ໃນສັງຄົມປະຈຸບັນ ສະພາບປາກົດການຫຍໍ້ທໍ້ຫຼາຍສິ່ງຫຼາຍຢ່າງຍັງສືບຕໍ່ສ້າງຄວາມບໍ່ເປັນລະບຽບຮຽບຮ້ອຍທາງດ້ານສັງຄົມ ໃນນັ້ນ ການຕົວະຍົວະຫຼອກລວງ ຫຼື ສໍ້ໂກງເອົາຊັບສົມບັດຂອງຄົນອື່ນມາເປັນຂອງຕົນເອງໂດຍບໍ່ຊອບທຳ ຊຶ່ງກາຍເປັນບັນຫາປາກົດການຫຍໍ້ທໍ້ໜຶ່ງທີ່ພວກເຮົາໝົດທຸກຄົນຕ້ອງໄດ້ພ້ອມກັນແກ້ໄຂໂດຍດ່ວນ ຄືດັ່ງລາຍຄະດີນີ້: ທ້າວ ສົດ ອາຍຸ 28 ປີ ຊາວນາ ຢູ່ບ້ານວຽງຄຳ ເມືອງຫີນເຫີບ ແຂວງວຽງຈັນ ຖືກເຈົ້າໜ້າທີ່ກັກຕົວມາດຳເນີນຄະດີໃນຄັ້ງວັນທີ 26 ເມສາ 2016 ຜ່ານມາໃນຂໍ້ກ່າວຫາສໍ້ໂກງຊັບຂອງພົນລະເມືອງ.
ຜ່ານການສືບສວນ-ສອບສວນຂອງ ເຈົ້າໜ້າທີ່ ປກສ ເມືອງຫີນເຫີບ ທ້າວ ສົດ ໃຫ້ການໃນເບື້ອງຕົ້ນວ່າ: ໃນຄັ້ງວັນທີ 26 ເມສາ 2016 ເວລາ 7 ໂມງ ຕົນເອງໄດ້ໄປຢືມລົດຈັກຮອນດ່າເວັບ 100 ສີຟ້າ ນຳທ້າວ ຈັນ ບ້ານນາດີ ເມືອງເຟືອງ ແຂວງວຽງຈັນ ທີ່ມາຢາມເອື້ອຍຢູ່ບ້ານ ໂພນເງິນ ເມືອງໂພນໂຮງ ແຂວງວຽງຈັນວ່າຈະໄປເອົາເງິນຄ່າຈ້າງຂັບລົດສົ່ງ ເບຍ ຈຳນວນ 3 ລ້ານກີບ ນຳບໍລິສັດ ຫຼັງຈາກນັ້ນ ທ້າວ ສົດ ກໍ່ຂີ່ລົດຈັກຄັນດັ່ງກ່າວໄປບ້ານໂພນມ່ວງ ເມືອງຫີນເຫີບ ແລ້ວ ທ້າວ ສົດ ກໍ່ໄປແວ່ຫຼິ້ນໄພ້ຢູ່ເຮືອນດີ ເມື່ອເງິນຜູ້ກ່ຽວໝົດແລ້ວ ກໍເອົາລົດຄັນທີ່ຢືມມານັ້ນໄປຂາຍໃຫ້ຕູ້ມີບ້ານໂພນມ່ວງ ໃນລາຄາ 1,7 ລ້ານກີບ ໄດ້ເງິນແລ້ວກໍເອົາໄປຫຼີ້ນໄພ້ຕໍ່ໝົດເງິນ 1,2 ລ້ານກີບ ສ່ວນເງິນທີ່ຍັງເຫຼືອຜູ້ກ່ຽວກໍເອົາໄປໃຊ້ຈ່າຍຫຼີ້ນກິນຟຸມເຟືອຍຈົນໝົດ ໃນທີ່ສຸດກໍຖືກເຈົ້າໜ້າທີ່ຈັບຕົວໄດ້ໃນຕອນແລງຂອງວັນດຽວກັນ.
ຜູ້ກ່ຽວໃຫ້ຮູ້ຕື່ມອີກວ່າໃນໄລຍະຜ່ານມາແມ່ນໄດ້ລັກ ແລະ ສໍ້ໂກງລົດຈັກ ມາແລ້ວ 8 ຄັນ ໂດຍໃຊ້ຮູບການໄປທຳ ຄວາມລຶ້ງເຄີຍເປັນຮັກເປັນແພງ ເມື່ອໄດ້ໂອກາດກໍຢືມແລ້ວກໍເອົາລົດຈັກໜີ ໄປເລີຍ ສ່ວນຫຼາຍແມ່ນຜູ້ກ່ຽວໄດ້ຕົວະເອົາຢູ່ຂອບເຂດເມືອງຫີນເຫີບ 5 ຄັນ, ເມືອງໂພນໂຮງ 1 ຄັນ, ເມືອງຫາດຊາຍ ຟອງ 2 ຄັນ ແລະຢູ່ແຂວງຈຳປາສັກ 1 ຄັນ ປະຈຸບັນເຈົ້າໜ້າທີ່ໄດ້ເກັບກູ້ເຄື່ອງຂອງກາງປະເພດລົດຈັກຄືນມາໄດ້ ທັງໝົດ 8 ຄັນ ແລະໄດ້ມອບຄືນໃຫ້ເຈົ້າຂອງເດີມເປັນທີ່ຮຽບຮ້ອຍແລ້ວ.
ທີ່ມາ: 