ເຊົ້າມື້ນີ້ ມີຜູ້ໃຊ້ເຟສບຸກຊື່ Chomchay Chanthasone ໄດ້ໂພສຮູບຫໍ່ສົ້ມໝູທີ່ຊື້ມາແຕ່ປາກເຊ ດ້ວຍລາຄາຫໍ່ລະ 20,000 ກີບ ແຕ່ບາດເຄ່ຍອອກມາແລ້ວ ສິ່ງທີ່ເຫັນຄືໃບຕອງຈຳນວນຫຼາຍໆ ຊັ້ນ, ໃບໝາກຍົມ… ແຕ່ສ່ວນທີ່ເອີ້ນວ່າສົ້ມໝູນັ້ນມີປະມານ 5,000 ກີບ.
ຈາກກໍລະນີດັ່ງກ່າວ, ໄດ້ມີຜູ້ອ່ານຈຳນວນຫຼວງຫຼາຍເຂົ້າມາສະແດງຄວາມຄິດເຫັນ ໂດຍສ່ວນຫຼາຍທັກທ້ວງວ່າສົ້ມໝູດັ່ງກ່າວໃສ່ຕອງຫຼາຍເກີນໄປເປັນການສິ້ນເປືອງຕອງ ພ້ອມທັງສິ່ງທີ່ໄດ້ບໍ່ເໝາະສົມກັບລາຄາ. ຜູ້ອ່ານຈຳນວນຫຼາຍໃຫ້ຄຳເຫັນວ່າ ສົ້ມໝູບໍ່ວ່າຈະເປັນຢູ່ປາກເຊ ຫຼືແຫ່ງອື່ນໆ ກໍມັກຈະມີຕອງຫຼາຍໆ ຊັ້ນ ດັ່ງນັ້ນ, ຈຶ່ງຄວນເລືອກຊື້ນຳສະເພາະແຕ່ຂາປະຈຳທີ່ເຊື່ອຖືໄດ້.
ໃນຂະນະທີ່ບາງຄົນໄດ້ໃຫ້ຄຳຄິດເຫັນວ່າ ການໃສ່ຕອງຫຼາຍໆ ມັນຈະເຮັດໃຫ້ຫໍ່ສົ້ມງາມ, ສົ້ມໝູບໍ່ບູດເນົ່າ ແລະແຊບ ແຕ່ການທີ່ໃສ່ຕອງຫຼາຍເກີນໄປ ມັນກໍບໍ່ສົມຄວນເພາະຜູ້ຊື້ຕ້ອງການຊື້ເພື່ອໄປບໍລິໂພກ ແລະຖ້າເປັນແບບນີ້ມັນຈະກະທົບກັບການທ່ອງທ່ຽວ ກະທົບກັບການຄ້າ-ຂາຍສົ້ມໝູໃນວົງກວ້າງ. ດັ່ງນັ້ນ, ຈຶ່ງຮຽກຮ້ອງໃຫ້ຜູ້ຜະລິດຫໍ່ສົ້ມໝູຈົ່ງຄຳນຶງເຖິງຈຸດນີ້ນຳພ້ອມ.
