ເມືອງປາກຊ່ອງ ນອກຈາກຈະມີຊື່ສຽງເປັນດິນແດນມີກາເຟແຊບຕິດອັນດັບໂລກແລ້ວດິນແດນແຫ່ງນີ້ຍັງອຸດົມສົມບູນໄປດ້ວຍແຫລ່ງທ່ອງທ່ຽວທາງທໍາມະຊາດ ເປັນຕົ້ນທິວທັດທໍາມະຊາດປ່າສະຫງວນດົງຫົວສາວ, ທໍາມະຊາດດ່ານສິນໄຊ,ທໍາມະຊາດເຂດບ້ານຫນອງຫລວງດິນແດນທີ່ມີດອກກຸຫລາບ1.000ປີ, ພູເທວະດາ(ປາກພູໄຟ)ທີ່ພົ່ນຄວາມອຸດົມສົມບູນມາສູ່ດິນແດນແຫ່ງນີ້ເມື່ອຫລາຍລ້ານປີ ແລະແຫ່ງອື່ນທີ່ພ້ອມໃຫ້ທ່ານໄດ້ສຳພັດກັບຄວາມງາມຕົວຈິງຢ່າງທີ່ທ່ານບໍສາມາດຈິນຕະນາ ການລ່ວງຫນ້າໄດ້ເລີຍ.
ນອກຈາກທຳມະຊາດ ປາກຊ່ອງຍັງເປັນດິນແດນຊົນຊາດຊົນເຜົ່າທີ່ຍັງຮັກສາໄດ້ຮີດຄອງປະເພນີ ເຮັດໃຫ້ດິນແດນແຫ່ງນີ້ມີຄວາມຫາກຫລາຍທາງດ້ານວັດທະະທຳ ທີ່ຫນ້າສຶກສາຄົ້ນຄວ້າ. ໂດຍສະເພະກໍແມ່ນຢ້ຽມຊົມວິຖີຊີວິດ ແລະ ການຜະລິດກາເຟຂອງຊາວເມືອງເຊິ່ງທ່ານສາດເບິ່ງວິທີການປູກກາເຟໃຫ້ໄດ້ກາເຟທີ່ທີລົດຊາດ ຈົນເປັນທີ່ຕິດໃຈຂອງນັກດື່ມທົ່ວໄປ.
ຈາກແຫລ່ງທ່ອງທ່ຽວທີ່ທໍາມະຊາດສ້າງຂຶ້ນແລ້ວ ປາກຊ່ອງຍັງມີແຫລ່ງທ່ອງທ່ຽວທີ່ສະແດງໃຫ້ເຫັນເຖິງການພັດທະນາເສດຖະກິດ-ສັງຄົມຂອງແຂວງເປັນຕົ້ນ: ອ່າງນໍ້າ ແລະປ່າແປກ, ແຫລ່ງທ່ອງທ່ຽວເຂື່ອນໄຟ້ຫ້ວຍເຫາະ, ສູນຄົ້ນຄວ້າກະສິກໍາໂນນສູນອີ່ຕູ້ຫລັກ35 ແລະສວນກາເຟບໍລິສັດດາວເຮືອງ.
ດ້ວຍຄວາມອຸດົມສົມບູນຂອງທຳມະຊາດ ແລະມີຝົນຕົກເກືອບຕະຫລອດປີ, ປາກຊ່ອງຈິ່ງຖືເປັນດິນແດ່ນແຫ່ງນ້ຳຕົກຕາດ ເພາະມີນ້ຳຕົກຕາດທີ່ຜ່ານການເກັບກຳສຳຫລວດເຖິງ24ແຫ່ງ ເຊິ່ງແຕ່ລະແຫ່ງລ້ວນແຕ່ເປັນນຳຕົກທີ່ງົດງາມ ເປັນຕົ້ນນໍ້າຕົກຕາດອີ້ຕູ້, ຕາດຟານ, ຕາດເຢືອງ, ຕາດຖ້ຳຈຳປີ,ຕາດຫົວຊ້າງ, ຕາດຊ້າງເສັດຄົດ, ຕາດແຊກະຕາມຕົກ, ຕາດ7ຊັ້ນ ແລະອີກຫລາຍໆແຫ່ງ.
ປັດຈຸບັນນໍ້າຕົກຕາດທີ່ບໍ່ໄກຈາກເມືອງປາກເຊປານໃດ ທີ່ທ່ານສາມາດເຂົ້າຊົມຢ່າງສະດວກສະບາຍກໍມີນໍ້າຕົກຕາດອີຕູ້ບ້ານຫລັກ35 ຫລືຫ່າງຈາກເມືອງປາກເຊປະມານ35ຫລັກ, ຕາດຟານ ຫ່າງຈາກເມືອງປາກເຊປະມານ38ຫລັກ,ຕາດເຢືອງ ຫ່າງຈາກເມືອງປາກເຊປະມານ40ຫລັກທີ່ມີການບໍລິການດ້ານອາຫານ,ທີ່ພັກ. ພ້ອມນີ້ສະຖານທີ່ດັ່ງກ່າວທ່ານຍັງສາມາດຊື້ກາເຟ,ຊາທີ່ຜະລິດຈາກຂາວບ້ານ ແລະ ເຄື່ອງປ່າຂອງດົງທີ່ເປັນຜະລິດຕະພັນພື້ນບ້ານໃນລາຄາຖືກ.
ປາກຊ່ອງນອກຈາກມີຊື່ສຽງດ້ານການທອງທ່ຽວທີ່ກ່າວມາຂ້າງເທີງ ເມືອງປາກຊ່ອງຍັງເປັນດິນແດນທີ່ມີຮ່ອງຮອຍການຕໍ່ສູ້ໃນສະໄຫມສົງຄາມ ຮ່ອງຮອຍທີ່ເຫັນໃນປັດຈຸບັນນອກຈາກຮ່ອງຮອຍຂອງສົງຄາມບົນພື້ນດິນທີ່ມີຢູ່ທົ່ວໄປແລ້ວ ຍັງມີເຂດທີ່ຫມັ້ນຂອງອົງແກ້ວ ອົງກົມມະດໍາທີ່ຕັ້ງຢູ່ບ້ານທົ່ງຫວາຍ, ເຂື່ອນໄຟຟ້າສະໄຫມຝຣັ່ງ, ຫ້ອງການໄຟຟ້າເກົ່າ ແລະຄ້າຍທະຫານເກົ່າທີ່ເທສະບານເມືອງປາກຊ່ອງ ແລະແຫ່ງອື່ນໆ.
ພູມອາກາດຢູ່ປາກຊ່ອງຈະຫນາວເຢັນຕະຫລອດປີ ເຮັດໃຫ້ໃນລະດູຫນາວຈະມີນໍ້າໝອກປົກຄຸມໄປທົ່ວ ພ້ອມກັບມີດອກຕາເວັນປ່າ ເບັ່ງບານທ້າລົມຫນາວໄປທົ່ວ ເຮັດໃຫ້ສ້າງຄວາມງົດງາມໄປອີກແບບຫນຶ່ງ.
ດ້ວຍເປັນເຂດທີ່ອາກາດຫນາວເຢັນ ແລະມີຝົນຕົກຫລາຍ ເຮັດໃຫ້ປາກຊ່ອງອຸດົມສົມບູນໄປດ້ວຍທໍາມະຊາດ ແລະ ຊີວະນາພັນ ໂດຍຈະມີດອກໄມ້ຫລາກຫລາຍສະນິດເບັ່ງບານຕາມລະດູການ.
ທີ່ມາ: http://la.laotrips.com/?p=378