ເພາະ “ເດັກນ້ອຍ” ຄືອະນາຄົດຂອງຊາດທີ່ຈະເຕີບໃຫຍ່ຂຶ້ນມາພັດທະນາປະເທດຊາດ ຜູ້ໃຫຍ່ຈິ່ງໃຫ້ຄວາມສຳຄັນກັບເດັກນ້ອຍ ແລະ ຈັດໃຫ້ມີວັນເດັກນ້ອຍຂຶ້ນ ເພື່ອໃຫ້ເປັນວັນທີ່ແສນພິເສດໃຫ້ກັບພວກເຂົາໃນທຸກໆປີ ເຊິ່ງກິດຈະກຳໃນວັນເດັກນ້ອຍຈະມີ: ກິດຈະກຳທີ່ສະໜຸກສະໜານ, ອົບອຸ່ນ ແລະ ໄດ້ຄວາມຮູ້ ເພື່ອເຮັດໃຫ້ພວກເຂົາເຕີບໃຫຍ່ຂຶ້ນມາເປັນຜູ້ນຳທີ່ດີ ແລະ ເປັນກຳລັງສຳຄັນຂອງປະເທດຊາດ
ວັນເດັກນ້ອຍສາກົນນີ້ຖືກສ້າງຕັ້ງຂຶ້ນໂດຍສອງອົງການລະດັບໂລກຄື: Women’s International Democratic Federation ເຊິ່ງຈັດຕັ້ງຂຶ້ນໃນປີ ພ.ສ 2493 ໄດ້ກຳນົດໃຫ້ວັນທີ 1 ມິຖຸນາຂອງທຸກປີເປັນ ວັນເດັກນ້ອຍສາກົນ International Children’s Day ແລະ ອົງການສະຫະປະຊາຊາດ ໄດ້ກຳນົດເອົາວັນທີ 20 ພະຈິກຂອງທຸກປີວັນເດັກນ້ອຍສາກົນ
ສຳລັບປະເທດລາວເຮົາ ກໍ່ໃຫ້ຄວາມສຳຄັນໃນວັນເດັກນ້ອຍສາກົນເປັນຢ່າງຍິ່ງ ນອກຈາກວັນເດັກນ້ອຍແລ້ວ ໃນວັນດຽວກັນນີ້ຍັງຖືເປັນວັນປູກຕົ້ນໄມ້ແຫ່ງຊາດອີກດ້ວຍ ດັ່ງນັ້ນເດັກນ້ອຍຈະໄດ້ມ່ວນກັບການເຮັດກິດຈະກຳຕ່າງໆ ບໍ່ວ່າຈະເປັນການສະແດງ ສີລະປະຟ້ອນ, ຮ້ອງເພງ, ການແຂ່ງຂັນກີລາ…ແລ້ວ ເດັກນ້ອຍລາວຍັງໄດ້ຮ່ວມປູກຕົ້ນໄມ້ ເຊິ່ງຖືວ່າເປັນກິດຈະກຳທີ່ສຳຄັນທີ່ສະມາຊິກໃນຄອບຄົວຈະໄດ້ຮ່ວມກັນເຮັດ
ສຳລັບປະເທດສະມາຊິກອາຊຽນ ເຖິງຈະຢູ່ໃນພາກພື້ນດຽວກັນ ແລະ ຫຼາຍປະເທດມີຫຼາຍວັດທະນະທຳທີ່ຄ້າຍຄືກັນ ແຕ່ວັນເດັກນ້ອຍຂອງແຕ່ລະປະເທດນັ້ນຈະບໍ່ແມ່ນມື້ດຽວກັນທຸກປະເທດ
- ປະເທດໄທຈະເປັນປະເທດທຳອິດຂອງປະຊາຄົມອາຊຽນ ທີ່ຈັດງານວັນເດັກນ້ອຍຄືຈະຈັດຂຶ້ນໃນວັນເສົາຂອງອາທິດທີສອງ ໃນເດືອນມັງກອນ
