ສຳນັກຂ່າວຕ່າງປະເທດ ລາຍງານໃນວັນທີ 27 ພຶດສະພານີ້ວ່າ ກອງກຳລັງທະຫານອີຣັກ ແລະ ພັນທະມິດ ສາມາດປົດປ່ອຍເມືອງຄາມາ ຄືນຈາກການຍຶດຄອງຂອງ ກຸ່ມລັດອິດສະລາມ ຫລື ກຸ່ມໄອເອັສ ໃນວັນພະຫັດທີ 26 ພຶດສະພາ 2016 ຜ່ານມານີ້ ຊຶ່ງຖືເປັນໄຊຊະນະອັນສຳຄັນຄັ້ງທຳອິດ ໃນບັ້ນຮົບປົດປ່ອຍເມືອງຟັນລູຈາ ເມືອງເອກຂອງແຂວງອັນບາ ທາງພາກຕາເວັນຕົກຂອງ ນະຄອນຫລວງແບກແດດ ປະເທດອີຣັກ.
ທັງນີ້ ບັ້ນຮົບປົດປ່ອຍເມືອງຟັນລູຈາ ໄດ້ເປີດສາກຂຶ້ນນັບຕັ້ງແຕ່ວັນຈັນທີ 23 ພຶດສະພາ 2016 ຜ່ານມາ ດ້ວຍການປະສານກຳລັງລະຫວ່າງ ກອງທັບລັດຖະບານອີຣັກ, ກຸ່ມຕິດອາວຸດມຸດສະລິມນິກາຍຊີອະ, ກອງກຳລັງພີເອັມເອບ ແລະ ມີກອງທັບອາກາດສະຫະລັດອາເມຣິກາ ເປັນຜູ້ຊ່ວຍສະໜັບສະໜູນ ໃນການໂຈມຕີທາງອາກາດ.
ແນວໃດກໍຕາມ, ແຫລ່ງຂ່າວຍັງລາຍງານວ່າ ເຖິງແມ່ນສາມາດປົດປ່ອຍຄືນເມືອງຄາມາແລ້ວກໍຕາມ ແຕ່ກໍຍັງມີການປະທະກັນ ລະຫວ່າງກອງກຳລັງຂອງອີຣັກ ແລະ ກຸ່ມໄອເອັສ ທີ່ຍັງຄົງຫລົງເຫລືອຢູ່ ພາຍໃນເມືອງດັ່ງກ່າວ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!