ເພື່ອສ້າງຈິດສຳນຶກໃນການປົກປັກຮັກສາສິ່ງແວດລ້ອມກໍຄືການອະນຸຮັກສັດນ້ຳ, ສັດປ່າ ແລະພືດພັນປ່າ, ພ້ອມທັງຮັກຫອມ ແລະຫວງແຫນຊັບພະຍາກອນທຳມະຊາດອັນລ້ຳຄ່າ ເພື່ອໃຫ້ກາຍເປັນປະເທດທີ່ອຸດົມສົມບູນໄປດ້ວຍຊັບພະຍາກອນທຳມະຊາດທີ່ບໍ່ເຫືອດແຫ້ງ, ຮັກສາໄວ້ໃຫ້ຄົນຮຸ່ນນີ້ ແລະ ຮຸ່ນລູກຫຼານໄດ້ສືບຕໍ່ເພິ່ງພາອາໄສ ແລະ ຄົງຢູ່ກັບຊີວິດຂອງປະຊາຊົນເຮົາຕະຫຼອດຊົ່ວກາລະນານ.
ວັນທີ 5 ມິຖຸນາ 2016, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ອອກສານເນື່ອງໃນໂອກາດວັນສິ່ງແວດລ້ອມໂລກ ໂດຍໃນສານສະບັບດັ່ງກ່າວມີເນື້ອໃນລະບຸວ່າ: ວັນທີ 5 ມິຖຸນາ 2016, ເປັນວັນສະເຫຼີມສະຫຼອງວັນສິ່ງແວດລ້ອມໂລກທີ່ພວມວຽນມາຄົບຮອບ 44 ປີ, ລັດຖະບານ ແລະປະຊາຊົນລາວບັນດາເຜົ່າໃນ ທົ່ວປະເທດຮູ້ສຶກພາກພູມໃຈເປັນຢ່າງຍິ່ງທີ່ໄດ້ຮ່ວມກັບປະຊາຊາດໃນທົ່ວໂລກສະເຫຼີມສະຫຼອງວັນສຳຄັນດັ່ງກ່າວ ພາຍໃຕ້ຄຳຂວັນ “ຈົ່ງພ້ອມກັນປົກປັກຮັກສາປ່າໄມ້ເພື່ອທຸກສິ່ງທີ່ມີຊີວິດ” ຊຶ່ງສ່ອງແສງໃຫ້ເຫັນວ່າເຖິງເວລາແລ້ວທີ່ປະຊາຊາດໃນທົ່ວໂລກຈະຮ່ວມແຮງຮ່ວມໃຈກັນຢ່າງຈິງຈັງໃນການປົກປັກຮັກສາປ່າໄມ້ທີ່ມີຈຳກັດໃຫ້ຄືນສູ່ຄວາມ ອຸດົມສົມບູນ ເພື່ອສືບຕໍ່ເປັນບ່ອນເພິ່ງພາອາໄສຂອງທຸກໆສິ່ງທີ່ມີຊີວິດລວມທັງມະນຸດ. ສະເພາະ ສປປ ລາວ, ພັກລັດຖະບານຂອງພວກເຮົາຍາມໃດກໍໄດ້ປະຕິ ບັດນະໂຍບາຍອັນສະເໝີຕົ້ນສະເໝີປາຍໃນການພັດທະນາເສດຖະກິດສັງຄົມດ້ວຍຈັງຫວະເຕີບໂຕອັນແຂງແຮງຕໍ່ເນື່ອງ, ພ້ອມດຽວກັນນັ້ນກໍໄດ້ເອົາໃຈໃສ່ວາງເປົ້າໝາຍຍຸດທະສາດດ້ານປ່າໄມ້ ເພື່ອບັນລຸເນື້ອທີ່ປົກຫຸ້ມຂອງປ່າໄມ້ໃຫ້ບັນລຸ 70% ໃນປີ 2020, ໄປພ້ອມໆ ກັບການວາງມາດຕະການທີ່ເໝາະສົມ ໃນການປົກປັກຮັກສາຊັບພະຍາກອນທຳມະຊາດອື່ນໆ ແລະ ສິ່ງແວດລ້ອມຕາມທິດສີຂຽວ ແລະຍືນຍົງ, ເອົາໃຈໃສ່ສະກັດກັ້ນການລ່າ, ການທຳລາຍ ແລະ ການຄ້າຂາຍສັດນ້ຳ, ສັດປ່າ ແລະ ພືດພັນປ່າແບບຊະຊາຍທັງຜິດກົດໝາຍ.
