ທ່ານ ປັນຍາ ໄຊຍະແສງ ປະທານສານປະຊາຊົນ ແຂວງອັດຕະປື ໄດ້ລາຍງານສະພາບການຈັດຕັ້ງປະຕິບັດພາລະບົດບາດສິດ ແລະໜ້າທີ່ຂອງສານໃນ 6 ເດືອນຕົ້ນປີຕໍ່ສື່ມວນຊົນໃນອາທິດທີ່ຜ່ານມາວ່າ:
ໃນ 6 ເດືອນຕົ້ນປີ 2016 ນີ້ ໄດ້ຮັບສຳນວນຄະດີມາພິຈາລະນາມີທັງໝົດ 104 ເລື່ອງ ໃນນີ້ ເປັນຄະດີຂັ້ນຕົ້ນ ທີ່ເກີດໃໝ່ 98 ເລື່ອງ, ຄະດີຂັ້ນອູທອນທີ່ສານປະຊາຊົນເຂດຕັດສິນມາກ່ອນເເລ້ວ 6 ເລື່ອງ ໃນຈຳນວນຄະດີທີ່ເກີດຂຶ້ນ ດັ່ງກ່າວ ເຈົ້າໜ້າທີ່ສານປະຊາຊົນແຂວງ ໄດ້ມີຄວາມພະຍາຍາມນຳພາພະນັກງານວິຊາການເອົາໃຈໃສ່ແກ້ໄຂດ້ວຍຄວາມຮັບຜິດຊອບສູງສະເພາະຢູ່ໃນ 6 ເດືອນຕົ້ນປີນີ້ແກ້ໄຂຄະດີໄດ້ 91 ເລື່ອງ, ຍັງຄ້າງ ແລະຍັງສຶບຕໍ່ດຳເນີນຄະດີຢູ່ 13 ເລື່ອງຄະດີທີ່ເກີດຂຶ້ນນີ້ແມ່ນມີຫຼາຍປະເພດຄະດີເຊັ່ນ: ຄະດີອາຍາ ເກີດຂຶ້ນທັງ ໝົດ 81 ເລື່ອງ, ແກ້ໄຂແລ້ວ 74 ເລື່ອງ, ຄະດີແພ່ງເກີດຂຶ້ນທັງໝົດ 11 ເລື່ອງ, ແກ້ໄຂແລ້ວ 8 ເລື່ອງ, ຄະດີຄອບຄົວເກີດຂຶ້ນທັງໝົດ 2 ເລື່ອງ, ແກ້ໄຂແລ້ວ 1 ເລື່ອງ, ຄະດີການຄ້າເກີດຂຶ້ນທັງໝົດ 3 ເລື່ອງ, ແກ້ໄຂແລ້ວ 2 ເລື່ອງ, ຄະດີເດັກເກີດຂຶ້ນທັງໝົດ 7 ເລື່ອງ, ແກ້ໄຂແລ້ວ 6 ເລື່ອງ, ສະເພາະໃນ 6 ເດືອນເທົ່ານັ້ນສາມາດເກັບພັນທະຄ່າທຳນຽມສານຕາມລະບຽບການຕັດສິນເຂົ້າງົບປະມານ ຂອງສານປະຕິບັດໄດ້ 600 ລ້ານກວ່າກີບ.
ຖ້າທຽບໃສ່ 6 ເດືອນຕົ້ນປີຂອງສົກປີ 2014-2015 ເຫັນວ່າການແກ້ໄຂຄະດີຫຼືຄະດີທີ່ເກີດຂຶ້ນຢູ່ແຂວງອັດຕະປືໃນປີນີ້ມີທ່າອ່ຽງເພີ່ມຂຶ້ນ 23 ເລື່ອງເທົ່າກັບ 35% ເພາະວ່າໃນຕົ້ນປີ 2014-2015 ມີຄະດີເກີດຂຶ້ນທັງໝົດ 70 ເລື່ອງ ແລະໃນສົກປີ 2016 ມີຄະດີເກີດຂຶ້ນ 91 ເລື່ອງ ທ່ານໄດ້ເວົ້າຕື່ມອີກວ່າ: ຄະດີທີ່ເກີດຂຶ້ນຫຼາຍກວ່າໝູ່ ແມ່ນຄະດີອາຍາ ຊຶ່ງເປັນຄະດີກ່ຽວກັບການຄ້າຂາຍຢາເສບຕິດສູງເຖິງ 37 ເລື່ອງ ຕໍ່ມາແມ່ນຄະດີລັກຊັບ ຊຶ່ງເກີດຢູ່ 16 ເລື່ອງ, ຄະດີແພ່ງສ່ວນຫຼາຍແມ່ນເກີດຈາກການກູ້ຢືມເປັນຕົ້ນແມ່ນການຫຼິ້ນຫວຍຂອງປະຊາຊົນ, ຄະດີທີ່ເກີດຈາກຂໍ້ຂັດແຍ່ງທີ່ດິນພາໃຫ້ເກີດມີຂໍ້ຂັດແຍ່ງເຊິ່ງກັນ ແລະກັນ, ຄະດີຄອບຄົວສ່ວນຫຼາຍເປັນຄະດີເກີດຂຶ້ນຈາກສາຍພົວພັນຄອບຄົວ, ຄະດີການຄ້າສ່ວນຫຼາຍແມ່ນເກີດຈາກການບໍ່ປະຕິບັດຕາມສັນຍາກູ້ຢືມ ແລະຄະດີເດັກແມ່ນເກີດຈາກການຄ້າຂາຍຢາເສບຕິດ ແລະການລັກຊັບ.
ທີ່ມາ: 