ສຳນັກຂ່າວ AFP ລາຍງານໃນວັນທີ 28 ພຶດສະພາຜ່ານມານີ້ວ່າ ນັກວິທະຍາສາດ, ນັກວິໄຈ ແລະ ແພດ 150 ຄົນ ຈາກຫລາຍປະເທດ ໄດ້ຮ່ວມກັນລົງນາມໃນຈົດໝາຍ ຮຽກຮ້ອງໃຫ້ມີການປ່ຽນສະຖານທີ່ ຈັດການແຂ່ງຂັນ ກິລາໂອລິມປິກລະດູຮ້ອນ ຈາກນະຄອນຣີໂອ ເດີນາເນໂຣ ປະເທດບຣາຊິນ ເປັນສະຖານທີ່ອື່ນ ຫລື ໃຫ້ເລື່ອນການແຂ່ງຂັນອອກໄປກ່ອນ ເພື່ອບໍ່ໃຫ້ນັກກິລາ ແລະ ຜູ້ເຂົ້າຊົມການແຂ່ງຂັນ ຕ້ອງສ່ຽງອັນຕະລາຍ ຈາກໄວຣັສຊິກາ ທີ່ກຳລັງແຜ່ລະບາດໜັກຢູ່ພື້ນທີ່ດັ່ງກ່າວ.
ເນື້ອໃນຂອງຈົດໝາຍ ຊຶ່ງລົງນາມໂດຍຄະນະຜູ້ຊ່ຽວຊານ ຈາກສະຫະລັດອາເມຣິກາ, ອັງກິດ, ການາດາ, ນອກແວ, ຟິລິບປິນ, ຍີ່ປຸ່ນ, ບຣາຊິນ, ອາຟຣິກາໃຕ້, ຕວກກີ, ເລບານອນ ແລະ ອີກຫລາຍປະເທດ ໄດ້ລະບຸວ່າ ການຢືນຢັນທີ່ຈະຈັດໂອລິມປິກ ໃນເມືອງຣີໂອ ເດີຈາເນໂຣ ຊຶ່ງພົບຜູ້ຕິດເຊື້ອໄວຣັສຊິກາ ຫລາຍເປັນອັນດັບ 2 ໃນປະເທດບຣາຊິນ ຖືວ່າໄຮ້ຄວາມຮັບຜິດຊອບ ແລະ ຂາດຈະຣິຍະທຳ, ພວກເຮົາກຳລັງສ່ຽງໂດຍບໍ່ຈຳເປັນ ຫາກປ່ອຍໃຫ້ນັກທ່ອງທ່ຽວ ຫລາຍກວ່າ 500,000 ຄົນທົ່ວໂລກ ເດີນທາງໄປຊົມການແຂ່ງຂັນ ແລະ ນຳເຊື້ອກັບໄປແຜ່ຢູ່ປະເທດຂອງຕົນ ຈົນເກີດການລະບາດຂຶ້ນມາ.
ແນວໃດກໍຕາມ ອົງການອະນາໄມໂລກ ຫລື WHO ໄດ້ອອກມາຖະແຫລງໃນເດືອນນີ້ວ່າ ໃນໄລຍະ 5-18 ສິງຫາ 2016 ຈະມາເຖິງນີ້ ທີ່ເປັນມື້ແຂ່ງຂັນກິລາໂອລິມປິກ ແລະ ພາຣາລິມປິກ ທີ່ນະຄອນຣິໂອ ເດີນາເນໂຣ ແມ່ນຢູ່ໃນໄລຍະລະດູໜາວຂອງບຣາຊິນ ຊຶ່ງຍຸງມີອັດຕາການແຜ່ພັນຕ່ຳ ແລະ ມີໂອກາດທີ່ເຊື້ອໄວຣັສຊິກາ ຈະລະບາດມີໜ້ອຍກວ່າ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!