ວັນທີ 26 ພຶດສະພາ ນີ້ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານນາງ ເກມອງ ວີດາ ເດີລາບັດ ຜູ້ຮັບ ຜິດຊອບໂຄງການກອງທຶນຝຣັ່ງ ເພື່ອການພັດທະນາ. ເພື່ອລາຍງານຜົນກອງປະຊຸມປະເມີນຜົນປະຈຳປີ ກ່ຽວກັບການນຳໃຊ້ ແລະ ຄວາມຄືບໜ້າ ກ່ຽວກັບການນຳໃຊ້ທຶນຊ່ວຍເຫລືອຂອງລັດຖະບານຝຣັ່ງ ໃຫ້ແກ່ລັດຖະບານລາວ ໃນວຽກງານປະຕິສັງຂອນ ເມືອງມໍລະດົກໂລກ ຫລວງພະບາງ ແລະ ຈຳປາສັກ.

ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ ຕໍ່ທ່ານນາງ ເກມອງ ວີດາ ເດີລາບັດ ໃນການເຂົ້າຢ້ຽມຂ່ຳນັບຄັ້ງນີ້, ພ້ອມລາຍງານຄວາມຄືບໜ້າ ແລະ ທົບທວນບັນຫາທີ່ຍັງຄ້າງຄາ ທີ່ຈະຕ້ອງແກ້ໄຂ ແລະ ສືບຕໍ່ຈັດຕັ້ງປະຕິບັດ ຮ່ວມມືໃນດ້ານການປະຕິສັງຂອນມໍລະດົກວັດທະນະທຳ.

ທ່ານນາງ ເກມອງ ວີດາ ເດີລາບັດ ໄດ້ສະແດງຄວາມຂອບໃຈ ມາຍັງທ່ານ ລັດຖະມົນຕີ ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ເອື້ອອຳນວຍຄວາມສະດວກໃນການປະຕິບັດວຽກງານ ພ້ອມຈະຍັງສືບຕໍ່ໃຫ້ການຊ່ວຍເຫລືອ ໃນຂົງເຂດວັດທະນະທຳ ຕໍ່ໄປອີກໃນອະນາຄົດ

ຂ່າວຈາກ: ສຳນັກຂ່າວສານປະເທດລາວ