ສຳນັກຂ່າວຕ່າງປະເທດ ລາຍງານໃນວັນທີ 31 ພຶດສະພານີ້ວ່າ ກອງປ້ອງກັນປະທານາທິບໍດີ ຫລື Secret Service (SS) ຂອງສະຫະລັດອາເມຣິກາ ໄດ້ອອກຄຳສັ່ງປິດທາງເຂົ້າອອກ ໃນເຂດພື້ນທີ່ເບື້ອງທິດເໜືອ ຂອງທຳນຽບປະທານາທິບໍດີ ຫລື ທຳນຽບຂາວ ທີ່ນະຄອນຫລວງວໍຊິງຕັນ ດີຊີ ຫລັງຈາກກວດພົບວັດຖຸຖືກສົງໄສ ໃນມື້ວານນີ້ (30 ພຶດສະພາ 2016) ຊຶ່ງກົງກັບວັນພັກລັດຖະການ ວັນນັກຮົບເກົ່າຂອງອາເມຣິກາ.
ແຫລ່ງຂ່າວລາຍງານວ່າ ມີຜູ້ຍິງຄົນໜຶ່ງ ໄດ້ໂຍນວັດຖຸຖືກສົງໄສດັ່ງກ່າວ ຂ້າມຮົ້ວເຂົ້າໄປເຂດທຳນຽບຂາວ ກ່ອນທີ່ຈະຖືກເຈົ້າໜ້າທີ່ຄວບຄຸມຕົວ, ພ້ອມນັ້ນ ບັນດານັກຂ່າວທີ່ເຂົ້າໄປພາຍໃນທຳນຽບຂາວ ກໍຖືກຄຳສັ່ງ ຫ້າມອອກຈາກພື້ນທີ່ ໂດຍບໍ່ໄດ້ຮັບອະນຸຍາດເຊັ່ນດຽວກັນ. ແນວໃດກໍຍາມ, ເຈົ້າໜ້າທີ່ອາເມຣິກາ ຍັງບໍ່ທັນມີການເປີດເຜີຍຂໍ້ມູນ ກ່ຽວກັບວັດຖຸຕ້ອງສົງໄສດັ່ງກ່າວ ແຕ່ຢ່າງໃດ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!