ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງສະຫວັນນະເຂດຊຸດ I ຈະໄດ້ຈັດຂຶ້ນໃນລະຫວ່າງທ້າຍເດືອນນີ້ ໂດຍຄາດວ່າຈະມີການພິຈາລະນາ ແລະຮັບຮອງຫຼາຍບັນຫາສຳຄັນຂອງແຂວງ.
ເມື່ອບໍ່ດົນມານີ້ທີ່ຫ້ອງວ່າການປົກຄອງແຂວງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ຖະແຫຼງກ່ຽວກັບການຈະຈັດກອງປະຊຸມດັ່ງກ່າວວ່າມາຮອດປະຈຸບັນການຫ້າງຫາກະກຽມແມ່ນໄດ້ມີຄວາມພ້ອມແລ້ວໃນທຸກດ້ານ, ໂດຍກອງປະຊຸມແມ່ນຈະໄດ້ໄຂຂຶ້ນໃນລະຫວ່າງວັນທີ 31 ພຶດສະພາ ຫາ 1 ມິຖຸນາ 2016 ນີ້, ຢູ່ທີ່ຫໍວັດທະນະທຳໄກສອນ ພົມວິຫານ.
ສຳລັບເນື້ອໃນຕົ້ນຕໍຂອງກອງປະຊຸມແມ່ນຈະໄດ້ພິຈາລະນາ ແລະຮັບຮອງເອົາບັນຫາສຳຄັນຂອງແຂວງມເປັນຕົ້ນແມ່ນຮັບຟັງການລາຍງານຂອງຄະນະກຳມະການເລືອກຕັ້ງແຂວງກ່ຽວກັບຜົນຂອງການເລືອກຕັ້ງ ແລະຢັ້ງຢືນຄືນຄຸນລັກສະນະຂອງສະມາຊິກສະພາປະຊາຊົນແຂວງສະຫວັນນະເຂດ, ເລືອກຕັ້ງປະທານ ແລະຮອງປະທານ, ຄະນະປະຈຳສະພາປະຊາຊົນແຂວງ, ຮັບຮອງເອົາໂຄງປະກອບກົງຈັກການຈັດຕັ້ງ ແລະບຸກຄະລາກອນຂອງສະພາປະຊາຊົນແຂວງ, ພິຈາລະນາ ແລະຮັບຮອງເອົາການເລືອກຕັ້ງເຈົ້າແຂວງ,ຮອງເຈົ້າແຂວງ, ໂຄງປະກອບກົງຈັກການຈັດຕັ້ງຂອງແຂວງ, ຫົວໜ້າພະແນກການ ແລະອົງການທຽບເທົ່າພະແນກ ການຂອງແຂວງ, ພິຈາລະນາ ແລະຮັບຮອງເອົາການເລືອກຕັ້ງຫົວໜ້າອົງການ ໄອຍະການ ແລະປະທານສານປະຊາຊົນ ແຂວງ.
ພິຈາລະນາ ແລະຮັບຮອງເອົາວິໄສທັດຮອດປີ 2030, ແຜນຍຸດທະສາດຮອດປີ 2025 ແລະແຜນພັດທະນາເສດຖະກິດ-ສັງຄົມ 5 ປີຂອງແຂວງ (2016-2020) ແລະບັນຫາສຸດທ້າຍແມ່ນພິຈາລະນາ ແລະຮັບຮອງເອົາວິໄສທັດຮອດປີ 2030 ແລະແຜນຍຸດທະສາດຮອດປີ 2025 ແຜນການດຳເນີນ ງານ 5 ປີຂອງສະພາປະຊາຊົນແຂວງ (2016-2020).
ກອງປະຊຸມເທື່ອນີ້, ນັບວ່າເປັນກອງປະຊຸມທີ່ມີຄວາມໝາຍ, ຄວາມສຳຄັນທາງດ້ານປະຫວັດສາດ ແລະການເມືອງຂອງແຂວງສະຫວັນນະເຂດສະນັ້ນ, ຕາງໜ້າໃຫ້ຄະນະກຳມະການເລືອກຕັ້ງຂັ້ນ ແຂວງຈິ່ງຮຽກຮ້ອງມາຍັງພະນັກງານ, ທະຫານ, ຕຳຫຼວດ, ນັກທຸລະກິດຕະຫຼອດຮອດພໍ່ແມ່ປະຊາຊົນບັນດາເຜົ່າທົ່ວແຂວງຈົ່ງໄດ້ຕິດຕາມການດຳເນີນກອງປະຊຸມຄັ້ງນີ້ຢ່າງທົ່ວເຖິງ.
ທີ່ມາ: 