spot_img
Homeຂ່າວເຫດການນາຍົກລັດຖະມົນຕີລາວ ແລະ ຍີ່ປຸ່ນ ພົບປະສອງຝ່າຍ ລະຫວ່າງກອງປະຊຸມ ຈີ 7 ເປີດກວ້າງ

ນາຍົກລັດຖະມົນຕີລາວ ແລະ ຍີ່ປຸ່ນ ພົບປະສອງຝ່າຍ ລະຫວ່າງກອງປະຊຸມ ຈີ 7 ເປີດກວ້າງ

Published on

ການພົບປະລະຫວ່າງ ທ່ານນາຍົກລັດຖະມົນຕີ ທອງລຸນ ສີສຸລິດ ແລະ  ທ່ານ ຊິນໂຊະ ອາເບະ, ນາຍົກລັດຖະມົນຕີ ແຫ່ງ ຍີ່ປຸ່ນ, ໄດ້ມີຂຶ້ນໃນວັນທີ 28 ພຶດສະພານີ້ ທີ່ນາໂກຢາ ໃນໂອກາດທີ່ເຂົ້າຮ່ວມກອງປະຊຸມເປີດກວ້າງ ຈີ7 (G7) ໃນລະຫວ່າງວັນທີ 26-27 ພຶດສະພາ 2016, ທີ່ ປະເທດຍີ່ປຸ່ນ.

ໃນການພົບປະສອງຝ່າຍ, ທ່ານ ຊິນໂຊະ ອາເບະ ໄດ້ສະແດງຄວາມຊົມເຊີຍຕໍ່ ທ່ານ ທອງລຸນ ສີສຸລິດ ທີ່ໄດ້ຮັບການແຕ່ງຕັ້ງ ໃຫ້ເປັນນາຍົກລັດຖະມົນຕີ ສປປ ລາວ ຜູ້ໃໝ່ ຊຶ່ງນັ້ນໄດ້ສະແດງເຖິງ ຄວາມເຊື່ອໝັ້ນຂອງການນຳພັກ-ລັດ ກໍຄືປະຊາຊົນລາວຕໍ່ທ່ານເອງ, ຍີ່ປຸ່ນ ຢຶນຢັນຈະສືບຕໍ່ເສີມຂະຫຍາຍ ການພົວພັນຮ່ວມມືທີ່ດີ ນຳຄະນະນຳຊຸດໃໝ່ຂອງ ສປປ ລາວ ຕໍ່ໄປ. ທ່ານ ທອງລຸນ ສີສຸລິດ ກໍໄດ້ສະແດງຄວາມປິຕີຊົມຊື່ນເປັນຢ່າງຍິ່ງ ແລະ ຮູ້ສຶກເປັນກຽດທີ່ໄດ້ຖືກເຊີນເຂົ້າຮ່ວມ ກອງປະຊຸມເປີດກວ້າງ ຈີ7 (G7)ໃນນາມປະເທດປະທານອາຊຽນປີ 2016.

ສອງຝ່າຍໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ ແລະ ຍີ່ປຸ່ນ ໂດຍສະເພາະ ພາຍຫຼັງທີ່ສອງປະເທດໄດ້ ຍົກລະດັບການພົວພັນຂຶ້ນ ເປັນຄູ່ຮ່ວມມືຍຸດທະສາດມານີ້ ໄດ້ຮັບການຂະຫຍາຍຕົວ ຢ່າງບໍ່ຢຸດຢັ້ງ, ສືບຕໍ່ກ້າວເຂົ້າສູ່ລວງເລີກ ແລະ ເປັນຮູບປະທຳ; ຝ່າຍລາວ ເຫັນດີສະໜັບສະໜູນ ແຜນຮ່ວມມືການພັດທະນາ ລະຫວ່າງ ສປປ ລາວ ແລະ ຍີ່ປຸ່ນ ເພື່ອແນ່ໃສ່ການພັດທະນາລາວແບບຍືນຍົງ ແລະ ເພື່ອໃຫ້ ສປປ ລາວ ຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ. ທ່ານນາຍົກ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ລັດຖະບານຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດມາ ທັງໃນຂອບສອງຝ່າຍ ແລະ ຫຼາຍຝ່າຍ; ເປັນຕົ້ນແມ່ນການຊ່ວຍເຫຼືອ ໃນຂະແໜງການຕ່າງໆ ເຊັ່ນ: ການພັດທະນາພື້ນຖານໂຄງລ່າງ, ການພັດທະນາຊັບພະຍາກອນມະນຸດ ແລະ ອື່ນໆ ລວມທັງ ການສົ່ງເສີມການລົງທຶນໂດຍກົງຂອງ ຍີ່ປຸ່ນ ຢູ່ ສປປ ລາວ ອັນເປັນການປະກອບສ່ວນທີ່ສຳຄັນ ເຂົ້າໃນການ ພັດທະນາເສດຖະກິດ-ສັງຄົມຂອງ ສປປ ລາວ ແລະ ຫວັງຢ່າງຍິ່ງວ່າ ລັດຖະບານ ຍີ່ປຸ່ນ ຈະສືບຕໍ່ໃຫ້ການຊ່ວຍເຫຼືອ ໃນໂຄງການດັ່ງກ່າວ ແລະ ສະເໜີການລົງທຶນຕ່າງໆຢູ່ ສປປ ລາວ ໃຫ້ຫຼາຍຂຶ້ນກວ່າເກົ່າ. ນອກຈາກນັ້ນ, ສອງຝ່າຍ ຍັງໄດ້ປຶກສາຫາລື ແລະ ແລກປ່ຽນຄວາມຄິດຄວາມເຫັນ ກ່ຽວກັບບັນຫາຕ່າງໆພາຍໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ ເຊັ່ນ: ການສ້າງຄວາມເຂັ້ມແຂງຂອງປະຊາຄົມອາຊຽນ ແລະ 8 ບູລິມະສິດການເປັນປະທານອາຊຽນຂອງ ສປປ ລາວ, ການຊ່ວຍເຫຼືອ ແລະ ສະໜັບສະໜູນ ສປປ ລາວ ໃນການເປັນປະທານອາຊຽນ ໃນປີ 2016, ການສ້າງຄວາມເຂັ້ມແຂງ ໃຫ້ແກ່ກອງປະຊຸມລະດັບຜູ້ນໍາປະເທດ EAS, ການຮ່ວມມືແມ່ນ້ຳຂອງ-ຍີ່ປຸ່ນ ທີ່ຈະຊ່ວຍໃນການພັດທະນາ ເພື່ອຫຼຸດຜ່ອນຄວາມແຕກໂຕນກັນໃນພາກພື້ນ. ສອງຝ່າຍ ສະແດງຄວາມຍິນດີ ທີ່ຈະສືບຕໍ່ໃຫ້ການຮ່ວມມືເຊິ່ງກັນ ແລະ ກັນ ເພື່ອເສີມຂະຫຍາຍ ການພົວພັນຮ່ວມມືຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ໃຫ້ຂະຫຍາຍຕົວຂຶ້ນເລື້ອຍໆ ສາມາດຕອບສະໜອງຜົນປະໂຫຍດ ແກ່ປະຊາຊົນສອງຊາດ ລາວ-ຍີ່ປຸ່ນ ລວມທັງໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.

