ໂຮງໝໍ 103 ເລີ່ມລົງມືກໍ່ສ້າງໂຄງການກໍ່ສ້າງອາຄານປິ່ນປົວທົ່ວໄປຊຶ່ງໂຄງການແມ່ນໄດ້ຮັບການຊ່ວຍເຫຼືອທາງດ້ານທຶນຮອນຈາກ ສປ ຈີນ, ອັນຈະປະກອບສ່ວນສ້າງສິ່ງອຳນວຍຄວາມສະດວກສະບາຍໃຫ້ແກ່ບັນດາອ້າຍນ້ອງໃນກອງທັບ ຕະຫຼອດຮອດປະຊາຊົນຜູ້ທີ່ຈະເຂົ້າມາຮັບການປິ່ນປົວຈາກໂຮງໝໍແຫ່ງນີ້.
ວັນທີ 27 ພຶດສະພາ ຜ່ານມາ ໄດ້ມີພິທີວາງສິລາລືກໂຄງການກໍ່ສ້າງອາຄານປິ່ນປົວທົ່ວໄປໂດຍການເປັນປະທານຂອງ ທ່ານ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ, ທ່ານ ສາງວ້ານສວນ ລັດຖະມົນຕີກະຊວງປ້ອງກັນປະເທດແຫ່ງ ສປ ຈີນ, ທ່ານ ກວານ ຫົວປິ່ງ ເອກອັກຄະລັດຖະທູດແຫ່ງ ສປ ຈີນປະຈຳລາວ, ມີບັນດາການນຳຂັ້ນສູງ, ຕາງໜ້າຝ່າຍລາວ ແລະ ຈີນ, ພະນັກງງານວິຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ສຳລັບໂຄງການກໍ່ສ້າງອາຄານປິ່ນປົວທົ່ວໄປໂຮງໝໍກອງທັບປະຊາຊົນລາວ 103 ແມ່ນໄດ້ຮັບການຊ່ວຍເຫຼືອທາງດ້ານທຶນຮອນຈາກກະຊວງ ປ້ອງກັນປະເທດແຫ່ງ ສປ ຈີນ ຊຶ່ງໂຄງການກໍ່ສ້າງລວມມີ: ອາຄານປິ່ນປົວທົ່ວໄປ ແລະອາຄານຊ່ຽວຊານຈີນໂດຍມີເນື້ອທີ່ລວມຂອງອາຄານແມ່ນ 24.756 ຕາແມັດໃນນັ້ນອາຄານປິ່ນປົວທົ່ວໄປເນື້ອທີ່ 23.658 ຕາແມັດ, ເປັນອາຄານ 9 ຊັ້ນ, ອາຄານອ້ອມຂ້າງສູງ 3 ຊັ້ນ, ລວງສູງຂອງອາຄານ 53,7 ແມັດ, ອາຄານສຳລັບຊ່ຽວຊານຈີນເນື້ອທີ່ 1.098 ຕາແມັດ, ອາຄານ 2 ຊັ້ນ, ລວງສູງ 9,64 ແມັດ, ສ່ວນມູນຄ່າໃນການກໍ່ສ້າງທັງໝົດປະມານ 170 ລ້ານຢວນ (ສະກຸນເງິນຈີນ), ໂຄງການດັ່ງກ່າວຕາມແຜນການ ແມ່ນຈະໃຫ້ສຳເລັດໃນເດືອນທັນວາ 2017 ນີ້.
ພາຍຫຼັງທີ່ໂຄງການໄດ້ກໍ່ສ້າງສຳເລັດຈະກາຍເປັນສິ່ງຢັ້ງຢືນທາງປະຫວັດສາດອີກອັນໜຶ່ງທີ່ສະແດງໃຫ້ເຫັນເຖິງມິດຕະພາບການຮ່ວມມືລະຫວ່າງສອງກອງທັບລາວ-ຈີນ ຊຶ່ງກາຍເປັນການສົ່ງເສີມສາຍພົວພັນລະຫວ່າງສອງຊາດກໍຄືສອງກອງທັບໃຫ້ພັດທະນາສູງຂຶ້ນໄປຕື່ມອີກບາດກ້າວໜຶ່ງ.
ທີ່ມາ: