ວັນທີ 31 ພຶດສະພາຜ່ານມາ ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ, ຮ່ວມກັບສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ແລະ ຄະນະກຳມະການວຽກງານປະຊາຄົມເສດຖະກິດອາຊຽນຂັ້ນ ນະຄອນຫຼວງວຽງຈັນ ຮ່ວມກັນຈັດກອງປະຊຸມສຳມະນາການພັດທະນາທຸລະກິດຂອງນະຄອນຫຼວງວຽງຈັນໃນເງື່ອນ ໄຂການເຊື່ອມໂຍງປະຊາຄົມເສດຖະກິດອາຊຽນຢູ່ສູນການຄ້າລາວ-ໄອເຕັກ ໂດຍພາຍໃຕ້ການເປັນປະທານຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ພ້ອມດ້ວຍພາກສ່ວນທີ່ກ່ຽວຂ້ອງຕ່າງໆເຂົ້າຮ່ວມ.
ທ່ານ ເບີລິນ ເພັດຈັນທະລາດ ຫົວໜ້າພະແນກອຸດສາຫະກຳ ແລະການຄ້ານະຄອນຫຼວງວຽງຈັນກ່າວວ່າ: ຈຸດປະສົງ ແລະຄາດໝາຍຂອງກອງປະຊຸມສຳມະນາໃນຄັ້ງນີ້ກໍເພື່ອສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະແຜນພັດທະນາເສດຖະກິດ-ສັງ ຄົມແຫ່ງຊາດ 5 ປີຄັ້ງທີ VIII (2016-2020) ເປັນແຜນບຸກທະລຸສູ່ການຜະລິດສິນຄ້າ, ການຫັນສູ່ການບໍລິການ, ມີການພັດທະນາໄປສູ່ຄຸນນະພາບ ແລະ ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ, ພ້ອມດຽວກັນນັ້ນກໍເພື່ອ ເຮັດໃຫ້ພາກທຸລະກິດເຂົ້າໃຈນະໂຍບາຍ ແລະທິດທາງຂອງລັດຖະບານ, ເວົ້າລວມ, ເວົ້າສະເພາະແມ່ນວິໃສທັດຂອງນະຄອນຫຼວງວຽງຈັນຕໍ່ກັບການເຊື່ອມໂຍງປະຊາຄົມເສດຖະກິດອາຊຽນ (AEC), ໃນນັ້ນ ກໍເພື່ອເຮັດໃຫ້ນັກທຸລະກິດ SMEs ໄດ້ຮັບຮູ້ເຖິງສິ່ງທ້າທາຍ ແລະກາລະໂອກາດໃນໄລຍະການເຊື່ອມໂຍງກັບພາກພື້ນ ແລະ ສາກົນ.
ນອກນັ້ນ ທ່ານຍັງກ່າວຕື່ມອີກວ່າ: ກອງປະຊຸມສຳມະນາໃນຄັ້ງນີ້ ແມ່ນມີຄວາມໝາຍສຳຄັນຍິ່ງເພາະເປັນກາລະໂອກາດອັນດີທາງພາກລັດ ໄດ້ສ້າງເງື່ອນ ໄຂໃຫ້ແກ່ບັນດາຫົວໜ່ວຍວິສາຫະກິດໃນທຸກຂົງເຂດວຽກງານເພື່ອໃຫ້ມີ ຄວາມເຂົ້າໃຈນຳໄປຜັນຂະຫຍາຍເຂົ້າ ໃນການພັດທະນາທຸລະກິດຕົນເອງໃຫ້ເຂັ້ມແຂງ, ມີຜົນສຳເລັດ, ຜະລິດຕະພັນມີຄຸນນະພາບ ແລະເຄື່ອນໄຫວໄດ້ຢ່າງເຕັມເມັດເຕັມໜ່ວຍທັງສອດຄ່ອງກັບກົດ ໝາຍກຳນົດໄວ້, ໃນນັ້ນເຫັນວ່າການສຳ ມະນາຄັ້ງນີ້ ແມ່ນມີຜົນດີຫຼາຍຕໍ່ບັນດາຫົວໜ່ວຍທຸລະກິດຕ່າງໆທີ່ເຂົ້າຮ່ວມຈະໄດ້ຮັບຟັງການເຜີຍແຜ່ກ່ຽວກັບບັນດານະໂຍບາຍ, ໂອກາດ, ສິ່ງທ້າທ້າຍ ແລະ ການສ້າງທັກສະໃນກາເຈລະຈາການຄ້າຈາກວິທະຍາກອນທີ່ມີຄວາມຮູ້ ແລະ ປະສົບການທີ່ມາຈາກກົມນະໂຍບາຍການຄ້າຕ່າງປະເທດ, ສະຖາບັນຄົ້ນ ຄວ້າເສດຖະກິດການຄ້າ ແລະກົມຮ່ວມ ມືສາກົນ, ໂດຍສະເພາະແຜນເຊື່ອມໂຍງທາງດ້ານການເງິນ-ເງິນຕາອາຊຽນ, ການພັດທະນາຕະຫຼາດທຶນ, ການເຊື່ອມຕໍ່ການຊື້ຂາຍຫຼັກຊັບລະຫວ່າງຕະຫຼາດ ທຶນອາຊຽນ ແລະການປັບປຸງດ້ານລະບຽບການຄຸ້ມຄອງເພື່ອໃຫ້ໄດ້ມາດຕະຖານ ແລະສອດຄ່ອງລະຫວ່າງຕະຫຼາດ ທຶນໃນພາກພື້ນ ແລະ ໃນນັ້ນແມ່ນການເປີດເສລີກ່ຽວກັບການນຳເຂົ້າ-ສົ່ງອອກກະແສທຶນ, ເງິນຕາຕ່າງປະເທດ, ການລົງທຶນໂດຍກົງຈາກຕ່າງປະເທດ ໂດຍຍົກເລີກຂໍ້ກີດຂວາງຕ່າງໆ.
ທີ່ມາ: 