ໃນລະຫວ່າງການເຂົ້າຮ່ວມກອງປະຊຸມໃນຄັ້ງນີ້, ທ່ານນາຍົກ ທອງລຸນ ສີສຸລິດ ຍັງໄດ້ຕ້ອນ ຮັບການເຂົ້າຢ້ຽມຂໍ່ານັບຂອງ ປະທານອົງການການຄ້າພາຍນອກຍີ່ປຸ່ນ ( JETRO ), ຕ້ອນຮັບການເຂົ້າຢ້ຽມຂໍ່ານັບຂອງ ຜູ້ຊ່ວຍກົງສຸນກິດຕິມະສັກ ແຫ່ງ ສປປ ລາວ ທີ່ ນະຄອນນາໂກຢາ ແລະ ຮັບການເຂົ້າຢຽມຂ່ຳນັບຂອງ ທ່ານເຈົ້າແຂວງໆໄອຈິນຳອີກ.

 

ແຫລ່ງຂ່າວ:

ລພນ

 

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!

ບົດຄວາມຫຼ້າສຸດ

ມີໃຜຊື່ຍາວກວ່ານີ້ບໍ່? ຊາຍຊາວນິວຊີແລນມີຊື່ຍາວທີ່ສຸດໃນໂລກ ໃຊ້ເວລາອ່ານ 20 ນາທີ ຈຶ່ງອ່ານແລ້ວ

ມາຮູ້ຈັກກັບຊາຍຜູ້ທີ່ມີຊື່ທີ່ຍາວທີ່ສຸດໃນໂລກ, ລໍເລນ ວອດກິນ (Laurence Watkins) ອາຍຸ 60 ປີ, ອາໄສຢູ່ເມືອງໂອດແລນ ປະເທດນິວຊີແລນ ລາວມີຈໍານວນຊື່ຍາວເຖິງ 2,253 ຄໍາ. ຜ່ານມາຊາຍຄົນນີ້ຫຼົງໄຫຼໃນລາຍການ Ripley's...

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄຂຂຶ້ນຢ່າງເປັນທາງການ

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ເປີດຂຶ້ນໃນວັນທີ 21 -...

ກຳນົດຈັດງານ 5 ວັນ ບຸນນະມັດສະການພຣະທາດຫຼວງວຽງຈັນ ຈະຈັດຂຶ້ນໃນລະຫວ່າງວັນທີ 1-5 ພະຈິກ 2025

ໃນວັນທີ 21 ຕຸລາ 2025 ພິທີຖະແຫຼງຂ່າວ ງານປະເພນີບຸນນະມັດສະການ ພຣະທາດຫຼວງ ແລະ ງານວາງສະແດງສິນຄ້າ ປະຈຳປີ ຄສ 2025 ຈັດຂຶ້ນ ທີ່ເດີ່ນພຣະທາດຫຼວງວຽງຈັນ...

ຍີ່ປຸ່ນ ຊ່ວຍເຫຼືອລ້າໂຄງການເກັບກູ້ລະເບີດບໍ່ທັນແຕກ ຢູ່ແຂວງ ຈຳປາສັກ ສາລະວັນ ແລະ ເຊກອງ ມູນຄ່າ 4,5 ລ້ານໂດລາສະຫະລັດ

ລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອວຽກງານ ລບຕ ຢູ່ພາກໃຕ້ຂອງລາວ ໃນວັນທີ 20 ຕຸລາ 2025 ທີ່ນະຄອນຫຼວງວຽງຈັນ ສປປ ລາວ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດຍີ່ປຸ່ນ ປະຈໍາລາວ ໄດ້ຈັດພິທີລົງນາມເອກະ...