ເຈົ້າໜ້າທີ່ກອງບັນຊາການ ປກສ ເມືອງປາກກະດິງ ແຂວງບໍລິຄຳໄຊ ໄດ້ໃຫ້ຮູ້ວ່າ: 24 ພຶດສະພາ 2016 ນີ້ໄດ້ຮັບແຈ້ງຈາກພົນລະເມືອງດີວ່າໄດ້ມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດຢູ່ເຂດບ້ານນາບວຍ, ເມືອງປາກກະດິງ ຈາກນັ້ນເຈົ້າໜ້າທີ່ວິຊາສະເພາະ ປກສ ເມືອງປາກກະດິງ ຈິ່ງໄດ້ລົງສົມທົບກັບ ປກສ ກຸ່ມ 02 ທົ່ງນາມີ ເພື່ອກວດກາເຫັນວ່າແຫຼ່ງຂ່າວດັ່ງກ່າວແມ່ນມີຄວາມຈິງແທ້.
ຕົກມາຮອດວັນທີ 26 ພຶດສະພາ ເຈົ້າໜ້າທີ່ ປກສ ເມືອງປາກກະດິງໄດ້ວາງກຳລັງຕິດຕາມເປົ້າໝາຍເຫັນວ່າ ກຳລັງມີການຈຳໜ່າຍຢາບ້າຢູ່, ຈິ່ງໄດ້ເຂົ້າຈັບຕົວຜູ້ຖືກຫາໄດ້ 1 ຄົນ ຄື: ນາງ ເຊຍເຮີ່ ອາຍຸ 26 ປີ ຢູ່ບ້ານທົ່ງນາມີ ເມືອງປາກກະດິງ ແຂວງບໍລິຄຳໄຊ. ພ້ອມດ້ວຍຂອງກາງຢາບ້າຈຳນວນ 198 ເມັດ ຜ່ານການສືບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າຢາເສບຕິດດັ່ງກ່າວແມ່ນເປັນຂອງຕົນແທ້ ຊຶ່ງຕົນແມ່ນໄດ້ພົວພັນເສບຢາບ້າມາດົນແລ້ວ ຕົນຈີ່ງມີແນວຄິດຢາກຄ້າຂາຍຢາເສບຕິດແລ້ວຕັດສິນໃຈຕົກລົງຮັບຢາບ້ານຳຜູ້ຮ່ວມຂະບວນການ ຈຳນວນ 1 ຖົງເທົ່າກັບ 202 ເມັດ, ຕົນໄດ້ຂາຍໄປແລ້ວ 4 ເມັດ ຍັງເຫຼືອ 198 ເມັດ ໃນເວລາຕໍ່ມາຈືງຖືກເຈົ້າໜ້າທີ່ເຂົ້າກັກຕົວມາດຳເນີນຄະດີ.
ຕໍ່ກັບຄະດີດັ່ງກ່າວ ເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງປາກກະດິງ ໃຫ້ຮູ້ຕື່ມວ່າ: ປະຈຸບັນໄດ້ສົ່ງຕົວຜູ້ຖືກຫາໃຫ້ເຈົ້າໜ້າທີ່ ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງ ດຳເນີນຄະດີເພື່ອສົ່ງສຳນວນໃຫ້ອົງການໄອຍາການປະຊາຊົນ ແຂວງບໍລິຄຳໄຊ ສະຫຼຸບຟ້ອງສານຕັດສິນຕໍ່ຜູ້ກ່ຽວຕາມລະບຽບກົດໝາຍ, ສ່ວນພັກພວກທີ່ຮ່ວມຂະບວນການເຈົ້າໜ້າທີ່ ປກສ ເມືອງປາກກະດິງ ໄດ້ສືບຕໍ່ສົມທົບກັບເຈົ້າໜ້າທີ່ພາກສ່ວນກ່ຽວຂ້ອງເລັ່ງຕິດຕາມນຳຕົວພວກກ່ຽວເພື່ອມາດຳເນີນຄະດີຕາມກົດໝາຍຢ່າງເຂັ້ມງວດ.
ທີ່ມາ: 