ແຫຼ່ງຂ່າວລັດຖະບານຍີ່ປຸ່ນເຜີຍກັບສື່ມື້ນີ້ວ່າ ນາຍົກລັດຖະມົນຕີຊິນໂຊ ອາເບະຂອງຍີ່ປຸ່ນຈະເລື່ອນແຜນການຂຶ້ນພາສີຜູ້ບໍລິໂພກໄວ້ກ່ອນ ຊຶ່ງກຳນົດໄວ້ໃນເດືອນເມສາ 2017 ເນື່ອງຈາກກັງວົນວ່າຈະກະທົບເສດຖະກິດທີ່ກຳລັງເຂົ້າສູ່ພາວະເງິນຝືດ.
ແຫຼ່ງຂ່າວລາຍງານວ່າ ທ່ານ ອາເບະ ມີທ່າອຽງຈະເລື່ອນການຂຶ້ນພາສີຜູ້ບໍລິໂພກໄປອີກ 1-3 ປີ ແລະລະບຸວ່າ ນາຍົກລັດຖະມົນຕີອາເບະຈະພົບປະຫາລືກັບ ທ່ານ ທາໂຣ ອາໂສະ ລັດຖະມົນຕີຄັງ ແລະ ທ່ານ ນັດສຶໂອ ຢາມາງູຈິ ຜູ້ນຳພັກໂຄເມໂຕະ ພັກຮ່ວມລັດຖະບານໃນວັນຈັນ ເພື່ອພິຈາລະນາເງື່ອນໄຂເວລາໃນການເລື່ອນພາສີຜູ້ບໍລິໂພກໄວ້ກ່ອນ ທັງນີ້ ເປັນທີ່ຄາດວ່າຍີ່ປຸ່ນພະຍາຍາມຊຸກຍູ້ການໃຊ້ຈ່າຍພາກລັດເພີ່ມຂຶ້ນ ແລະ ເລື່ອນໄລຍະເວລາການຂຶ້ນພາສີຜູ້ບໍລິໂພກເພື່ອຟື້ນຟູເສດຖະກິດທີ່ກຳລັງເຂົ້າສູ່ພາວະຂະຫຍາຍຕົວຊ້າລົງ.