ຕາມເວັບໄຊແຂວງຢຸນນານ ວັນທີ 4 ມິຖຸນາທີ່ຜ່ານມານີ້, “ສັບປະດາຫົວຄິດປະດິດສ້າງຄຸນໝິງ” ໄດ້ຈັດກິດຈະກຳ “ວັນປະເທດລາວໃນສັບປະດາຫົວຄິດປະດິດສ້າງວັດທະນະທຳອາຊີຕາເວັນອອກສຽງໃຕ້ແລະອາຊີໃຕ້” ໂດຍນັກສຶກສາລາວທີ່ສຶກສາຢູ່ຈີນໄດ້ນຳສະແດງວັດທະນະທຳອາຊີຕາເວັນອອກສຽງໃຕ້ແລະອາຊີໃຕ້ທີ່ເປັນເອກະລັກສະເພາະໂດຍຜ່ານການຟ້ອນທີ່ເປັນມູນເຊື້ອລວມທັງອາຫານທີ່ເປັນເອກະລັກສະເພາະຂອງລາວ.
ນັກສຶກສາຍິງລາວຜູ້ໜຶ່ງທີ່ສຶກສາຢູ່ມະຫາວິທະຍາໄລສ້າງຄູຄຸນໝິງເວົ້າວ່າ: “ພວກເຮົາໄດ້ຮັບຄຳເຊີນຈາກສະຖານກົງສຸນລາວປະຈຳຄຸນໝິງໃຫ້ມາສະແດງການຟ້ອນທີ່ມີເອກະລັກສະເພາະແລະເປັນມູນເຊື້ອຂອງປະເທດລາວ, ນັກສຶກສາ ທັງໝົດ 9 ຄົນທີ່ໄດ້ມາສະແດງເທື່ອນີ້ຖືວ່າເປັນເທື່ອທຳອິດຈຶ່ງຮູ້ສຶກຕື້ນຕັນໃຈແລະດີໃຈຫຼາຍເພາະສາມາດຮຽນຮູ້ວັດທະນະທຳຈີນ, ຂະນະດຽວກັນກໍໄດ້ເຜີຍແຜ່ສິລະປະວັດທະນະທຳລາວຕໍ່ຄົນຈີນ” ໂດຍໄດ້ຟ້ອນສະແດງ 8 ລາຍການເຊິ່ງໄດ້ດຶງດູດຊາວຄຸນໝິງເຂົ້າຊົມແລະໄດ້ຮັບສຽງຕົບມືຊົມເຊີຍຫຼາຍເທື່ອ.
ຂະນະດຽວກັນ, ນັກສຶກສາລາວທີ່ສຶກສາຢູ່ມະຫາວິທະຍາໄລວິທະຍາສາດເຕັກໂນໂລຊີຄຸນໝິງກໍໄດ້ຮັບຄຳເຊີນຈາກສະຖານກົງສຸນລາວປະຈຳຄຸນໝິງເຊັ່ນດຽວກັນ, ເຂົາເຈົ້າກ່າວວ່າ, “ພວກເຮົາໄດ້ນຳເອົາອາຫານລາວມາແນະນຳໃຫ້ຄົນຈີນຮູ້ແລະເຂົ້າໃຈປະເທດເຮົາທັງຂາຍອາຫານລາວທີ່ເປັນເອກະລັກພິເສດເພື່ອໃຫ້ຊາວຄຸນໝິງໄດ້ຊີມອາຫານພື້ນເມືອງຂອງປະເທດເຮົາ.” ນອກນີ້, ເຂົາເຈົ້າຍັງໄດ້ນຳສະເໜີອາຫານລາວຊະນິດຕ່າງໆເຊັ່ນ ກາເຟ, ເບຍລາວ, ຂະໜົມແລະເຄື່ອງຫວານທີ່ເປັນເອກະລັກສະເພາະຂອງລາວນຳອີກ.
ຂ່າວຈາກ: http://laos.cri.cn/681/2016/06/05/261s203582_3.htm