ຕາມຂ່າວວານແທັງນຽນນິວ ລາຍງານວ່າ ນະຄອນ ໂຮຈີມິນ ຂອງສສ ຫວຽດນາມ ຕ້ອງໃຊ້ເງິນຫຼາຍເຖິງ 97,3 ພັນຕື້ດົງ(ສະກຸນເງິນຫວຽດນາມ)ໃນການແກ້ບັນຫານ້ຳຖ້ວມໃນປີ 2020.
ໃນລາຍງານຂອງຜູ້ຊ່ຽວຊານວ່າດ້ວຍການແກ້ໄຂບັນຫານ້ຳຖ້ວມໃນນະຄອນ ໂຮຈີ່ມິນ ທີ່ເປີດເຜີຍໃນວັນທີ 24 ພຶດສະພາທີ່ຜ່ານມາ ລະບຸວ່າ ລະບົບການລະບາຍນ້ຳໃນນະຄອນ ໂຮຈິມິນ ເປັນລະບົບທີ່ເກົ່າແກ່ທີ່ຖືກອອກແບບມາສຳລັບຜູ້ຄົນຢູ່ອາໄສ 2 ລ້ານຄົນ ແຕ່ປະຈຸບັນມີປະຊາກອນຢູ່ໃນນະຄອນໂຮຈິມິນເຖິງ 10 ລ້ານກວ່າຄົນ ຊຶ່ງໂຄງສ້າງສາທາລະນູປະໂພກໃນເມືອງ ໂດຍສະເພາະລະບົບລະບາຍນ້ຳ ບໍ່ສາມາດຮອງຮັບປະຊາກອນທີ່ເພີ່ມຂຶ້ນຈຳນວນມະຫາສານໄດ້.
ຕາມລາຍງານລະບຸວ່າ ທາງການກຽມຫາເງິນຈຳນວນດັ່ງກ່າວທັງຈາກການກູ້ຢືມເພື່ອການພັດທະນາຢ່າງເປັນທາງການ(ໂອດີເອ) ແລະ ຈາກຂະແໜງເອກະຊົນ ເພື່ອນຳມາຈັດການປັບປຸງໂຄງສ້າງສາທາລະນູປະໂພກເພື່ອແກ້ໄຂບັນຫານ້ຳຖ້ວມຕໍ່ໄປ.
ທີ່ມາ: ເສດຖະກິດ-ສັງຄົມ