ຂປລ. ພະແນກຖະແຫລງຂ່າວ, ວັດທະນະທຳ ແລະ ທ່ອງທຽວ ນະຄອນຫລວງວຽງຈັນ, ໄດ້ຢືນຢັນວ່າ ໂຄງການປະຕິສັງຂອນພິພິທະພັນຫໍພະແກ້ວ ຄັ້ງທີ 3 ໄລຍະ 3 ເກືອບສຳເລັດແລ້ວ 100 % ພາຍຫລັງໄດ້ດຳເນີນການມາແຕ່ ປີ 2014 ແລະ ຄາດວ່າ ຈະເປີດບໍລິການໃຫ້ມວນຊົນ ລວມທັງນັກທ່ອງທ່ຽວພາຍໃນ ແລະ ຕ່າງປະເທດເຂົ້າທ່ຽວຊົມ ໃນທ້າຍປີນີ້.
ທ່ານ ຄຳປະດິດ ເຂັມມານິດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທຽວ ນະຄອນຫລວງວຽງຈັນ, ໄດ້ເຜີຍໃຫ້ຮູ້ວ່າ: ພິພິທະພັນຫໍພະແກ້ວ ໄດ້ຮັບການສ້າງຕັ້ງຂຶ້ນ ເປັນເວລາດົນນານເກືອບ 450 ປີ ຈົນກາຍເປັນມໍລະດົກສະຖານແຫ່ງຊາດ, ເວລາຜ່ານໄປ 78 ປີແລ້ວ ເຫັນວ່າ ພິພິທະພັນຫໍພະແກ້ວ ໄດ້ຊຸດໂຊມລົງ ໂຄງສ້າງສະຖາປັດຕະຍາກຳ ແລະ ຕົວອາຄານສ່ວນໃຫຍ່ແມ່ນຜຸພັງໄປຕາມການເວລາ ໂດຍສະເພາະແມ່ນຫລັງຄາ ເຊິ່ງທັງໝົດນີ້ ມີຄວາມຈຳເປັນຮີບດ່ວນ ຕ້ອງໄດ້ບູລະນະສ້ອມແປງຄືນໃໝ່ ເຊິ່ງໂຄງການບູລະນະປະຕິສັງຂອນ ພິພິທະພັນຫໍພະແກ້ວ ໄລຍະ 3 ແມ່ນສໍາເລັດໃນແຕ່ລະໄລຍະໜ້າວຽກ ຄື: ການບູລະນະຫລັງຄາ, ຕົວອາຄານ ແລະ ພື້ນ, ປັດຈຸບັນແມ່ນສຳເລັດເກືອບ 100% ເຫລືອພຽງແຕ່ຈັດສັນເຄື່ອງວາງສະແດງບັນຈຸພັນ, ຕົບແຕ່ງ ແລະ ວຽກອະນາໄມເລັກນ້ອຍ ສຳລັບໂຄງຮ່າງ, ລັກສະນະຮູບຊົງ ສີລະປະລວດລາຍຕ່າງໆ ແມ່ນຍັງຮັກສາຄວາມສວຍງາມ ຄົງໄວ້ເອກະລັກລາວລ້ານຊ້າງດັ່ງເດີມ ເພື່ອຮັກສາໃຫ້ເປັນມໍລະດົກອັນລ້ຳຄ່າຂອງຊາດ.
ຜ່ານມາ ພິພິທະພັນຫໍພະແກ້ວ ເຄີຍບູລະນະປະຕິສັງຂອນມາແລ້ວ ຄັ້ງທີ I ໃນປີ ຄສ 1816, ຄັ້ງທີ II ໃ ນປີ ຄສ 1936-1942 ແລະ ຄັ້ງທີ III ໃນ ປີ 2014-2016.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!