ງານວາງສະແດງສິນຄ້າ ມະຫັດສະຈັນ ອິນໂດເນເຊຍ ຄັ້ງທຳອິດ ໄດ້ເປີດຂຶ້ນໃນວັນທີ 27-29 ພຶດສະພາ 2016 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ Irmawan Emir Wisnander ເອກອັກຄະລັດຖະທູດ ອິນໂດເນເຊຍ ປະຈຳ ສປປ ລາວ;
ທ່ານ ສົມຈິດ ອິນທະມິດ ກ່າວວ່າ: ງານວາງສະແດງສິນຄ້າຄັ້ງນີ້ ຈະເປັນການສ້າງໂອກາດໃຫ້ທຸລະກິດໄດ້ແລກປ່ຽນ ແລະ ດຶງດູດການຄ້າ, ການລົງທຶນຮ່ວມກັນລະຫວ່າງນັກທຸລະກິດຂອງລາວ ແລະ ອິນໂດເນເຊຍ ຢ່າງມີປະສິດທິຜົນສູງ. ໃນການຈັດງານວາງສະແດງສິນຄ້າມະຫັດສະຈັນອິນໂດເນເຊຍ ບໍ່ພຽງແຕ່ການໂຄສະນາຂາຍສິນຄ້າພຽງຢ່າງດຽວ ແຕ່ຍັງມີກອງປະຊຸມພົບປະທຸລະກິດລາວ-ອິນໂດເນເຊຍ ໃນການຊອກຄູ່ຄ້າ, ຄູ່ຮ່ວມງານນຳກັນ ເພື່ອຂະຫຍາຍການຮ່ວມມືລະຫວ່າງສອງລັດຖະບານກໍ່ຄືນັກທຸລະກິດຂອງສອງປະເທດໃຫ້ປະກົດຜົນເປັນຈິງໃນອະນາຄົດອັນໃກ້.
ໃນປີ 2015 ມູນຄ່າການຄ້າລາວສົ່ງອອກສິນຄ້າປະເພດກະສິກຳ ແລະ ອຸດສາຫະກຳໄປປະເທດອິນໂດເນເຊຍມີເຖິງ 6ແສນກວ່າ ໂດລາສະຫະລັດ, ໃນເວລາດຽວກັນລາວກໍ່ມີຄວາມຈຳເປັນນຳເຂົ້າສິນຄ້າປະເພດສິນຄ້າສະບຽງອາຫານ, ພາຫະນະຊີ້ນສ່ວນ, ເຄື່ອງໃຊ້ສອຍ, ອຸປະກອນການແພດ, ເຄື່ອງໃຊ້ໄຟຟ້າ ແລະ ເຄື່ອງກໍ່ສ້າງ ເຊິ່ງມີມູນຄ່ານຳເຂົ້າທັງໝົດ 11.5ລ້ານໂດລາສະຫະລັດ ຈັດຢູ່ອັນດັບທີ 32 ທີ່ລາວເຮັດການຄ້າກັບຕາງປະເທດ
ຂ່າວຈາກ: ເສດຖະກິດ-ການຄ້າ