງການຊົມໃຊ້ສູງຂຶ້ນເລື້ອຍໆ ໂດຍສະເພາະແມ່ນບ້ານ ແລະເມືອງທີ່ຍັງບໍ່ທັນສາມາດໃຫ້ບໍລິການໄປເຖິງ ຊຶ່ງປະຈຸບັນບໍລິສັດລັດວິສາຫະກິດນ້ຳປະປາ ແຂວງສາມາດຕອບສະໜອງນ້ຳໄດ້ພຽງແຕ່ 4 ຕົວເມືອງຄື: ເມືອງປາກເຊ, ເມືອງໂພນທອງ, ບ້ານດອນຕະຫຼາດ (ເຂດບ້ານພັດທະນາເມືອງຈຳປາສັກ) ແລະ ເມືອງໂຂງ, ສະເພາະເມືອງປາກເຊມີກຳລັງການຜະລິດ 15 ພັນແມັດກ້ອນຕໍ່ວັນ ແລະສາມາດເພີ່ມກຳລັງການຜະລິດໄດ້ 20 ພັນແມັດກ້ອນຕໍ່ວັນ, ເມືອງໂພນທອງ 700 ແມັດກ້ອນຕໍ່ວັນ, ບ້ານດອນຕະຫຼາດ 20 ແມັດກ້ອນຕໍ່ວັນ, ນອກຈາກນີ້ ຍັງມີໂຮງງານຜະລິດນ້ຳປະປາຂອງພາກເອກະຊົນຢູ່ຫຼັກ 36 ເມືອງປາກຊ່ອງທີ່ກວມອັດຕາການສະໜອງນ້ຳປະປາພາຍໃນແຂວງ 30% ແລະມີກຳລັງການຜະລິດສູງເຖີງ 40 ພັນແມັດກ້ອນຕໍ່ວັນ.
ທ່ານ ໄກ່ຄຳ ສຸວັນນະເມທີ ລັດວິສາຫະກິດນ້ຳປະປາແຂວງ ຍັງມີນ້ຳເຫຼືອໃຊ້ຢູ່ປະມານ 20 ພັນແມັດກ້ອນຕໍ່ວັນ ຊຶ່ງໄລຍະຜ່ານມາຄືເລີ່ມແຕ່ຕົ້ນປີ 2016 ແມ່ນໄດ້ມີການຂະຫຍາຍທໍ່ນ້ຳໄປສູ່ບ້ານທີ່ຍັງບໍ່ໄດ້ຊົມໃຊ້, ມາຮອດປະຈຸບັນແມ່ນສາມາດສຳເລັດແລ້ວ 17 ບ້ານທີ່ນອນພາຍໃນຕົວເມືອງປາກເຊໄດ້ຊົມໃຊ້ນ້ຳປະປາ ແລະສືບຕໍ່ບ້ານສຸດທ້າຍຂອງເມືອງຄືບ້ານພັດທະນາຄອນໄຫຼຄາດວ່າ ຈະໃຊ້ເວລາອີກ 3 ເດືອນໃຫ້ປະຊາຊົນພາຍໃນບ້ານສາມາດໄດ້ຊົມໃຊ້ນ້ຳປະປາຢ່າງຖາວອນ.
ສຳລັບວຽກງານການພັດທະນາພື້ນຖານໂຄງລ່າງການສະໜອງນ້ຳປະປາທີ່ສະອາດໃຫ້ກັບປະຊາຊົນແມ່ນມີຄວາມສຳຄັນ ແລະມີຄວາມຈຳເປັນທີ່ສຸດຕໍ່ປະຊາຊົນ, ໂດຍສະເພາະແມ່ນດ້ານສຸຂາອະນາໄມຄືການບໍລິໂພກ ແລະອຸປະໂພກນ້ຳທີ່ສະອາດ, ຊຶ່ງຍາມໃດອຳນາດການປົກຄອງແຂວງກໍຄືຄະນະບໍລິຫານພວກເຮົາໄດ້ເອົາໃຈໃສ່ຢ່າງຈິງຈັງມາໂດຍຕະຫຼອດ, ແຕ່ການພັດທະນາຜ່ານມາແມ່ນໄດ້ນຳໃຊ້ແຫຼ່ງທຶນທີ່ໄດ້ຈາກຜົນກຳໄລທີ່ມີຈຳກັດ ຈິ່ງເຮັດໃຫ້ການພັດທະນາບໍ່ໄດ້ຕາມຄາດໝາຍ, ດັ່ງນັ້ນເພື່ອເຮັດໃຫ້ຄາດໝາຍດັ່ງກ່າວໄປຕາມເປົ້າໝາຍທີ່ວາງໄວ້ລັດວິສາຫະກິດນ້ຳປະປາແຂວງຈຳປາສັກພວກເຮົາມີຄວາມຕ້ອງການທຶນຢ່າງໜ້ອຍ 75 ລ້ານໂດລາສະຫະລັດ ເພື່ອນຳໃຊ້ເຂົ້າໃນວຽກງານພື້ນຖານໂຄງລ່າງ, ການກໍ່ສ້າງໂຮງງານ, ອ່າງເກັບນ້ຳ ແລະການຂະຫຍາຍທໍ່ນ້ຳອື່ນໆ. ຫາກແຫຼ່ງທຶນທີ່ວ່ານັ້ນມີຄາດວ່າຈະໃຊ້ເວລາປະມານ 5 ປີ, ແຕ່ນີ້ຮອດທ້າຍປີ 2021 ຈະເຮັດໃຫ້ປະຊາຊົນພາຍໃນ ແຂວງຈຳປາສັກໄດ້ຊົມໃຊ້ນ້ຳປະປາທີ່ສະອາດ.
ທີ່ມາ: 