ໃນໂອກາດທີ່ຄະນະຜູ້ແທນຂັ້ນສູງ ຄະນະກຳມະການກວດກາສູນກາງພັກກອມມູນິດຫວຽດນາມ ໄດ້ເດີນທາງມາຢ້ຽມຢາມເຄື່ອນໄຫວແລກປ່ຽນບົດຮຽນຢູ່ ສປປ ລາວ ລະຫວ່າງວັນທີ 24-26 ພຶດສະພານີ້ ວັນທີ 26 ພຶດສະພາ 2016 ຄະນະຜູ້ແທນຂັ້ນສູງນຳໂດຍສະຫາຍ ເຈີ່ນ ກວກ ເວື້ອງ ກຳມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກຳມະການກວດກາສູນກາງພັກກອມມູນິດຫວຽດນາມ ໄດ້ເຂົ້າຢ້ຽມຄຳນັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ພັກປະຊາຊົນປະຕິວັດລາວ ປະທານປະເທດ ທີ່ຫ້ອງວ່າການສູນກາງພັກ.
ໂອກາດດັ່ງກ່າວ ສະຫາຍ ບຸນຍັງ ວໍລະຈິດ ໄດ້ກ່າວຕ້ອນຮັບຄະນະຜູ້ແທນຂັ້ນສູງ ພ້ອມທັງຕີລາຄາສູງການມາຢ້ຽມຢາມ ແລະ ເຮັດວຽກຂອງຄະນະຜູ້ແທນແມ່ນມີຄວາມໝາຍສຳຄັນເປັນຢ່າງຍິ່ງ ເປັນການປະກອບສ່ວນອັນສຳຄັນ ເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ຈະເລີນງອກງາມຍິ່ງຂຶ້ນ ເວົ້າລວມ ເວົ້າສະເພາະ ໃນການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງຄະນະກວດກາສູນກາງພັກລາວ-ຫວຽດນາມ ເປັນການສືບຕໍ່ປຶກສາຫາລື ແລະ ລົງນາມບົດບັນທຶກການຮ່ວມມືສະບັບໃໝ່ ທີ່ເປັນບ່ອນອີງໃຫ້ແກ່ການຮ່ວມມືລະຫວ່າງ ສອງຄະນະກວດກາສູນກາງພັກໃນຕໍ່ໜ້າ.
ຫຼັງຈາກຢ້ຽມຄຳນັບສະຫາຍເລຂາທິການໃຫຍ່ແລ້ວ ຄະນະຜູ້ແທນຍັງໄດ້ເຂົ້າຢ້ຽມຊົມຫໍພິພິທະພັນ ໄກສອນ ພົມວິຫານ ແລະ ສະຖານທີ່ວັດທະນະທຳຢູ່ນະຄອນຫຼວງວຽງຈັນ ອີກຈຳນວນໜຶ່ງ.
ຂ່າວຈາກ: 