ໃນນາມຕາງໜ້າໃຫ້ລັດຖະບານເຂົ້າຮ່ວມກອງປະຊຸມ ຄັ້ງທີ 105 ຂອງອົງການແຮງງານສາກົນປະຈຳປີ 2016 ວັນທີ 7 ມິຖຸນານີ້ ທີ່ເມືອງເຊີແນວ ປະເທດສະວິດເຊີແລນ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກໍໄດ້ເປັນກຽດປະກອບຄຳຄິດຄຳເຫັນຕໍ່ກອງປະຊຸມດັ່ງກ່າວ.
ໂດຍທ່ານກ່າວວ່າ: ອົງການແຮງງານສາກົນ ແມ່ນອົງການໜຶ່ງທີ່ໄດ້ເຄື່ອນໄຫວຢ່າງຂະຫຍັນຫ້າວຫັນ ເພື່ອຜົນປະໂຫຍດພື້ນຖານຂອງຊາວຜູ້ອອກແຮງງານ ແລະ ຜູ້ໃຊ້ແຮງງານ, ບັນດາຫຼັກການພື້ນຖານກ່ຽວກັບການປົກປ້ອງທາງສັງຄົມ ກໍຄືການສົ່ງເສີມຄວາມຍຸຕິທຳ ແລະສິດທິທາງດ້ານແຮງງານ, ການສ້າງໂອກາດໃຫ້ທຸກຄົນມີວຽກເຮັດງານທຳຢ່າງໝັ້ນຄົງ, ມີລາຍໄດ້ ແລະ ໄດ້ຮັບການປົກປ້ອງທີ່ດີຈາກສັງຄົມທີ່ອົງການແຮງງານສາກົນໄດ້ເປັນເຈົ້າການລິເລີ່ມສ້າງຂຶ້ນ ທັງໄດ້ເຄື່ອງໄຫວຈັດຕັ້ງປະຕິບັດ ບັນດາກິດຈະກຳທີ່ສຳຄັນ, ສະນັ້ນ ໃນນາມລັດຖະບານ ສປປ ລາວ ຂ້າພະເຈົ້າຂໍສະແດງຄວາມຊົມເຊີຍຕໍ່ຜົນສຳເລັດດັ່ງກ່າວ, ພ້ອມທັງ ຂໍສະ ໜັບສະໜູນຕໍ່ບົດລາຍງານຂອງທ່ານ ກາຍໄລເດີ ຜູ້ອຳນວຍການໃຫຍ່ອົງການ ແຮງງານສາກົນກ່ຽວກັບຕ່ອງໂສ້ການສະໜອງສາກົນທີ່ສຸມໃສ່ການປົກປ້ອງສິດ ແລະຜົນປະໂຫຍດຂອງຜູ້ອອກແຮງ ງານ ແລະຜູ້ໃຊ້ແຮງງານ.
ສປປ ລາວ ໃນຖານະທີ່ເປັນປະເທດສະມາຊິກ ເວລາໃດກໍໄດ້ເອົາໃຈໃສ່ປະຕິ ບັດພັນທະໜ້າທີ່ຂອງຕົນ ແລະໄດ້ຢຶດໝັ້ນໃນຫຼັກການພື້ນຖານຂອງອົງການແຮງງານສາກົນກ່ຽວກັບການສົ່ງເສີມຄວາມຍຸຕິທຳ ແລະປົກປ້ອງສິດດ້ານ ແຮງງານດ້ວຍການຜັນຂະຫຍາຍເຂົ້າ ໃນບັນດານິຕິກຳ ເພື່ອປົກປ້ອງສິດຂອງຜູ້ອອກແຮງງານ ແລະຜູ້ໃຊ້ແຮງງານ, ພ້ອມດຽວກັນນັ້ນລັດຖະບານ ຍັງຖືເອົາ ວຽກງານດັ່ງກ່າວເຂົ້າເປັນບຸລິມະສິດໜຶ່ງໃນແຜນພັດທະນາເສດຖະກິດ-ສັງຄົມແຫ່ງຊາດ, ຊຸກຍູ້ສົ່ງເສີມໃຫ້ທຸກພາກສ່ວນເສດຖະກິດເອົາໃຈໃສ່ພັດທະນາ ແລະ ຍົກລະດັບສີມືແຮງງານໃຫ້ຜູ້ອອກແຮງງານຂອງຕົນ, ທັງເອົາໃຈໃສ່ສ້າງ ແລະປັບປຸງນິຕິກຳທີ່ພົວພັນກັບວຽກງານແຮງງານ ແລະສະຫວັດດີການສັງຄົມ ເພື່ອເຊື່ອມໂຍງກັນພາກພື້ນ ແລະສາກົນ.
ຂ່າວ: 