ເນື່ອງໃນໂອກາດສະເຫລີມສະຫລອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ 1 ມີຖຸນາ ຄົບຮອບ 25 ປີ, ດັ່ງນັ້ນ ບ້ານຊ່ວຍເຫລືອເດັກກຳພ້າ (SOS) ຮ່ວມກັບກະຊວງແຮງງານ ແລະ ສະຫວັດດີການສັງຄົມ ຈັດກິດຈະກຳເພື່ອເປັນການສະເຫລີມສະ ຫລອງວັນດັ່ງກ່າວຂຶ້ນໃນວັນທີ 30 ພຶດສະພານີ້, ຢູ່ບ້ານຊ່ວຍເຫລືອເດັກກຳພ້າ ນະຄອນ ຫລວງວຽງຈັນ, ໃຫ້ມີຂະບວນການຟົດຟື້ນ, ໂດຍການໃຫ້ກຽດເຂົ້າຮ່ວມຂອງ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ , ມີທ່ານອຳນວຍການ, ຮອງອຳນວຍການ, ຄູ-ອາຈານ ແລະ ນັກຮຽນຂອງໂຮງງານດັ່ງກ່າວເຂົ້າຮ່ວມເປັນຈຳນວນຫລາຍ.
ພາຍໃນງານ ຍັງໄດ້ມີນ້ອງນັກຮຽນຊັ້ນອະນຸບານ ປະກອບສ່ວນຮ້ອງເພັງ, ຂັບລຳ ແລະ ຟ້ອນລວມໝູ່ຍິງ-ຊາຍ ເພື່ອສ້າງຄວາມເບີກບານມ່ວນຊື່ນໃຫ້ຜູ້ເຂົ້າຮ່ວມ, ຫລັງຈາກນັ້ນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກໍໄດ້ນຳເອົາເຄື່ອງກິລາ, ເຂົ້າໜົມ ແລະ ນົມ ມອບໃຫ້ນ້ອງນັກຮຽນອະນຸບານໂຮງຮຽນດັ່ງກ່າວ ເພື່ອເປັນຂວັນກຳລັງໃຈໃຫ້ແກ່ເດັກນ້ອຍຜູ້ທີ່ຂາດຄວາມອົບອຸ່ນຈາກຜູ້ປົກຄອງ, ໂດຍສະເພາະຜູ້ເປັນພໍ່ ແລະ ແມ່ຂອງພວກເຂົາເຈົ້າ.
ທ່ານນາງ ຄຳເມິງ ພັນທະວົງ ຜູ້ບໍລິຫານໂຮງຮຽນອະນຸບານ ບ້ານຊ່ວຍເຫລືອເດັກກຳພ້າ ໃຫ້ຮູ້ວ່າ: ໂຮງຮຽນອະນຸບານແຫ່ງນີ້ ເປັນໂຮງຮຽນລ້ຽງເດັກກຳພ້າ ນັບແຕ່ອາຍຸ 2-5 ປີ, ເຊິ່ງລວມມີ 4 ຫ້ອງຮຽນ, ມີອາຈານສອນທັງໝົດ 6 ຄົນ, ຊຶ່ງນ້ອງນັກຮຽນທຸກຄົນແມ່ນຈະໄດ້ຮ່ຳຮຽນໜັງສື ເປັນພາສາລາວ ແລະ ພາສາອັງກິດ ຄວບຄູ່ກັນໄປ, ໂດຍການອ່ານອອກສຽງ, ຫັດຂຽນໂຕໜັງສື ແລະ ຮັບຟັງວິທີການອ່ານຕ່າງໆ, ເຊິ່ງທັງໝົດນີ້ແມ່ນອີງຕາມປຶ້ມແບບຮຽນປະສົບການທີ່ກະຊວງສຶກສາທິການ ແລະ ກິລາ ວາງອອກ, ຊຶ່ງເຫັນວ່ານັກຮຽນທີ່ຮຽນຢູ່ຊັ້ນອະນຸບານທຸກຄົນແມ່ນໄດ້ຮັບຄວາມຮູ້ ແລະ ເຂົ້າໃຈເກືອບ 100%, ດັ່ງນັ້ນ ຈຶ່ງເຮັດໃຫ້ບັນຫາການບໍ່ໄດ້ໜັງສືຂອງນັກຮຽນຊັ້ນປະຖົມພົບໜ້ອຍທີ່ສຸດ, ຂະນະດຽວກັນ ກໍຍັງມີບາງຂໍ້ຫຍຸ້ງຍາກເປັນຕົ້ນ ເດັກນ້ອຍທີ່ເຂົ້າມາຮ່ຳຮຽນທຸກຄົນ ເປັນເດັກກຳພ້າ, ຊຶ່ງບໍ່ໄດ້ຮັບການສິດສອນ ແລະ ຮ່ຳຮຽນມາກ່ອນ ຈຶ່ງເຮັດໃຫ້ເດັກມີນິໃສແຂງກະດ້າງ, ບໍ່ຟັງຄວາມຄູ-ອາຈານ, ສະນັ້ນ ຄູ-ອາຈານຈຶ່ງໄດ້ເອົາໃຈໃສ່ແບບພິເສດ ເພື່ອສ້າງໃຫ້ເດັກນ້ອຍຈຳນວນນັ້ນ ເປັນເດັກຄຳຮູ້, ອ່ອນໂຍນ, ມີມາລະຍາດ ແລະ ຄຸນສົມບັດທີ່ດີເລີດ.
ບ້ານຊ່ວຍເຫລືອເດັກກຳພ້າ ( SOS ) ເປັນອົງກອນໜຶ່ງທີ່ໃຫ້ຄວາມສຳຄັນໃນການຊ່ວຍເຫລືອເດັກ, ໂດຍຖືເອົາສົນທິສັນຍາວ່າດ້ວຍການປົກປ້ອງສິດທິເດັກເປັນຫລັກໃນການລ້ຽງດູ, ສຶກສາອົບຮົມເດັກ ເພື່ອສິດປະໂຫຍດສູງສຸດຂອງເດັກ, ພ້ອມທັງການເບິ່ງແຍງລ້ຽງດູເດັກໃຫ້ໄດ້ກິນອີ່ມ, ນຸ່ງອຸ່ນ, ໄດ້ຮັບການສຶກສາທີ່ດີ ຈົນກາຍເປັນນັກຮຽນ, ນັກສຶກສາ ແລະ ພະນັກງານທີ່ມີວຽກເຮັດງານທຳທີ່ດີ.
ພາບ-ຂ່າວ: ເພັດສະໄໝ ພິມມະສອນ.
ທີ່ມາ: ຂ່າວສານ ແຮງງານ ແລະ ສະຫວັດດີການສັງຄົມ