ຢ່າງໃດກໍຕາມເຖິງແມ່ນວ່າພວກເຮົາຈະມີຄວາມພະຍາຍາມເທົ່າໃດກໍຕາມແຫຼ່ງຂໍ້ມູນຈາກອົງການສາກົນເພື່ອການອະນຸລັກທຳມະຊາດ (IUCN) ຍັງຊີ້ໃຫ້ເຫັນວ່າ: ຕິດພັນກັບການເຊື່ອມໂຊມຂອງປ່າໄມ້ນຳໄປສູ່ການເຊື່ອມໂຊມຂອງແຫຼ່ງທຳມະຊາດແລ້ວ, ຄວາມອຸດົມສົມບູນຂອງດິນ ແລະການເຊື່ອມໂຊມຂອງຊີວະນາໆພັນຄືໃນຈຳນວນທັງໝົດ 2.701 ຊະນິດ ທີ່ໄດ້ສຶກສາ, ປະມານ 157 ຊະນິດກຳລັງມີຄວາມສ່ຽງທີ່ໃກ້ຈະສູນພັນ ແລະ 115 ຊະນິດກຳລັງຖືກ ຂົ່ມຂູ່, ສະນັ້ນເນື່ອງໃນໂອກາດການສະເຫຼີມສະຫຼອງວັນດັ່ງກ່າວນີ້ ເພື່ອສ້າງຈິດສຳນຶກໃນການປົກປັກຮັກສາຄວາມສົມດຸນຂອງທຳມະຊາດ ແລະຊີວະນາໆພັນຈິ່ງຂໍຮຽກຮ້ອງມາຍັງທຸກອົງການຈັດຕັ້ງພັກລັດທຸກຂັ້ນ, ອົງການຈັດຕັ້ງ ມະຫາຊົນ, ຫົວໜ່ວຍທຸລະກິດຕະຫຼອດເຖິງພໍ່ແມ່ປະຊາຊົນທຸກທົ່ວໜ້າຈົ່ງພ້ອມກັນປະຕິບັດພັນທະຂອງຕົນໃນການປົກປັກຮັກສາສິ່ງແວດລ້ອມກໍຄືການອະນຸຮັກສັດນ້ຳ, ສັດປ່າ ແລະພືດພັນປ່າຕາມທີ່ໄດ້ລະບຸໄວ້ໃນລັດຖະທຳມະນູນທີ່ວ່າ “ທຸກອົງການຈັດຕັ້ງ ແລະພົນລະເມືອງຕ້ອງປົກປັກຮັກສາສິ່ງແວດລ້ອມ, ປົກປັກຮັກສາຊັບພະຍາກອນທຳມະຊາດ: ໜ້າດິນ, ປ່າໄມ້, ສັດ, ແຫຼ່ງນ້ຳ ແລະອາກາດ”
ທັງນີ້ ຍັງຮຽກຮ້ອງໃຫ້ພີ່ນ້ອງຮ່ວມຊາດໃນທົ່ວປະເທດຈົ່ງພ້ອມກັນເປັນເຈົ້າການສ້າງຈິດສຳນຶກຂອງການຮູ້ປົກປັກຮັກສາ, ຮັກຫອມ ແລະຫວງແຫນຊັບພະຍາກອນທຳມະຊາດອັນລ້ຳຄ່າ ເພື່ອໃຫ້ກາຍເປັນປະເທດທີ່ອຸດົມສົມບູນໄປດ້ວຍຊັບພະຍາກອນທຳມະຊາດທີ່ບໍ່ເຫືອດແຫ້ງ, ຮັກສາໄວ້ໃຫ້ຄົນຮຸ່ນນີ້ ແລະ ຮຸ່ນລູກຫຼານໄດ້ສືບຕໍ່ເພີ່ງພາອາໄສ ແລະ ຄົງຢູ່ກັບຊີວິດຂອງປະຊາຊົນເຮົາຕະຫຼອດຊົ່ວກາລະນານ.
ທີ່ມາ: