ZTE ເປີດໂຕສະມາດໂຟນລາຄາປະຢັດລຸ້ນໃໝ່ ທີ່ມາແທນທີ່ Blade A1 ຈາກປີແລ້ວນີ້ ເຊິ່ງມີຊື່ວ່າ: Blade A2, ໂດຍໃນລຸ້ນນີ້ມີການອັບເກຣດສະເປັກ ແລະ ເພີ່ມສະແກນລາຍນິ້ວມືມາໃຫ້ນຳ.
ສຳລັບສະເປັກຂອງ Blade A2 ມາພ້ອມກັບໜ້າຈໍຂະໜາດ 5 ນິ້ວ, ຄວາມລະອຽດ HD ເປັນຈໍໂຄ້ງແບບ 2.5D, ໃຊ້ງານຊິບປະມວນຜົນ octa-core MediaTek MT6750 ພ້ອມກັບ GPU Mali 860, ໃຊ້ງານລະບົບ Android 5.1 (Lollipop). ພື້ນທີ່ຈັດເກັບ 16 GB, RAM 2 GB, ຮອງຮັບ 2 ຊິມ ເປັນແບບ Hybrid Dual SIM (nano + nano / microSD) ແລະໂຕເຄື່ອງໜັກພຽງ 135 ກຣາມ
ໃນດ້ານຂອງກ້ອງຫຼັງແມ່ນໃຫ້ມາ 13 ລ້ານພິກເຊວ ພ້ອມແຟລັດ LED, ລະບົບກວດຈັບໂຟກັດອັດຕະໂນມັດ ທີ່ມີຄວາມໄວໂຟກັດພຽງແຕ່ 0.1 ວິນາທີ ແລະ ກ້ອງໜ້າໃຫ້ມາ 5 ລ້ານພິກເຊວ ພ້ອມກັບແຟລັດ LED.
ZTE ກ່າວວ່າລະບົບສະແກນລາຍນິ້ວມືນັ້ນສາມາດສະແກນໄດ້ແບບ 360° ດ້ວຍຄວາມໄວພຽງ 0.3 ວິນາທີ. ນອກນີ້ແມ່ນຮອງຮັບ 4G VoLTE, WiFi 802.11 b/g/n, Bluetooth 4.0, GPS ແລະແບັດເຕີຣີ 2500mAh.
ສຳລັບ ZTE Blade A2 ແມ່ນມາພ້ອມກັບ 3 ສີຄື: ສີເງິນ, ສີເທົາ ແລະສີຄຳ. ສ່ວນລາຄານັ້ນພຽງແຕ່ 699 ຢວນ (860.000 ກີບ), ຕອນນີ້ສາມາດສັ່ງຈອງໄດ້ແລ້ວທີ່ jd.com ໃນປະເທດຈີນ ແລະ ຈະເລີ່ມຂາຍໃນວັນທີ 15 ມິຖຸນານີ້.
ທີ່ມາ: fonearena