- ທາງດ້ານ ປະເທດລາວ, ມຽນມາ, ກຳປູເຈຍ ແລະ ຫວຽດນາມ ແມ່ນໄດ້ເລືອກເອົາວັນທີ 1 ມິຖຸນາ ຂອງທຸກປີ ເປັນວັນເດັກນ້ອຍຂອງປະເທດຕົນ
- ປະເທດອິນໂດເນເຊຍ ຈະຈັດວັນເດັກນ້ອຍຂຶ້ນໃນວັນທີ 23 ກໍລະກົດຂອງທຸກປີ
- ປະເທດສິງກະໂປ ໄດ້ເລືອກເອົາວັນສຸກທຳອິດຂອງຕົ້ນເດືອນຕຸລາເປັນວັນເດັກນ້ອຍແຫ່ງຊາດໃນທຸກໆປີ
- ປະເທດມາເລເຊຍ ໄດ້ເລືອກເອົາວັນເສົາທ້າຍເດືອນຕຸລາເປັນວັນເດັກນ້ອຍແຫ່ງຊາດໃນທຸກໆປີ
- ປະເທດ ຟີລິປິນ ແລະ ບຣູໄນ ໄດ້ເລືອກເອົາວັນທີ 20 ພະຈິກຂອງທຸກປີວັນເດັກນ້ອຍຂອງປະເທດຕົນ ເຊິ່ງເປັນວັນເດັກນ້ອຍສາກົນທີ່ທາງອົງການສະຫະປະຊາຊາດເປັນຜູ້ຈັດຕັ້ງຂຶ້ນ
ເຖິງແມ່ນວ່າວັນເດັກນ້ອຍຂອງແຕ່ລະປະເທດໃນສະມາຊິກອາຊຽນຈະບໍ່ແມ່ນວັນດຽວກັນທຸກປະເທດກໍ່ຕາມ ແຕ່ທຸກປະເທດກໍ່ມີກິດຈະກຳໃນວັນເດັກນ້ອຍແບບດຽວກັນ ຄື: ຈັດໃຫ້ເດັກນ້ອຍໄດ້ເຮັດກິດຈະກຳກັບຄອບຄົວ, ຄູອາຈານ ແລະ ເພື່ອນໆ ໃນງານວັນເດັກນ້ອຍຈະມີໜ່ວຍງານຕ່າງໆຈັດກິດຈະກຳຂຶ້ນບໍ່ວ່າຈະເປັນທາງພາກລັດ ແລະ ເອກະຊົນ ໂດຍມີບາງປະເທດມີກິດຈະກຳອື່ນໆເຂົ້າມາຮ່ວມນຳເຊັ່ນ: ປະເທດລາວ ນອກຈາກຈະເປັນວັນເດັກນ້ອຍແລ້ວ ຍັງເປັນວັນປູກຕົ້ນໄມ້ແຫ່ງຊາດອີກດ້ວຍ
ເຖິງແມ່ນວ່າກິດຈະກຳໃນວັນເດັກນ້ອຍຂອງແຕ່ລະປະເທດຈະມີຄວາມແຕກຕ່າງກັນແນ່ເລັກໜ້ອຍ ແຕ່ຈຸດປະສົງຂອງການຈັດງານນັ້ນແມ່ນອັນດຽວກັນ ຄືໃຫ້ຜູ້ໃຫຍ່ບໍ່ລືມຄວາມສຳຄັນຂອງເດັກນ້ອຍ ແລະ ໃຫ້ເດັກນ້ອຍເອງໄດ້ຮູ້ວ່າພວກເຂົາມີຄວາມສຳຄັນຫຼາຍພຽງໃດຕໍ່ປະເທດຊາດ ຮວມທັງການປູກຝັງຈິດສຳນຶກໃຫ້ເດັກນ້ອຍໄດ້ກາຍເປັນພົນລະເມືອງທີ່ດີຂອງຊາດ ຮູູ້ຈັກໜ້າທີ່ຕົນເອງ ຢູ່ໃນລະບຽບວິໄນ ມີຄວາມຍຶດໝັ້ນໃນສະຖາບັນຊາດ, ສາສະໜາ ແລະ ລະບົບການປົກຄອງຂອງແຕ່ລະປະເທດ.
ທີ່ມາ: http://www.tkpark.or.th/