ພະແນກສຶກສາທິການ ແລະ ກິລານະຄອນຫລວງວຽງຈັນ ໄດ້ຈັດກິດຈະກຳ ເພື່ອສະເຫລີມ ສະຫລອງວັນເດັກນ້ອຍສາກົນ, ເຊິ່ງຈັດຂຶ້ນໃນເຊົ້າວັນທີ 31 ພຶດສະພານີ້, ຊຶ່ງມີຫລາກຫລາຍກິດຈະ ກຳເປັນຕົ້ນ ການຟ້ອນລຳຊົນເຜົ່າ, ຮ້ອງເພັງ ແລະ ແຕ້ມຮູບ….. ໂດຍເປັນປະທານຂອງທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ເຊິ່ງໃຫ້ກຽດເຂົ້າຮ່ວມຂອງທ່ານ ອານຸພາບ ຕຸນາລົມ ຮອງເຈົ້າຄອງນະຄອນຫລວງວຽງຈັນ ແລະ ມີບັນດາທ່ານເຈົ້າເມືອງຈາກ 9 ຕົວເມືອງ ແລະ ຜູ້ປົກຄອງເຂົ້າຮ່ວມເປັນຈຳນວນຫລວງຫລາຍ.
ໃນໂອກາດນີ້, ທ່ານຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ ໄດ້ກ່າວມີຄຳເຫັນວ່າ: ໃນສົກຮຽນ 2015-2016 ພະແນກສຶກສາທິການ ແລະ ກິລາ ນະຄອນຫລວງວຽງຈັນ ໄດ້ພັດທະນາການສຶກສາຕາມແຜນພັດທະນາຂອງກະຊວງສຶກສາທິການ ແລະ ກິລາ ວາງອອກແນໃສ່ການພັດທະນາການສຶກສາໃນໂຮງຮຽນໄປຕາມ 5 ຫລັກມູນການສຶກສາຄື: ຄຸນສົມ ບັດສຶກສາ, ປັນຍາສຶກສາ, ພາລະສຶກສາ ແລະ ແຮງານສຶກສາ ທົ່ວນະຄອນຫລວງວຽງຈັນ ມີຜົນ ສຳເລັດຂອງການຮຽນ-ການສອນ ການເຄື່ອນໄຫວນອກຫລັກສູດ, ເຊິ່ງສາມາດຍາດໄດ້ຜົນງານດັ່ງນີ້: ວຽກງານລ້ຽງເດັກ ປດຈຸບັນມີໂຮງຮຽນລ້ຽງເດັກ ແລະ ອະນຸບານທັງໝົດ 319 ແຫ່ງ, ສ່ວນພາກເອກກະຊົນ ມີທັງໝົດ 223 ແຫ່ງ ກວມເອົາ 69,91% ຂອງຈຳນວນໂຮງຮຽນທັງໝົດ ແລະ ໂຮງຮຽນປະຖົມສຶກສາທັງໝົດ 523 ແຫ່ງ, ໂຮງຮຽນເອກກະຊົນ 143 ແຫ່ງ ສຳລັບໂຮງຮຽນມັດທະຍົມສຶກສາປັດຈຸບັນມີທັງໝົດ 156 ແຫ່ງ (ໃນນັ້ນ ລວມທັງໂຮງຮຽນສົງ 6 ແຫ່ງ), ມີມໍປາຍ 10 ແຫ່ງ ແລະ ມັດທະຍົມສົມບູນ 78 ແຫ່ງ, ໃນນັ້ນສາມາດສົ່ງນັກຮຽນເກັ່ງຂອງນະຄອນຫລວງວຽງຈັນ ເຂົ້າການສອບເສັງນັກຮຽນເກັ່ງທົ່ວປະເທດ ແລະ ສາມາດຍາດໄດ້ອັນດັບ 1 ຈຳນວນ 2 ວິຊາຄື: ເຄມີສາດ ແລະ ຟີຊິກສາດ ແລະ ອັນດັບ 2 ວິຊາພາສາລາວ-ວັນນະຄະດີ,ເນື່ອງໃນໂອກາດວັນເດັກນ້ອຍສາກົນ ປີນີ້ທາງພະແນກເຮົາຈຶ່ງໄດ້ຈັດກິດຈະກຳເພື່ອໃຫ້ເດັກນ້ອຍມີຄວາມກ້າສະແດງອອກໃນເທິງເວທີ ແລະ ກ້າສະແດງອອກກັບໝູ່ເພື່ອນຫລາຍໆຄົນ.
ຂ່າວຈາກ: ພັດທະນາລາວ