ຂປລ. ໃນຕອນແລງຂອງ ວັນທີ 26 ພຶດສະພານີ້, ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ທ່ານ ພົນເອກ ຊາງ ວ້ານ ສວນ ລັດຖະມົນຕີກະຊວງປ້ອງກັນປະເທດ ແຫ່ງ ສປ ຈີນ ພ້ອມດ້ວຍຄະນະ ຢູ່ທຳນຽບປະທານປະເທດ ນະຄອນຫລວງວຽງຈັນ, ໂອກາດເດີນທາງຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມປ້ອງກັນປະເທດອາຊຽນ ທີ່ ສປປ ລາວ ເປັນເຈົ້າພາບ.
ໂອກາດນີ້, ທ່ານ ບຸນຍັງ ວໍລະຈິດ ປະທານປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການຢ້ຽມຢາມ ແລະ ເຂົ້າຮ່ວມກອງປະຊຸມຄັ້ງສຳຄັນຂອງອາຊຽນ ຂອງທ່ານ ພົນເອກ ຊາງ ວ້ານ ສວນ ພ້ອມຄະນະໃນຄັ້ງນີ້. ເຊິ່ງເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ຄວາມສາມັກຄີອັນເປັນມູນເຊື້ອ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ–ຈີນ ໃຫ້ນັບມື້ດີຂຶ້ນເລື້ອຍໆ. ພ້ອມທັງເຊື່ອໝັ້ນວ່າ ຂອບການຮ່ວມມືຂອງອາຊຽນ ໂດຍສະເພາະວຽກງານຄວາມໝັ້ນຄົງ ຈະໄດ້ຮັບການພັດທະນາ ຍົກລະດັບໃຫ້ດີຂຶ້ນກວ່າເກົ່າ.
ທ່ານ ພົນເອກ ຊາງ ວ້ານ ສວນ ກໍໄດ້ສະແດງຄວາມຂອບໃຈຕໍ່ ທ່ານປະທານປະເທດ ບຸນຍັງ ວໍລະຈິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ຕໍ່ການຢ້ຽມຢາມລາວ ຂອງຄະນະຜູ້ແທນກະຊວງປ້ອງກັນປະເທດ ສປ ຈີນໃນຄັ້ງນີ້ດ້ວຍ.
ແຫລ່ງຂ່າວ:
