ສຳນັກງານຄວບຄຸມໄພພິບັດອິນໂດເນເຊຍຖະແຫຼງວ່າ ຍັງບໍ່ມີລາຍງານຄວາມເສຍຫາຍ ຫຼື ຜູ້ບາດເຈັບ ແລະ ບໍ່ມີປະກາດເຕືອນໄພຄື້ນຍັກສຶນາມິ ພາຍຫຼັງເກີດແຜ່ນດິນໄຫວຮຸນແຮງຂະໜາດ 6,2 ບໍລິເວນຝັ່ງທາງພາກກາງຂອງອິນໂດເນເຊຍມື້ນີ້.

ສຳນັກງານສຳຫຼວດທໍລະນີວິທະຍາສະຫະລັດລາຍງານວ່າ ເກີດແຜ່ນດິນໄຫວໃຕ້ທະເລຫ່າງໄປປະມານ 300 ກິໂລແມັດ ທາງໃຕ້ຂອງເກາະລອມບອກແຫຼ່ງທ່ອງທ່ຽວທີ່ນິຍົມຂອງອິນໂດເນເຊຍເມື່ອເວລາປະມານ 12:13 ໂມງ ຕາມເວລາທ້ອງຖິ່ນ ຫຼື 11:13 ຕາມເວລາໃນບ້ານເຮົາ ແລະ ຢູ່ເລິກລົງໄປ 29 ກິໂລແມັດ, ສຳນັກງານຄວບຄຸມໄພພິບັດອິນໂດເນເຊຍກ່າວວ່າ ເຈົ້າໜ້າທີ່ໄດ້ກວດສອບຜົນກະທົບຈາກແຜ່ນດິນໄຫວແລ້ວ ໂດຍມີລາຍງານວ່ານັກທ່ອງທ່ຽວເທິງເກາະບາຫຼີຕື່ນຕົກໃຈເລັກນ້ອຍ ເຈົ້າໜ້າທີ່ອິນໂດເນເຊຍກ່າວວ່າ ແຜ່ນດິນໄຫວຢູ່ໃນລະດັບຮຸນແຮງ ແລະ ກິນເວລາປະມານ 3-4 ວິນາທີ ແຕ່ບໍ່ເຮັດໃຫ້ຕ້ອງປະກາດເຕືອນໄພສຶນາມິ.